كه‌مانچه‌ى خه‌م

شفق نيوز

ئشق، ته‌نات ره‌فتار ئاشقانه‌یش جیاس له‌ ره‌فتار خوه‌شه‌ویسى، فره‌جار كه‌سه‌یل دڵسووز  وه‌ خوه‌شه‌ویس دانه‌یم، كه‌سه‌یلیگ ك هه‌واڵمان پرسن جوور خوه‌شه‌ویس نووڕیمنه‌ پیان، ئه‌وانه‌ك له‌ خوه‌شى و ته‌نگیمان ئاماده‌ن خوه‌شه‌ویسمانن، هه‌ر كه‌سیگ  ڕێ خه‌یریگ نیشانمان ئه‌یاد وه‌ خوه‌شه‌ویس خوه‌مان زانیمنه‌ى، وه‌لى وه‌ل ئه‌وه‌یشا ئشق پله‌یگ فره‌ به‌رزتر له‌خوه‌شه‌ویسى داگیركردگه‌ له‌ دڵ ئاشقه‌یل و جارجاریگیش ئه‌و ئشقه‌ مه‌جازیه‌و جاریش هه‌س گشتیه‌و جارجاریگیش راسكانیه‌، وه‌لى جى داخه‌ نه‌ك هه‌ر له‌چه‌رخ كویه‌ن"دێوانه‌و شه‌م یا شرین وفه‌رهاد، یا قه‌یس كوڕ مه‌لوح و له‌یلاى عامرى" تام ئه‌و ئشقه‌ بردنه‌ ژیر خاك و شاد نه‌وین وه‌ ویساڵ یه‌كترى، به‌ڵكوو له‌ى سه‌رده‌میشه‌ هه‌مان ئه‌و داستانه‌یله‌ وجوود دیرن و هه‌ناسه‌ى سه‌رد و حه‌سره‌ت كاڵ له‌لى كه‌فیده‌و.

له‌ داستانیگ خه‌مین و دڵته‌زن ك جه‌لال قادر نویسه‌ر خستگه‌سه‌ى وه‌ر تك قه‌ڵه‌م و دید خوه‌نه‌ر، دیاره‌ داستان ئشق هه‌ر وه‌رده‌وامه‌و قوناغ وه‌ قوناغ وه‌سه‌رهات تر ده‌ركه‌فید. هه‌ر له‌وه‌ر ئه‌وه‌یش بارام و نازه‌نین دو ئاشق پاك و جوان، په‌یام ئشقه‌ راسكانیه‌گه‌ى دڵه‌یلیان ئاشناى یه‌كترى كردن و ئاره‌زوومه‌ند بوینه‌ تام ئه‌و ئشق و خوه‌شه‌ویسى پاك و بێگه‌رده‌ له‌ ژیان هاوسه‌رى بویننه‌و، وه‌لى وه‌ختى قه‌ده‌ر هات و ئه‌و ئشقه‌ له‌یه‌ك ترازان و مزگانى مه‌رگ هاورد بووده‌ داستان دڵته‌زن و دڵته‌نگیگ و شوونه‌وار پڕ له‌ خه‌میگ هیلیده‌ جى.

