كورده‌یل فه‌یلى و خراوترین(له‌ناوبردن وه‌جه‌م)

شفق نيوز

تاریخ سیه‌یگ له‌شوون خوه‌یان هیشتنه‌سه‌جى و ده‌رهه‌ق وه‌ بڕیگ له‌ چین و تایفه‌یل ره‌سه‌ن و خه‌ڵك ئى وڵاته‌ هه‌میشه‌ گورزیان له‌كار بویه‌ ئه‌را سه‌ركوتكردن و داگیركردن هه‌قه‌یلیان و له‌ژیر ره‌فتار غه‌در و دوچه‌وه‌كى هه‌ق سروشتى ژیانیان تفت و تیه‌ڵ كریاگه‌، ك وه‌جووریگ مامڵه‌ وه‌لیانا كریاس هه‌میشه‌ مه‌ردمانیگ له‌لیان ناڕه‌زایى نیشاندانه‌و هاووڵاتى و هه‌ق به‌شدارى له‌ سیاسه‌ت ده‌وڵه‌ت له‌لیان زه‌فت كریاگه‌و جویر بیگانه‌ى له‌وڵات خوه‌یان ته‌ماشا كریانه‌.

بیگومان له‌ى هاوكیشه‌ كورد به‌ش سه‌ره‌كى كه‌فته‌سه‌پى، وه‌رده‌ه‌وام له‌ناو خه‌م و ماڵویرانى و دڵه‌ڕاوه‌كى ژیاگه‌و خاك و نیشتمانى داگیر كریاس، هه‌میشه‌ خواست كورده‌یل وه‌ئاگر وئاسن جواوه‌و دریاگه‌. هه‌ر له‌ زه‌مانه‌ى پاشایه‌تى و له‌وه‌رجه‌ ئه‌و سه‌رده‌میشه‌و تا سه‌رده‌م كوومارى و شووڕش سیه‌ى به‌عسیه‌یل ملله‌ت كورد هه‌ر وه‌ دوشمن ته‌ماشا كریاگه‌ له‌لایه‌ن رژیمه‌یل ده‌سڵاتدار.

له‌وه‌یش زیاتر ئه‌وه‌سه‌ ك هه‌ر وه‌ختیگ هه‌ر حكوومه‌تیگ له‌ى عراقه‌ فشار هاته‌سه‌ بانى له‌ناچارى په‌نا ئه‌را چاره‌سه‌ر كیشه‌ى كورد بردگه‌و قه‌وڵ ژیان هاوبه‌ش و هه‌ق چاره‌نویس داگه‌، وه‌لى له‌وه‌ختى له‌بان پاى خوه‌ى وسیاگه‌و كه‌ره‌سه‌و تفاق سه‌ربازیه‌گه‌ى جى وه‌رگیرى و متمانه‌ بویه‌، یه‌كسه‌ر پشت له‌ كورد كردگه‌و دژى وسیاگه‌و ته‌نانه‌ت جه‌نگ خویناوى وه‌لیا كریاگه‌و هه‌زاران كورد بیتاوان بوینه‌سه‌ قوربان هه‌قه‌یل ڕه‌وایان، یا هه‌ر وه‌ختى پشتگیرى ده‌ركى و گه‌وراهیزه‌یل داشتنه‌ كورد كردنه‌سه‌ ئاگردوى و جه‌نگ بردنه‌سه‌ ده‌رماڵى. وه‌ى جووره‌ تا سه‌رده‌م عراق تازه‌و رمیان دویا رژیم دكتاتۆر به‌عس له‌ 9 نیسان، كورد هه‌میشه‌ به‌شخوریاگ و دویره‌وخریاگ بویه‌ له‌گشت هه‌قیگى. ئه‌یه‌ بیجگه‌ ئه‌وه‌ك خاك كوردستان سه‌رده‌مانیگ له‌ناونى ئمپراتۆریه‌ت عوسمانى و فارسى مه‌یدان جه‌نگ وكیشمه‌كیش بویه‌و گشت ئه‌و ڕویداگه‌یلیشه‌ وه‌ به‌رژه‌وه‌ندى بیگانه‌و زه‌ره‌د ملله‌ت كورد ته‌واو بویه‌. سه‌رده‌م كوشتن و بڕین و له‌ناوبردن وه‌جه‌میش كاره‌ساتیگ تر بوى له‌لاپه‌ڕه‌ى تاریخ شۆڤێنیه‌یل ده‌رهه‌ق وه‌ كوردو كوردستان، دى كیمیاوارن هه‌ڵه‌بجه‌و ئه‌نفال بارزانیه‌یل و بیجگه‌ ئه‌وه‌یش ویرانكردن نزیكه‌ى چوار هه‌زار ئاوایه‌یل كوردنشین و ئاواره‌كردن مه‌ردمه‌گه‌ى گه‌وراترین زوڵم و ناخوه‌شى بوى ئه‌را ملله‌ت سته‌مدیده‌.

