له‌ نه‌ورووز، له‌ جيای شيوه‌ن، شايی بكه‌ن

شفق نيوز

نه‌ورووزيش ئه‌را كورد له‌ مێژوو له‌يوا بويه‌، ئمجا هه‌ر باريگ هاتويده‌ بان كورد نه‌ورووز هه‌ر كرياگه‌، چوينكه‌ نه‌ورووز خاڵ كز دوشمنه‌يله‌ و له‌ی بوونه‌ كورد وجوود خوه‌ی نيشان ئه‌ياد، چوينكه‌ ئه‌گه‌ر له‌يوا نه‌وياتاد سه‌دام ناونی نه‌نا عه‌يدولشه‌جه‌ره‌.

ئی وه‌هاره‌ يه‌كجاری ته‌ڕه‌، گه‌شته‌يليش جوور ئه‌و شاييه‌سه‌ ك دايگه‌ شه‌هيديگ ئه‌را رووڵه‌گه‌ی ئه‌كاده‌ی، ئی وه‌هاره‌ جه‌سه‌ی نيشتمان سه‌رد وسڕه‌و خوين له‌لی چووڕيه‌يد، ئمجا وه‌هار عاجز مه‌كه‌ن و سه‌وازايی مه‌تورنن، چوينكه‌ نهێنی سه‌ركه‌فتنه‌يل كورد ها له‌وه‌هار، جه‌شنه‌يلمان ها له‌نه‌ورووز، ك وه‌و خاتريشه‌ گشتدان جنگ كوردی بپووشن، له‌ نه‌ورووز په‌ياميگ بيه‌نه‌ دوشمنه‌يل تا دڵيان وه‌پی بته‌قيد.

نه‌ورووز له‌ دياربه‌كر مه‌كه‌ن، دوير مه‌ون له‌ كه‌ركووك و هه‌ولێر و سلێمانی، ئمڕوو چوارده‌ور ئه‌و شاره‌يل كورده‌ پڕ بوينه‌ له‌ گورگ، ئه‌وان ئه‌خوازن نه‌ورووز له‌و شاره‌يله‌ كپ و خامووش بدێ، نه‌ورووز له‌ شيره‌سوار بكه‌ن، بووه‌نه‌ی ئه‌را دۆكان، له‌ولايشه‌و قه‌ره‌هه‌ندير سه‌وز بپووشن، ئاڵای كورده‌يل بووه‌نه‌ بان هه‌يبه‌ت سوڵتان و سه‌فين و ئه‌زمه‌ڕ.

با دوشمنه‌يل و داخ له‌ دڵه‌يل بويننه‌مان، ئيمه‌ له‌ نه‌ورووز فيشتر ئويشيم: خه‌بات ژيانه‌ و سروود هۆكاكه‌ی پێشمه‌رگه‌ له‌ گووشيان زرنگنيمنه‌و، ئيوه‌ پێشمه‌رگه‌ پێشمه‌رگه‌ بخه‌ينه‌ ناو قه‌فه‌سه‌و، ئيمه‌ نه‌ورووز خاڵ كزدان ئازاد ئه‌كه‌يم، ئيوه‌ كۆبانی وه‌ل زه‌ويا ته‌خت بكه‌ين، ئيمه‌ تازه‌يه‌و ئه‌كه‌يم، حه‌ويجه‌ تاڵان بكه‌ين بيباكيم، ته‌ماشای داوده‌مان بكه‌ن، جه‌هان له‌ پشتمان وسياگه‌، ناكه‌فيم، چوينكه‌ ئه‌نفال و كيمياواران و سزانن ئاوايه‌يل و كوشتار وه‌جه‌م ديمنه‌سه‌ چه‌و و له‌لی قورتار بويمن، ئيوه‌يش فه‌وتيه‌ن و قه‌ور له‌ وڵات ئيمه‌ هه‌ڵكه‌نن، چوينكه‌ ئی نيشتمانه‌ قه‌ورسان دوشمنه‌يله‌.

كه‌نعان به‌هادين

ج . أ