ئه‌زره‌ته‌یل فه‌یلى له‌ساڵ 2013

شفق نيوز

 

هه‌ر وڵاتیگیش ملله‌ته‌گه‌ى باوه‌ڕ و داب و نه‌ریتیگ دیرن ك وه‌رجه‌ هاتن سه‌ر ساڵ تازه‌ وه‌ چركه‌یل كه‌میگ  و كووتاییهاتن ساڵ گوزه‌یشته‌ له‌عراق وه‌تایبه‌ت ژنه‌یل باوه‌ڕیان ئه‌وه‌سه‌و هه‌ر یه‌كیگ له‌لیان له‌و چركه‌یله‌ چنه‌ شوونیگ به‌رزایى یا بان خانگ و هه‌رچى ته‌ڵاو جه‌واهیر دیرن گشتى پووشن و كه‌میگ شرینى خه‌نه‌ ده‌م و بڕیگ پویلیش وه‌ل خوه‌یانا هه‌ڵگرن وه‌ خاتر ئه‌وه‌ك دى وه‌ دریژایى ئه‌و ساڵه‌ رزقى دریه‌ید و ژیانه‌ى خوه‌شتره‌و بوود، ئنجا له‌وه‌ر ئه‌وه‌یش چنه‌ بان خانگ ك گوایا شوون به‌رزیگه‌و خوداى گه‌ورا زویتر جواو نزایان ده‌یده‌و.

 

وه‌لى له‌بان ئه‌زره‌ته‌یل تر، مه‌ردمانیگ  چ كوڕه‌ جایه‌ڵ چ دویه‌ت عازه‌و ئه‌زره‌تمه‌ن ئه‌وه‌نه‌ هاوسه‌ر ژیان خاسیگ بووده‌ تویشیان یا وه‌ دیدار خوه‌شه‌ویس دڵه‌یلیان شاده‌و بوون ك ماوه‌ى فره‌یگ له‌لى دویره‌و كه‌فتگه‌و مه‌ردمانیگیش هه‌ن ئه‌زره‌تى ئه‌وه‌سه‌ ده‌رفه‌ت كار ئه‌ڕاى په‌یا بوود یا قه‌یران نیشته‌جیبوینى چاره‌سه‌ر بوود یا ئاسایش و سه‌قامگیرى به‌رقه‌رار بوود و قورتار بویمن له‌ گه‌ناته‌كاره‌یل وڵات.

 

ئیسه‌یش ئه‌زره‌ت تازه‌ى ئه‌ڵڵاجه‌وییگ كه‌فتگه‌سه‌ ناونى ئه‌زه‌ره‌ته‌یل، ك ئه‌ویش ئه‌وه‌سه‌ واران له‌ به‌غدا و باقى پاریزگایه‌یل تر نه‌وارێد بیجگه‌ هه‌رێم كوردستان، چوینكه‌ له‌ كوردستان مه‌ردم خوه‌شى ئه‌را واران كه‌ن له‌وه‌ر ئه‌وه‌ك جاده‌یلیان پاك وپرچه‌و وه‌رپرسه‌یل له‌وره‌ كار ئه‌را ئاسووده‌یى هاووڵاتیه‌یل كه‌ن و مقه‌یه‌تى له‌ كه‌رامه‌تیان كه‌ن وه‌ چه‌واشه‌ى وه‌رپرسه‌یل به‌غداو باقى پاریزگایه‌یل تر ك ته‌نیا كار ئه‌را ئاسووده‌یى خوه‌یان كه‌ن و ده‌ربه‌س هاووڵاتیه‌یل فه‌قیر نیان ك خوه‌ى و خیزانى كه‌فته‌سه‌ وه‌ر مه‌ترسى ترۆریست و چوود ئه‌را هه‌ڵوژاردن نوێنه‌ریشى، وه‌لى دویاخر ئه‌ڕاى ده‌ركه‌فید ك ده‌نگ وه‌ تاڵان داگه‌و ئه‌و وه‌رپرسه‌ ك ده‌نگ وه‌پى داگه‌ ته‌نیا نوێنه‌ر خوه‌ى و مه‌ردمه‌گه‌ى ده‌وروه‌ریه‌، هه‌ر له‌وه‌ر ئه‌وه‌یش مه‌ردم له‌ واران ترسیه‌ن له‌وه‌ر ئه‌وه‌ك گشت جاده‌و ماڵه‌یلیان پڕ بوود له‌ ئاو له‌ى زمسان سه‌رده‌.

