ئايا هاوپه‌يمانێتى شيعه‌و كورد ها هويردان؟

سوبحى ساڵه‌يى

شه‌فه‌ق نيوز/ دوياێ راپه‌ڕين شه‌عبان له‌ ئادار 1991، جارجاريگ گوزاره‌ێ هاوپه‌يمانێى شيعه‌ و كورد ژنه‌فتيايم، وه‌لێ دوياێ ئازادكردن عراقى وه‌ فريه‌يى ژنه‌فتيايمنه‌ێ و له‌ گشت بوونه‌يگيش له‌ هووكاره‌يل ره‌سانن له‌لايه‌ن سياسيه‌يله‌و ژنه‌فتيايمنه‌ێ، ئمجا له‌ڕاسێ ئى هاوپه‌يمانێيه‌ نه‌ڕه‌سيمنه‌وه‌، چه‌ وه‌پى هات؟ كى ئمزا له‌بانى كرد؟ به‌نده‌يلێ چه‌ن؟

 

به‌ره‌ێ كوردستانى وه‌رجه‌ راپه‌رين ئادار وه‌ فره‌يگ، ريككه‌فتوێد وه‌ل حزبه‌يل شيعه‌، وه‌ گووره‌ێ هاوسه‌نگێ"دوشمن دوشمنه‌گه‌م دووسمه‌"، له‌ شوون راپه‌ڕين و دياريكردن ناوچه‌ێ دژه‌ فرين و ناچاركردن سه‌دام له‌بان كيشانه‌وه‌ێ هيزه‌يلى له‌ به‌شيگ له‌ كوردستان، ئه‌و حزبه‌يله‌ ك وه‌ فه‌رمان ئيران كار كرديان وه‌ ته‌مامى هاتنه‌ ناو ناوچه‌يل ئازادكرياگ و باره‌گايه‌يليان واز كردن و په‌يوه‌ندى وه‌ل كورد ئه‌نجام دان و باس له‌ ئيمان و باوه‌ڕ و ئه‌مانه‌ت و راسگوويى و ريزناين له‌ ريككه‌فتن و به‌ڵگه‌يل نان، كورديش له‌لايه‌ن خوه‌يه‌و تيكه‌ڵ بوى ئه‌را كاركردن وه‌ليانا تا مه‌سه‌له‌گه‌ ره‌سيه‌ بڕيگ ريككه‌فتن هه‌ڕه‌مه‌كێ و نه‌زانستن ئى ريككفه‌تنه‌ وه‌ل كه‌سه‌يليگه‌ مه‌زه‌وى و تونڕه‌و و جياوازن له‌ليان له‌ ديد و ئامانج و سه‌خت و ناجوورن.

 

دوياێ رميان سه‌داميش وه‌بى داناين ميكانيزمه‌يليگ درياريكرياگ و بى زه‌مانه‌تيگ نويسرياێ و كه‌فيل كرياێ له‌ سێيم لايه‌نه‌و ك بتويه‌نيد مقه‌يه‌تى پرووسه‌گه‌ له‌ لاداين بكا و بى وجوود مه‌هانه‌يگ ته‌مام ئه‌را بنياتناين له‌نوو ده‌وڵه‌ت و سوپا و دامه‌زرانن حكومه‌ت له‌ به‌غدا و نويسانن ده‌ستوور، كورد چيه‌ ناو ئه‌و شه‌راكه‌ت و ئه‌و وازيه‌ ك ئاكامه‌گه‌ێ نه‌زانستن، هوير له‌وه‌ نه‌كردن ك به‌شداره‌يل له‌تى هيزه‌يليگ يه‌كنه‌گر و ئستغلالى و غرور ئه‌گريده‌يان له‌ وه‌ختيگ هيزداره‌و بوون و ته‌كڕه‌وى ئه‌كه‌ن له‌ بڕيار هه‌ناى بوونه‌ ده‌سڵاتدار.