بارام قامه‌ت جوان و ڕوى خوه‌ش و كه‌مانچه‌ ژه‌ن وه‌ل نازه‌نین خوین شرین و نازار، داستانیگ له‌ ئشق راسكانى دروس كردنه‌ له‌ ناوچه‌ى ره‌حیماواى كه‌ركووك، ئیسه‌ نازه‌نین قژ چه‌رمگى له‌ژێر له‌چگ شاردگه‌سه‌و و نه‌خوه‌ش و خه‌مین له‌بان جى كه‌فتگه‌و كه‌مانچه‌گه‌ى بارام ها ده‌سیه‌و ك وه‌رجه‌ ئه‌وه‌ك بووده‌ پێشمه‌رگه‌و چه‌ك شه‌ره‌ف بكاده‌ شان له‌ ساڵه‌یل خه‌بات ئه‌راى وه‌ ئه‌مانه‌ت هیشته‌ى جى، چوینكه‌ حكوومه‌ت به‌عس فه‌رمان ده‌سگیركردنى دا له‌وه‌ر ئه‌وه‌ك له‌ رێكخستنه‌یل ناوخوه‌یى بوى، ك ئیسه‌یش نازه‌نین گشت جاریگ  بازى وه‌ ته‌له‌یل ئه‌و كه‌مانچه‌ ئه‌كاو مه‌ته‌ڵ ئه‌و ئشق و خوه‌شه‌ویسیه‌ باس ئه‌كاو ئویشید: له‌وه‌ختیگ خوه‌ندكار بویمه‌ له‌ ئاماده‌یى گشت وه‌ختیگ وه‌ناو بازاڕ ره‌حیماوا هاتیامه‌و ئه‌را ماڵ كه‌سیگ نه‌وى نه‌نووڕێده‌ جوانى باڵام چ دوكاندار چ مه‌ردم ره‌وه‌ن، وه‌لى دڵم ته‌نیا كه‌فته‌ لاى بارام كه‌مانچه‌ ژه‌ن ك هه‌ر وه‌ختیگ  وه‌ وه‌رده‌م دوكانه‌گه‌یا گوزه‌ر كردیام ئى كه‌مانچه‌ ئه‌رام ژه‌نیادو منیش ئه‌وقه‌ره‌ دووسى داشتم هه‌ر وتیم بوود رووژیگ وه‌ یه‌ك بڕه‌سیم، وه‌ختیگیش له‌ترس گیانى روى كرده‌ جه‌وه‌ڵ داوا له‌لى كردم بایده‌ خوازمه‌نیم  تا منیش وه‌لیا بچم و بوومه‌ پێشمه‌رگه‌، وه‌لى ئه‌و رازى نه‌وى كه‌مانچه‌گه‌ى خسته‌لام ئه‌را ئه‌وه‌ك وه‌و كه‌مانچه‌ دڵخوه‌شى خوه‌م بیه‌م و وته‌پیم نازه‌نین هه‌ر وه‌ختیگ بویده‌ هاوسه‌رم خوه‌شترین مۆسیقا ئه‌راد ژه‌نم وه‌ى كه‌مانچه‌و هه‌میشه‌ نامه‌ ئه‌رام كلكردیادو منیش چه‌وه‌ڕێ هاتنه‌وه‌ى كردیام، وه‌لى دیاره‌ جارجاریگ ئه‌وه‌ك له‌لاى به‌نه‌ خه‌یاڵه‌ له‌لاى خودا به‌تاڵه‌.

ئه‌وه‌ك مه‌یلم كیشا له‌ بارام ئه‌وه‌ بوى ك له‌ دویره‌و دیامه‌ى كه‌مانچه‌یگ وه‌پى بوى، وه‌ختیگیش نزیكى بویامه‌و له‌ شه‌رما كه‌مانچه‌گه‌ى شاردیاده‌و تا وه‌لایا ڕه‌ى بویام و ئمجا چیاده‌ ناو دوكانه‌گه‌و ده‌س كردیاده‌ ژه‌نین ئاوازه‌یل خوه‌ش، ك سه‌ره‌تا له‌ خوه‌ما له‌وه‌ر ئه‌وه‌ شاریده‌وه‌ى شایه‌ت نه‌زانید بژه‌نیده‌ى، وه‌لى دویاخر ئه‌و ئاوازه‌یله‌ ك بارام ژه‌نیاده‌ى بوینه‌ به‌شیگ له‌ روح و گیانم.

وه‌لى قه‌ده‌ر هات و بارام له‌ پێشمه‌رگایه‌تى مین ته‌قیه‌ پى و شه‌هید بوى و جه‌سه‌ جوانه‌گه‌ى پارچه‌ پارچه‌ بوى. ئیسه‌یش نازه‌نین هه‌میشه‌ كه‌مانچه‌گه‌ى بارام گریده‌ باوه‌ش و ئویشید: ئه‌ى كه‌مانچه‌ خوه‌شه‌ویسه‌گه‌ى ده‌س یارم تائیسه‌یش بوو بارام وه‌پیده‌و مه‌ندگه‌، ئه‌و ئشقه‌ ئیچنه‌ سزنێده‌م مه‌گه‌ر وه‌ نۆته‌یل تۆ بكوشیه‌مه‌و، ئه‌و ئاوازه‌یله‌ ك بارام ئه‌رام ژه‌نیاده‌یان هێمان هه‌ر له‌ گووشه‌یلم زرنگیه‌نه‌و.

جه‌ماڵ ئه‌ركه‌وازى