بازاڕ "شێخوڵڵا" وه‌رجه‌ راپرسى و له‌شوونى

جاسم ئه‌لحلفى

شه‌فه‌ق نيوز/ وه‌رجه‌ راپرسێ په‌يوه‌ندى كردمه‌ بريگ له‌ براده‌ره‌يل كوردستانييم له‌ كورد و كلدو ئاشووريه‌يل و باس له‌ نگه‌رانى خوه‌م ئه‌رايان كردم له‌باره‌ێ وه‌رده‌وامبوين له‌ بڕيار راپرسێ و وه‌ليانا باس له‌ پيشهاته‌يل پيشبينكرياێ كردم ئه‌را دوياى راپرسيه‌گه‌و هوير و ڕاى خوه‌م ئه‌رايان ده‌رخستم له‌ باوه‌ت مه‌سه‌له‌ى بارودوخ خاوه‌ن ده‌خڵه‌يل دياريكرياێ و زه‌حمه‌تكيشه‌يل و فه‌قيره‌يل له‌ هه‌رێم ك ئه‌وانه‌ گه‌وراترين زه‌ره‌د له‌ليان ئه‌كه‌فێد له‌ى سياسه‌ته‌يله‌ ك گورج روێ له‌ليان ئه‌كا.

 

له‌ باسه‌گه‌م دقه‌ت له‌بان نموونه‌يگ له‌ زه‌حمه‌تكيشيگ كورد كردم له‌ يه‌كيگ له‌ كويچه‌يل مه‌ردمى هه‌ولێر ژيه‌ێد جوور باقى كارگه‌ره‌يل تر له‌ كه‌رت گشتى له‌ هه‌ولێر و مووچه‌ى مانگانه‌ى خوه‌ى وه‌ ته‌مامى وه‌رناگرێد، ك ده‌ مووچه‌ له‌ جه‌م دوانزه‌ مووچه‌ له‌ ساڵ 2016 وه‌رگرت و ئمساڵيش تا مانگ ته‌شرين يه‌كه‌م گوزه‌يشت ته‌نيا هه‌فت مووچه‌ وه‌رگرتگه‌ له‌ جه‌م ده‌ مووچه‌.

 

بيجگه‌ ئه‌وه‌يش، زوڵميگ تر زياێ ئه‌دێ، ك ئه‌ويش ئه‌وه‌سه‌ مووچه‌ى وه‌ ته‌مامى وه‌رناگرێد، به‌ڵكوو ته‌نيا 75%  له‌ جه‌م گشتى وه‌رئه‌گرێد، يه‌يش وه‌ ئه‌وه‌گ گوايا به‌ختتداره‌ وه‌ به‌راورد وه‌ل هاوسنفه‌يلێ له‌ ده‌زگايه‌يل تر ك ته‌نيا نيمه‌ى مووچه‌ وه‌رئه‌گرن، يه‌يش له‌ وه‌ختيگ ك هه‌وه‌جه‌يل بنه‌ڕه‌تى ژيان بار گوزرانيان سه‌خت كردگه‌و خواسته‌يليگ رووژانه‌ ته‌نگ فشار خسته‌سه‌ بانيان، ئمجا ئى هاووڵاتى زه‌حمه‌تكيشه‌ هويچيش له‌باره‌ێ كاڵايه‌يل ناو مۆڵه‌يل نازانێد و جوور بازاڕه‌يل نيه‌ ك گونجياگ بدێ ئه‌را ده‌خڵه‌ كه‌مه‌گه‌ێ، به‌ڵكوو ئه‌چێده‌ بازاڕه‌يل مه‌ردمى وه‌تايبه‌ت بازاڕ "شێخوڵڵا" له‌ شار هه‌ولێر ك بازاڕ ئه‌رزان فرووشيگه‌.

