له‌ به‌غدا ياد 113ساڵه‌ی ڕووژنامه‌نويسی كوردی كريا

شفق نيوز

د.عادل گه‌رميانی سه‌رۆك به‌ش زووان كوردی له‌ كۆلێژ زووان زانكۆی به‌غدا و شماره‌یگ ڕووژنامه‌نويس و خوه‌ندكار كورد له‌ به‌غدا و وه‌بوونه‌ی سه‌د و سێنزه‌يه‌مين ساڵڕووژ ڕووژنامه‌وانی كوردی، ئيواره‌ی ئمڕوو په‌نجشه‌ممه‌ 21/4/2011 له‌ باره‌گاى ده‌زگاى شه‌فه‌ق، لق به‌غدای سه‌نديكای ڕووژنامه‌نويسه‌يل كوردستان كۆڕیگ له‌ ژیر ناونیشان (مه‌دره‌سه‌يل ڕووژنامه‌نويسی كوردی) ساز دا.

 

له‌سه‌ره‌تاى كۆڕه‌گه‌ عه‌لی حوسێن فه‌يلی له‌ شوون پيرۆزبايی كردن وه‌ بوونه‌ی ئی ياده‌، وته‌يگ پێشكه‌ش وه‌ ئاماده‌بويه‌يل كرد و له‌تی باس له‌ بارودوخ ڕووژنامه‌نويسی كوردی له‌ ده‌يشت هه‌رێم كوردستان وه‌گشتی و له‌ به‌غدا وه‌تايبه‌ت كرد و وت: ڕووژنامه‌نويسی كوردی له‌ ده‌يشت هه‌رێم كوردستان لاوازه‌و وه‌وجووره‌گ بايه‌ته‌ بوود نييه‌، وه‌گوره‌ی ئه‌وه‌ ك له‌ عێراق تازه‌ زووان كوردی شان وه‌ شان زووان عه‌ره‌بی زووانيگ ڕه‌سمی عێراقه، ئه‌وه‌يش وه‌خاتر بايه‌خ نه‌ياين وه‌ زووان كوردی و كه‌می شماره‌ی رووژنامه‌نويسه‌يل  و ده‌زگايه‌يل ڕووشنهويری و ڕه‌سانن كوردی‌ له‌ ده‌يشت هه‌رێم.

 

ناوبرياگ هه‌ميش وت: سه‌رده‌مه‌يليگ به‌غدا ناوه‌ند ڕووشنهويری كوردی بوی و ڕووشنهويره‌يل كورد له‌ به‌غدا شاكاره‌يل گه‌ورايگ خه‌ڵق كردن، وه‌لی وه‌داخه‌و له‌ شوون پرۆسه‌ی ئازادی عێراق ئه‌و نه‌خش گرنگه‌ كه‌مڕه‌نگه‌و بوی و ڕوونامه‌نويسی ئيمه‌ له‌ی قوناغه‌ هويچ وه‌ره‌ونواچيينيگ وه‌خوه‌يه‌و نه‌يه‌ و به‌ڵگه‌يش ئه‌را ئه‌وه‌ يه‌سه‌ ك ئمڕوو شماره‌ی ڕووژنامه‌يليگ ك ڕووژانه‌ له‌ به‌غدا له‌ چاپ دريه‌ن ڕه‌سێده‌ چل ڕووژنامه ك ته‌نيا ڕووژنامه‌يگ كوردی له‌تی وه‌دی نيه‌كريه‌ێ و له‌ناونی په‌نجا راديۆ عه‌ره‌بی له‌ به‌غدا ته‌نيا يه‌ك راديۆ كوردی وجوود ديرێ ك ئه‌ويش (ڕاديۆ شه‌فه‌ق)ه.

