هه‌ق‌ گورانيچڕين له ‌گه‌رماو؟!

شفق نيوز

- باوه‌ڕ وه‌ پیرۆزی‌ كاركردن ديرم‌، كار عه‌قڵ‌ ‌و كار‌ ده‌س، داوا له‌كه‌س نيه‌كه‌م نانم بيه‌ێد، وه‌لی له‌وه‌رانوه‌ر بايه‌ته‌ ده‌رفه‌ت‌ كار ئه‌رام دروس بوود ئه‌را ژیانيگ‌ شه‌ره‌فمه‌ندانه‌.

 

- باوه‌ڕ وه‌به‌هايل به‌رز‌ تاك ديرم‌، هه‌ق‌ ژیان ‌و ئازادی ‌‌و كامه‌رانی‌.

 

- باوه‌ڕ وه‌وه‌ ديرم‌ ڕاسی ‌‌و دادپه‌روه‌ری‌ دو بنه‌مای‌ سه‌ره‌كین ك‌ بايه‌ته‌ له‌هه‌ر سستميگ‌ كۆمه‌ڵایه‌تی كۆنكرێتی كار وه‌پيان بكريه‌ێد.

- باوه‌ڕ وه‌پیرۆزی‌ قه‌وڵ و په‌يمان ديرم، وته‌ی‌ ئنسانه‌يل بايه‌ته‌ جوور قه‌وڵ‌ نويسرياێ بوود، ته‌نيا ڕه‌وشت‌و ڕه‌فتار گرنگن، نه‌‌ك سامان‌و ده‌سه‌ڵات‌و پله‌وپایه‌.

 

- وه‌ باوه‌ڕم هه‌رچگه‌‌ هه‌ق هه‌س‌ وه‌ ته‌قالاكردن تيه‌ێده‌ ده‌س، گشت ده‌رفه‌تيگ هه‌وه‌جه‌ وه‌  پابه‌ندبوين ديرێ، هه‌ر پله‌یگیش ئه‌رك‌ گه‌ورا‌تر خه‌ێده‌ بان شاند.

 

- باوه‌ڕ وه‌وه‌ ديرم‌ یاسا ‌و ڕێساگان له‌ڕێ ئايميزاد هاتنه‌سه‌دی، نه‌ك وه‌چه‌واشه‌وه‌ ئاێمه‌يل له‌ڕێ یاسا دروسكرياوين، حكوومه‌تیش بايه‌ته‌ خزمه‌تكار ملله‌ت بوود، نه‌‌ك گه‌ورا ‌و سه‌روه‌ر.

 

- وه‌باوه‌ڕم‌ پلانداناين یه‌كيگه‌ له‌بنه‌مايل سه‌ره‌كی‌ ژیانيگ‌ خاسترو ڕێكخرياێ، ئابووری‌ بناغه‌ی‌ بوونیاد‌ داراییگ‌ ته‌ندروسه‌ ئه‌را حكوومه‌ت‌ و بزنس ‌و ژیان‌ تاكه‌يل.

 

- باوه‌ڕ وه‌وه‌ ديرم‌ ئه‌نجامداين‌ كار‌ خاس ‌و وه‌سوود ئه‌رك‌ بان شان‌ گشت هاوڵاتییه‌يله‌، دیوار‌ خوه‌دپه‌رستی‌ ته‌نيا وه‌قوربانیداين ڕميه‌ێ، ئه‌و خوه‌دبه‌ختكردن‌و قوربانیيشه‌ دروين‌ ئاێمه‌يل له‌ قۆفڵ و زه‌نجير نه‌جات ده‌ێد.

 

- باوه‌ڕ وه‌په‌روه‌ردگاريگ دانا ‌و میهره‌بان ديرم‌، به‌نده‌گانیشی‌ له‌وه‌خت‌ په‌رسينی ڕه‌سنه‌ ‌ڕاسگووترین كامه‌رانی ‌‌و گه‌ورا‌ترین سوود.

- باوه‌ڕ وه‌وه‌ ديرم‌ خوه‌شه‌ویسی‌ له‌گشت چشته‌یل‌ ناو ئه‌ی جه‌هانه‌ گه‌ورا‌تره‌، هه‌ر وه‌خاتر‌ خوه‌شه‌ویسی‌ تويه‌نیمن له‌بان قين ‌وكینه‌ زاڵبویمن، ته‌نيا ڕاسيیش ‌تويه‌نێد له‌بان هێز سه‌ربكه‌فێد.

 

- ژنه‌فتم كه‌سيگ ‌چووده‌لای‌ پیره‌ پیاويگ‌ دانا ، ئويشێده‌‌پێ (قوربان: ئيمه‌ حه‌فت برایمن، دويه‌شه‌و هه‌ر شه‌ش براگه‌م خه‌فتوين، ته‌نيا من له‌سياتگی‌ شه‌و نیشتويم‌ و یاد‌ خودا ‌كرديام‌) ، پیره‌پیاوه‌گه‌يش ‌جوواوی ده‌ێده‌و و ئويشێ (كوڕم یاد‌ خودا كار خاسيگه‌، وه‌لی خوه‌زه‌و تۆنيش بخه‌فتيايد، نه‌‌ك بايد ‌و له‌يره‌ منای‌ براگاند بكه‌ید)

 

- له‌كوتایی ‌پرسم: ئایا گورانيچڕين له‌گه‌رماو (حه‌مام) هه‌قيگه‌ له‌هه‌قه‌يل‌ ئاێم؟ دڵنیام پرسیاره‌گه‌م له‌جی خوه‌ی نیه‌، چوينكه‌ ئه‌و خاڵه‌يله‌ ك‌ له‌بان‌ نويسريانه‌ ئه‌وپه‌ڕ‌ جدیه‌ت‌و ڕاستگوویین، وه‌لی چه‌‌ بكه‌م هیچ شوينيگ‌ تر‌ شك نيه‌وه‌م بتويه‌نم وه‌ئازادی ‌‌و ئاسووده‌یی‌ گورانی‌ له‌تی بچڕم، وه‌ڕاسی‌ ئه‌ڵاجه‌ويه‌، خوه‌ميش له‌كار‌ خوه‌م سه‌رم سڕمه‌نيه‌ !!!!

نويسانن‌: مشعه‌ل ئه‌لسوده‌یری‌

هه‌ڵه‌وگه‌ردانن‌: سۆزان عه‌بدولستار(سۆرانی)- ئاراس جه‌واد(فه‌يلی)

سه‌رچه‌وه‌: شه‌رقولئه‌وسه‌ت