 

له‌ وه‌خت خوه‌ێ پرسيار له‌ براده‌ره‌يلم كردم له‌ كوردستان: ئايا راپرسێ ئاڵشت ژيان ئى هاووڵاتيه‌ ئه‌كاو خوه‌شبه‌خى و شادێ ئه‌راى ئه‌يه‌رێد ئه‌را خوه‌ى و ئه‌را خيزانى وه‌ دابينكردن هه‌وه‌جه‌يل ژيان؟ ئايا ئارامى و سه‌قامگيرى ده‌سه‌وه‌ر ئه‌كا؟ ئايا هيلێده‌ى بازاڕ شێخوڵڵا ئالشت بكا وه‌ مۆڵه‌يل ك بازرگانه‌يل نه‌فت و سياسه‌ت و ريككه‌فتنه‌يل كاڵا له‌تى دائه‌نه‌ن؟ يا ژيانى فيشتر گرژتره‌و ئه‌كاو ترس تر كيشمه‌كيشه‌يل پيشبينكرياێ ده‌ره‌كى و ناوخوه‌يى ئه‌خاده‌ بان ترسه‌يلى له‌ئاكام هه‌وه‌جه‌و فشاره‌يل ژيان ك زه‌حمه‌ته‌ ئاماژه‌ وه‌ ئاكامه‌يل خراوى بكريه‌ێد له‌بان ئاسايش و گوزران و سه‌قامگيرى!

 

جى داخه‌ جواويگ قه‌ناعه‌تكه‌ر نه‌ژنه‌فتم و دياره‌ براده‌ره‌يل فريه‌ هويريان وه‌ لاێ ژيان زه‌حمه‌تكيشه‌يل هه‌رێم نيه‌و ده‌نگ ئيمه‌ى وشداريده‌ريش ناژنه‌فن له‌ روێداگه‌يل و ترس و نگه‌رانيمان له‌بان ژيان فه‌قيره‌يل و كارگه‌ره‌يل ئاسايى، ئى چين فه‌رامووشكرياگه‌ ك وه‌رگرى له‌ليان ئه‌كه‌يم و به‌رژه‌وه‌ندييان ئه‌گريمنه‌ خوه‌مان له‌ وه‌خت داناين نه‌خشه‌ێ سياسه‌تمان.

 

به‌ڵێ، هويرمان ها لاى زه‌حمه‌تكيشه‌يل نه‌ك بازرگانه‌يل هه‌ڵويست و نه‌فت و سياسه‌ت، ئه‌ركيشه‌ ك ئاده‌ميزاد هه‌ڵويست وه‌رنه‌گرێد، وه‌تايبه‌ت له‌ كيشه‌يل چاره‌نويسساز، وه‌بى ئه‌وه‌گ هساو پڕ دقه‌ت بكا ئه‌را ئاسايش مه‌ردم و گوزرانيان.

 

ئى كيشه‌يله‌ ئه‌وساو ئيسه‌يش له‌ ده‌فته‌رم وه‌ل براده‌ره‌يل ئه‌مينێد، وه‌ل مه‌سه‌له‌ێ چاره‌نويس ملله‌ت و يه‌كگرتگى وڵات و ده‌خاڵه‌تكاريه‌يل هه‌رێمى و مكوڕبوين له‌بان ده‌سكه‌فته‌يليگ ك جيوه‌جى بوينه‌و هه‌ڵويست يه‌كگرتگ وه‌رانوه‌ر وه‌ ترۆر و گرينگى له‌ خه‌وهه‌لسان و مقه‌يه‌تيكردن، چوينكه‌ جه‌نگ وه‌ل داعش هيمان ته‌مام نه‌ويه‌!

 

ئيسه‌ پرسياره‌گه‌ ده‌ركه‌فت: كى زه‌ره‌دمه‌نه‌ له‌ به‌رزه‌وبوين نرخ مادده‌يل خوارده‌مه‌نى له‌ بازاڕ "شێخوڵڵا" بيجگه‌ فه‌قير و هه‌وه‌جه‌داره‌يل ك ك رييان ناكه‌فێده‌ مۆڵه‌يل و كاڵايه‌يلێ ناناسن؟

 

ئه‌وانه‌ زه‌حمه‌تكيشه‌يلن ك مووچه‌يليان وه‌ ريك و پيكى و ته‌مامى وه‌رناگرن، ئه‌وانه‌ كارگه‌ره‌يل كوردستان و جفتيار و فه‌قيره‌يلين، ك زه‌ره‌دمه‌ن بوين وه‌رجه‌ راپرسى و له‌شوونيشى.

جاسم ئه‌لحلفى