واز له‌ هاوار مه‌رگ بار و عومر تازه‌يگ ئه‌را خوه‌د دروس بكه‌

شفق نيوز

بكه‌ تا وای پاك و خوه‌ش وه‌هاری باێده‌ ناو ماڵه‌گه‌د و ته‌ماشای دوير بكه‌، دوينيد ك باڵه‌نده‌يل هاتنه‌سه‌و و گورانی چڕن  و نوير ته‌ڵايی خوه‌ر له‌لای وه‌ڵگه‌يل دار ديار ئه‌يا و گشت ئه‌ی ره‌ينيه‌يله‌ عومر نوو و خه‌و نوو و دڵ نوويگ ئه‌راد دروس ئه‌كا.

له‌ی پيشه‌كيه‌ ئه‌خوازم نامه‌يگ ئه‌را ڕوڵه‌يل پێكهاته‌گه‌م (كورده‌يل فه‌يلی) كل بكه‌م. وه‌ راسی سه‌ختيه‌يل فره‌يگ كيشايمن و له‌ گشت هه‌قه‌يلمان بیبه‌ش كريايمن و يه‌كيگ له‌ی هه‌قه‌يله‌ ك خودا داسه‌ پيمان يه‌سه‌ ك له‌زه‌ويگ له‌تی له‌داڵگ بويمنه‌ بژيه‌يم، هه‌رچشتيگ داشتيم پيشكه‌ش كرديم و خوه‌مان و مناڵه‌يل و داڵگ و باوگ و براو خوه‌شكه‌يلمان خريايمنه‌ زندان و گشت تاوانه‌يل ئه‌نفال و كوشتار ده‌سه‌جه‌می و ئه‌زموونه‌يل كيمياوی له‌بانمان جيوه‌جی كريا، ئه‌وه‌يش له‌وه‌ختيگ ته‌نيا گوناهمان يه‌ بوی ك كورد فه‌يليمن. نيه‌زانيم ك ئايا كورد بوين تاوانيگ بوی؟ و فه‌يلی بوين تومه‌تيگ؟ مايه‌ی سه‌رسوڕمانمانه‌ ك له‌ گشت لای دونيا دروشم بژی ئاده‌ميزاد به‌رزه‌و كريا وه‌لی له‌ عێراق و له‌لايه‌ن ده‌سه‌ڵات ديكتاتۆريه‌گه‌ی ته‌نيا دروشم مه‌رگ ئه‌را كورد به‌رزه‌و بويد. كورد فه‌يلی پاڵه‌وان ك جوور كويه‌يل كوردستان سه‌ربه‌رزی، حساوه‌يل گوزه‌يشته‌د و ئه‌و چشته‌يله‌ ك له‌ده‌س دايده‌ واز نه‌كه‌، عومر وه‌ختيگ جوور وه‌ڵگ داريگ كه‌فێ دی گله‌و نيه‌خوه‌ی وه‌لی وه‌ل هه‌ر وه‌هاريگ وه‌ڵگه‌يل نوويگ سه‌وز كه‌ن وه‌يخاتره‌ بنووڕه‌ ئه‌و وه‌ڵگه‌يل سه‌وزه‌ و گرنگييگ نه‌يه‌ ئه‌و وه‌ڵگه‌يل زه‌رده‌ ك كه‌فتنه‌سه‌ بان زه‌وی و بوينه‌سه‌ به‌شيگ له‌لی تا ژيان نوو و خه‌و نوو و دڵ نوويگ ئه‌راد دروس بكا ك ڕی خوه‌د و پشته‌يل ئايه‌نده‌ی كورده‌يل فه‌يلی رووشنه‌و ئه‌كا.

 

ئه‌سرا شاواز