 

وه‌ل ئه‌و شه‌راكه‌تيشه‌ گوزاره‌ێ هاوپه‌يمانى شيعه‌و كورد ته‌عميم كرياو فريه‌جار فه‌زڵێ كريا له‌بان برايه‌تى كورد و عه‌ره‌ب، وه‌لێ له‌لايگ تره‌و دوياى په‌ياكردن نفوز و بته‌وبوين، نورى مالكى خوه‌ى وه‌ به‌رز نيشاندا وه‌ل وازيكردن وه‌ چاره‌نويس عراق و ملله‌ته‌گه‌ێ و هه‌وڵ فه‌رزكردن هيز دا و له‌بان سياسه‌ت ئستغلال كار كردياد و زووان هه‌ڕه‌شه‌ و ئابڵوقه‌ و ورسگكردن و فشار و نيشانداين بازوو و ئستفزازكرد وه‌ ئحساس كورده‌يل و حكومه‌ت هه‌رێم وه‌تايبه‌ت له‌ سه‌رده‌م دويه‌مين حكومه‌تى، ته‌نانه‌ت قه‌يرانه‌يل بويچگيش گه‌وراوه‌ بوينن و بويانه‌ تووپيگ ئاگرين. ئمجا گوزاره‌ێ هاوپه‌يمانێتى شيعه‌و كورد ده‌سكرده‌ خوه‌يكيشانه‌وه‌ له‌ مه‌يدان و كاره‌گه‌ ره‌سيه‌ ئه‌وه‌ له‌لايه‌ن بڕيگ جه‌ماعه‌ت جيگير له‌ناو ناوچه‌ێ سه‌وز وه‌ كورد بويشن مه‌ينه‌ت له‌بان عراق و نه‌وه‌يل يه‌زيد ك حوسه‌ين سه‌ربڕين و رووڵه‌يل سه‌ڵاحه‌دين ك ده‌وڵه‌ت فاتمى له‌ مسر رمانن و جارجاريگيش وه‌ رووڵه‌يل ديو ك خودا په‌رده‌ له‌بانيان لادا.

 

دوياێ ئه‌وه‌گ تونڕه‌وێ كوور و پابه‌ندێ و دويرگرتن له‌ دانايى رويدا له‌ هه‌ڵويسته‌يل و وتار و بڕياره‌يل له‌لايه‌ن سوپاێ ره‌سانن ك له‌لايه‌ن مالكيه‌و ته‌مويل كريان و دوياێ ئه‌وه‌گ زوورم ماده‌يل ده‌ستوور شكان ك نويسايمنه‌ێ و ده‌نگ له‌بانى دايم له‌ هه‌وه‌جه‌يل قوناغ، دى به‌يان و لێدوانه‌يليگ هه‌ڕه‌شه‌كارى و ئاگرين ژنه‌فتيايم ك له‌تى داواى ده‌ركردن كورد له‌ به‌غداو باقى پاريزگايه‌يل تر عراقى كرديان وه‌ل ده‌سگرتن له‌بان ماڵ و موڵك و داگيركارى و نيشتمانيان و سه‌ربڕينيان، وه‌ل ئه‌وه‌يشا ده‌نگ كراهيه‌ت و ته‌پڵ جه‌نگ و ئاينده‌ى خراو نه‌وه‌يل ژنه‌فتيايم و ئاشكرا بوى ك گوزاره‌ێ هاوپه‌يمانێتى شيعه‌و كورد و شه‌ركه‌تيش دروو بوێ و ئه‌و ده‌وڵه‌ته‌ ك ئامانجمانه‌ مه‌حاڵه‌ له‌لايان، هه‌ر وه‌و خاتريشه‌ مه‌سه‌له‌گه‌ خواست بوى بگه‌رديمنه‌ شوون گشت ده‌روازه‌يليگ سياسى و ئابوورى له‌ چوارچيوه‌ێ هوير مه‌نتقى له‌ گشت ئه‌گه‌ره‌يليگ، ئمجا ملله‌ت كوردستان ئه‌وه‌ ديه‌و ك خاسترين ريگه‌ بڕيار رويكردنه‌ وه‌ره‌و راپرسێ وجيايى له‌ مه‌ردمانيگ شه‌ريكيمان ناخوازن.

سوبحى ساڵه‌يى