وه‌لى خراوترین و سه‌خترین (له‌ناوبردن وه‌جه‌م) له‌تاریخ عراق هاته‌ تویش چینیگ له‌ چینه‌یل كومه‌ڵگا، ك ئه‌ویش چین كورده‌یل فه‌یلى بوى وه‌تایبه‌ت فه‌یلیه‌یل نیشته‌جى شار به‌غداى پایته‌خت.

كورد فه‌یلى هه‌رچه‌نى مه‌ردمانیگ نیشتمانپه‌روه‌ر و ئازاو چه‌ونه‌ترس و ئاشتیخواز و خوه‌یان دویر گرتیان له‌كیشه‌و گرفت، وه‌لى قه‌ده‌ر له‌یوا كرد زوڵم دكتاتۆریه‌ت له‌ئاستیان بى ڕه‌حم بوود و خراوترین له‌ناوبردن و فه‌وتانن وه‌جه‌م باریگه‌ تویشیان ك تائیسه‌یش ئه‌را نموونه‌ ته‌نیا ته‌رمگیش له‌ته‌رم روڵه‌یل بى سه‌روشوونیان نه‌كریاسه‌ دى، ئه‌و خیزانه‌یله‌ فه‌یلیه‌ ك له‌ماڵ خوه‌یان ده‌ركریان و ئاواره‌ى وڵاته‌یل تر كریان، داستان ده‌ركردنیان پڕه‌ له‌مه‌زڵوومیه‌ت و ئه‌و به‌دبه‌ختیه‌ ك هاوریا بانیان وه‌تویش هویچ چینیگ تر له‌ى كوومه‌ڵگایه‌یل عراقه‌ ناتگه‌و نه‌ویه‌ له‌تاریخ. حكوومه‌ت رمیاگ به‌عس پیسترین مامڵه‌ى ئنسانیه‌ت وه‌لیانا كرد، روڵه‌یلیان بیجگه‌ ئه‌وه‌ك ده‌سگیر كردو خسته‌یانه‌ زندانه‌یل مردن وه‌ل ئه‌وه‌یشا له‌تاقیگاى كیمیاوى نه‌ف له‌لیان وه‌رگرت و كردیانه‌ قوربانى مه‌رام پیس خوه‌ى، ئه‌و داڵگ و باوگ و براو خوه‌یشكه‌یلیانیشه‌ ك وه‌ پاى په‌تى و ڕه‌نج بیوه‌ر شه‌و له‌ماڵ ده‌ركریان زوورمیان وه‌بان مین(لوغم)ه‌و بریان وه‌ره‌و ئیران و له‌مه‌رز دانه‌یانه‌ ده‌س چاره‌نویس نادیاره‌و ك ئه‌ویش مه‌رگ كوتوپڕ و هه‌ناسه‌ى سه‌رد بوى.

جه‌ماڵ ئه‌ركه‌وازى