 

له‌ ناونى ئه‌و مه‌ردمانیشه‌ ك ئاره‌زوو دیرن پرسیار له‌ كورده‌یل فه‌یلى بكه‌ن ئه‌زره‌تیان چه‌س له‌ ساڵ تازه‌ى زاینى، ئایا ئه‌زره‌تدان ئه‌وه‌سه‌ كورسییگ یا زیاتر وه‌ربگرین له‌ هه‌ڵوژاردنه‌یل ئاینده‌ چ له‌ هه‌ڵوژاردنه‌یل ئه‌نجوومه‌ن پاریزگایه‌یل یا له‌هه‌ڵوژاردنه‌یل په‌رله‌مان و نوێنه‌ر خوه‌دان دیارى بكه‌ین و هه‌وڵ هاوردنه‌وه‌ى هه‌قه‌یلدان به‌ید؟ جواو زوورمیان ئه‌وه‌سه‌و ئویشن به‌ڵى ئه‌زره‌ت ئى چشته‌ كه‌یم بیجگه‌ ئه‌زه‌ره‌ته‌یل تر.

 

ئیمه‌ گشتمان له‌و هه‌مگه‌ مه‌ینه‌تیه‌ ك هاته‌ تویشمان بتویه‌نیم جوور باقى مه‌ردمان تر بژیه‌یم و بچیمنه‌ بان كار خوه‌مان و بتویه‌نیم وه‌ ئاسووده‌یى وه‌ل مناڵ و خیزانمان بنیشیم و ماڵو موڵكه‌یل زه‌فتكریاگمان باریه‌یده‌و جاریگ تر له‌لیمان زه‌فت نه‌كریه‌یدو دڵه‌یلمان نه‌سزن ئه‌را ئه‌و روڵه‌یلمانه‌ ك وه‌بى تاوان كوشیان، ئنجا هه‌رچه‌نى رووژگار وه‌ره‌و دویا نیه‌چوود، هه‌ر له‌وه‌ر ئه‌وه‌یش ئومیده‌واریم له‌ وه‌رپرسه‌یل حكوومه‌ت گره‌و له‌بان به‌خت ئیمه‌ نه‌كه‌ن له‌ گشت هه‌ڵوژاردنه‌یل و هه‌وڵ ئه‌وه‌ نه‌یه‌ن دویرمانه‌و بخه‌ن له‌ نه‌ته‌وه‌مان له‌ڕى شیوانن هس مه‌ردمه‌یلمان، ئنجا ئویشن ك نماز ستوین دینه‌، ئیمه‌ى كورده‌یل فه‌یلییش ئویشیم نه‌ته‌وه‌مان ستوین وجوودمانه‌.

 

دى داواكاریم له‌ وه‌رپرسه‌یل بیلنه‌مانه‌ خوه‌مانه‌و، چوینكه‌ گشت چشتیگ ئاشكراسه‌و ئه‌و هه‌مگه‌ قه‌وڵه‌یلدانه‌ وه‌ دروو ده‌رچى و ساڵ وه‌ ساڵ سه‌ختره‌و بوود له‌بانمان وه‌ بوونه‌ى قه‌وڵه‌یل دروودان له‌ وه‌رجه‌ هه‌ڵوژاردنه‌یل و ته‌نیا له‌و رووژه‌یله‌ دوینیمنه‌دان و له‌شوون ئه‌وه‌ دى ناتویه‌نیم بڕه‌سیمنه‌ لادان.

 

ئه‌یه‌سه‌ ساڵ تازه‌ هات و ئه‌زره‌تدار و گه‌شبینیم ك بووده‌ پاشاى ساڵه‌یل و قورتارمان بكا له‌ ده‌روه‌چه‌یلدان و مقه‌یتیمان بكا له‌ غه‌دردان و ئه‌زره‌ت تایبه‌تم ئه‌را كوردیش سه‌روه‌خوه‌ییه‌و ئاشكراكردن ده‌وڵه‌ته‌و ئه‌را گشت عراقیه‌یلیش ئه‌زره‌تم ئه‌وه‌سه‌ ده‌روازه‌ى خه‌یر له‌لیان واز بوود و قورتار بوون له‌و دیكتاتۆریه‌ته‌ ك تواید خوه‌ى زاڵ بكا له‌بان گشت مه‌ردم وه‌ هه‌ر شیواز و ره‌فتاریگ .

 

ئسرا شاواز

 

ج.ا