كێشه‌ گه‌وراگه‌ هاشمی نييه‌!

شفق نيوز

له‌ به‌سيان كرديه‌، ئه‌گه‌ر به‌شيگ له‌ لی په‌يوه‌ندی وه‌ قسيه‌ی ده‌رچين هێزه‌يل ئه‌مريكييه‌و داشتوود و ئه‌مريكييه‌يل خوه‌يان ئه‌ی مه‌يدانه‌ ئه‌را تێست كردن عێراقه‌يل وه‌ جی هيشتنه‌ تا ئاينده‌ی ديموكراسی بزانن، ئه‌وه‌ به‌شيگ تره‌‌ ك په‌يوه‌ندی وه‌ وه‌زع تاريكستانيگه‌و دێرێ ك خه‌ته‌يل مه‌زهه‌بی و ئاينی و ئتنيكه‌يه‌يل ئيسه‌ دروسێ كردنه‌و ناخوازن سوودێگ له‌ ئه‌زموون وه‌هار عه‌ره‌بی بگرن. ئه‌گه‌ر لايه‌نه‌يل عێراقی چنه‌ هس بكه‌ن ك عێراق وه‌هارعه‌ره‌بی له‌ دويای ساڵ ٢٠٠٣ هيشتيه‌سه‌جی، يه‌ هه‌ڵه‌يگ ستراتيجی كه‌ن و وه‌ ئاسانی نيه‌تويه‌نن توتاليتاريزم و فاشيستی له‌ ناو رويكه‌شێگ له‌ ئازادی جی بكه‌نه‌و، هه‌ر ئه‌و جووره‌گ هه‌رێم كوردستانيش توانای ئه‌وه‌ نه‌يرێد تا ده‌رك وه‌هار عه‌ره‌بی بكاد و وه‌رده‌وام تن و تيژی دژ وه‌ ئازادی وه‌ بار تيه‌رێد!.

ئه‌را كورد كێشه‌ گه‌وراگه‌ هاشمی و مالكی و عه‌لاوی نييه‌، ئه‌وه‌سه‌ وه‌رده‌وام له‌ دويای رويداگ كه‌فێد و كه‌فتيه‌سه‌ چنگ تاريكستان مه‌زهه‌به‌و له‌ عێراق و وه‌ل ئه‌جندايگ سياسی مامه‌ڵه‌ نه‌كرديه‌ وه‌ل قه‌يرانه‌يلاو هه‌ميشه برا گه‌ورايی ئه‌را كورد بويه‌سه‌ مۆته‌گه‌(به‌سته‌نی). نه‌تويه‌نستيه‌ داواكاريه‌يل خوه‌ی بڕه‌سنێگه‌ شوون مه‌به‌س و مافه‌یلی بچه‌سپنێ و ماده‌ی‌ ١٤٠ نموونه‌يگ به‌رجه‌سته‌ی ئه‌ی وه‌زعه‌سه‌.

ئه‌وه‌سه‌ له‌ وه‌رده‌م پرس تاوانباركردن (تارق هاشمی) خوه‌ی له‌لی بويه‌سه‌ ده‌وڵه‌تيگ عوزما و له‌ لایگ تريشه‌‌و ئه‌ی ده‌وڵه‌ت عوزما توانای سه‌ننه‌وه‌ی كه‌ركوكی نه‌يرێد‌!؟.

هاشمی و فراكسيۆنه‌‌ سوننيه‌ سه‌رسه‌خته‌گه‌ی ئه‌گه‌ر ئه‌را دروس كردن ده‌وڵه‌ت كوردی خاسن بيلا گشتمان ماچيان بكه‌يم، ئه‌گه‌ريش نه‌، جياوازی مالكی و عه‌لاوی و هاشمی ئه‌را كورد چه‌س تا خوه‌ی بێ مانا بپلكنێده‌و وه‌ گه‌نی له‌ئاينده‌ی سياسی ئه‌ی هه‌رێمه‌. ئه‌وان وه‌رده‌وام قازانج چننه‌و له‌كورد، ئه‌نوی كه‌ی كورديش تووزيگ قازانج له‌ شوونيان ئه‌كا؟ ئه‌ی سياسه‌ت عه‌ره‌ب وه‌ته‌نی(أخذ و عطاء) دان و سه‌نين نييه‌...