 

سكرتێر لق به‌غدای سه‌نديكا ئاماژه‌ وه‌وه‌يش كرد ك له‌ وه‌رانوه‌ر ڕێژه‌ی كورده‌يل نيشته‌جای ده‌يشت هه‌رێم، شماره‌ی ڕووژنامه‌نويسه‌يل لق به‌غدای سه‌نديكا فره‌ كه‌مه‌ و يه‌يش بويه‌سه‌ مايه‌ێ ئه‌وه‌ ك ڕووژنامه‌نويسی كوردی له‌ ناوچه‌گه‌ له‌ ئاست داواكرياگ نه‌ود. ‌

 

 

له‌ به‌شيگ تر كۆڕه‌گه‌ د.عادل گه‌رميانی وته‌يگ پێشكه‌ش وه‌ ئاماده‌بويه‌يل كرد و له‌تی باس له‌ قوناغه‌يل مێژوويی پێشكه‌فتن ڕووژنامه‌نويسی كوردی كرد و ئه‌را هه‌يشت مه‌دره‌سه‌ پۆلينی كرد ك يه‌كه‌ميان مه‌دره‌سه‌ی تاراوگه‌س ك وه‌ل ده‌رچوين يه‌كه‌م ڕووژنامه‌ی كوردی(كوردستان) له‌ 22/4/1898 له‌ لايه‌ن خانه‌واده‌ی (به‌درخان)يه‌ل له‌ قاهره‌ سه‌رهه‌ڵدا، دويه‌ميانيش مه‌دره‌سه‌ی ڕووژنامه‌نويسی ئستانبۆل بوی ك له‌ شوون ئه‌وه‌گ عوسمانييه‌يل له‌ جه‌نگ يه‌كم جه‌هانی شكست خواردن دياردا و سێيم مه‌دره‌سه‌يش مه‌دره‌سه‌ی (سلێمانی)ه‌ ك وه‌ قوناغه‌يل جياوازيگ گوزه‌ر كرد و هه‌ميش ئاماژه‌ وه‌ مه‌دره‌سه‌ی شام كرد و ده‌ركردن گۆڤار ئه‌ده‌بی- كومه‌ڵايه‌تی (هاوار) كرد.

گه‌رميانی له‌ دريژه‌ی قسه‌گانی ئاماژه‌ وه‌ مه‌دره‌سه‌ی به‌غدا كرد ك يه‌كيگ له‌ گرنگترين ئه‌و مه‌دره‌سه‌يله‌ ك وه‌ل ده‌رچوين گۆڤار گه‌لاوێژ له‌ ساڵ 1939 دياردا.

 

سه‌رۆك به‌ش زووان كوردی له‌ كۆلێژ زووان زانكۆی به‌غدا له‌ دريژه‌ی باسه‌گه‌ی ئاماژه‌ وه‌ ڕووژنامه‌نويسی كوردی له‌ به‌غدا له‌شوون ڕميان ڕژيم ديكتاتۆری كرد و وت: وه‌خاتر كووچكردن شماره‌ی فره‌يگ له‌ ئه‌ديب و نويسه‌ر و ڕووژنامه‌نويسه‌يل كورد ئه‌را هه‌رێم كوردستان، ڕووژنامه‌نويسی كوردی له‌ به‌غدا تويش قه‌يران هات و هه‌رچه‌ن ك فره‌ له‌ سه‌ركرده‌يل كورد هانه‌ به‌غدا وه‌لی هويچ پشتگيرييگ له‌ ڕووژنامه‌نويسی كوردی له‌ پايته‌خت نه‌كردنه‌و ئه‌يه‌ له‌ هويره‌و بردنه‌ ك ڕووژنامه‌نويسی چه‌كيگ گرنگه‌ ك نيه‌ود پشتگووش بخريه‌ێد وه‌تايبه‌ت ئه‌را ئيمه‌ی كورد.

 

 

له‌ كوتايی چه‌ن باوه‌تيگ گرنگ و په‌يوه‌نديدار وه‌ ته‌وه‌ر كۆڕه‌گه‌ له‌لايه‌ن ئاماده‌بويه‌يل خريا وه‌ر باس و گفتوگوو.