چه‌ن ساڵ گوزه‌يشته‌ كورد تويه‌نست له‌ به‌غدا فێشتر تۆن براگه‌ورايی و مه‌ته‌ڵ كوينه‌ی موغزلاتی سياسی بوود نه‌ك سياسه‌تێگ عه‌قڵانیكردن په‌يوه‌نديه‌يلمان له‌ به‌غدا په‌يڕه‌وی بكا. ئه‌وه‌گ كورد تا ئيسه‌ له‌ به‌غدا كرديه‌ جه‌نگ بيزنس و نه‌فت و  به‌رژوه‌ندی حزبی بويه‌، نه‌ك ژه‌نين ئاواز له‌بان نه‌ته‌وه و كومه‌ڵگای كوردی هه‌ر ئه‌و جووره‌گ چوين سوننه‌ و شيعه ئه‌را خوه‌يان ئه‌ی بازی سياسیه‌ كه‌ن و چه‌نه‌ها وڵاتيش بويه‌سه‌ پشتيوانيان.

ئه‌ی وه‌زعه‌ كورد تيه‌ريكه‌و ئه‌كاو  شيعه و سوننه‌ ئه‌كا وه‌ برابه‌ش و براگه‌ورا، چوينكه‌ گه‌ره‌نتيه‌يل ئه‌را كورد له‌ دروشم و قسيه‌ی زووانی فره‌ تر نه‌چيه‌ تا بووده‌ نويسرياگێگ ره‌سمی و كورديش خوه‌ی ئه‌ی ته‌قلا ئه‌را خوه‌ی ناكاد.

عێراق پانتايی يه‌كلاوه‌وكردن كێشه‌يل(ئيران و ئه‌مريكا)س‌، وه‌ تايبه‌ت كێشه‌ی ساپۆرت هوير و ئايدۆلۆژی ئيران ئه‌را ئه‌و رێكخرياگه‌يل تونڕه‌وه‌  په‌ره‌وه‌پيداين چه‌كه‌يل ناوه‌كي ئيران ك دو كارت فشار ئه‌را ئه‌مريكان و ئه‌مريكايش فێشترين ته‌حه‌فوزات ئه‌را ئه‌ی پرسه‌ دێرێد.

ئه‌را يه‌ كورد بايه‌د بگه‌رديده‌ شوون بايخ سياسی خوه‌يه‌و ئه‌را خوه‌ی بازی و  سياسه‌ت بكا و ناوجيگه‌ری بێبه‌رێگ جوور تۆمه‌تباربوين تارق هاشمی نه‌ێده‌ ده‌س جه‌نگێگ نه‌خوازرياگ، ئه‌گه‌ريش كرد وه‌ ئه‌جندا و كۆنتراكت ژێروه‌ژيريگ ئه‌ی مامه‌ڵه‌ بكا.

ئه‌ی براگه‌ورايی كورده‌ زه‌ره‌ر فره‌یگ ره‌سانيه‌سه‌ ره‌فتار كورد و هه‌ميشه‌ له‌ وه‌رايوه‌ر نه‌ياره‌يل شه‌رمن بويه‌‌. دويای پرۆسه‌ی ئازادی هه‌ر له‌ جه‌ی گارنر تا پۆڵ برێمه‌ر حاكم مه‌ده‌نی عێراق، ده‌سڵات وه‌ختیگ هاوپه‌يمانه‌يل(CPA)، كورد هه‌ر شه‌رمنانه‌ و ميوان ئاسا ره‌فتار كرديه‌ و برا گه‌ورای سه‌ره‌كی دانيشتنه‌يل و ئاريشه‌يل بويه‌. قسيه‌ ديپلۆماسيه‌گه‌ی مه‌رجه‌ع گه‌ورای شيعه(عه‌لی سيستانی) ك وت: تاڵه‌بانی ئه‌را عێراق هه‌وه‌جه‌س ز‌رنگه‌ێ‌ له‌ گووشمان ئه‌يه‌ی!. وه‌لی خوو دی كه‌ی ئه‌را كورد هه‌وه‌جه‌س‌!؟!؟.

نادێ كورد وه‌ فه‌زليه‌ت جاران و براگه‌ورايی و نه‌غمه‌يل تشريفاتی بخوه‌نێد، به‌ڵكم جه‌نگ به‌رژوه‌ندی نه‌ته‌ويی و مافه‌يل باڵای بووده‌ خه‌م په‌يوه‌نديه‌يلی، وه‌ ئۆپۆزسيۆنيشه‌و بايه‌د دی وه‌ ستراتيجی نه‌ته‌وه‌يی كار بكه‌ن و له‌ ئاست متمانه‌ی ده‌نگده‌ره‌يل كورد بوون و دی وه‌خت نه‌كوشن.

 

ئاسۆ عه‌بدولله‌تیف