شه‌ونشینى بویه‌ نه‌زر دراماى بیگانه‌

شفق نيوز

حاشاكردن و  كه‌فته‌ وه‌ر گه‌رده‌لویل كاولكه‌ر، ئمجا مه‌سه‌له‌ى ره‌حمداریه‌تى و هامشوو ناونى قه‌وم و خیش دیاره‌ ماڵئاوایى كردو شوونه‌وارى له‌ناو كه‌س وكار و دووس و براده‌ر نه‌مه‌ند، هه‌ڵبه‌ته‌ یه‌یش مه‌مه‌ره‌یل فره‌یگ دیرێدو ئیمه‌ له‌ى باوه‌ته‌ ته‌نیا باس مه‌سه‌له‌ى شه‌ونشینى ناونى خیش كه‌یم ك شوونه‌وار خاسیگ وه‌پیه‌و نه‌مه‌ند مه‌گه‌ر له‌سه‌د یه‌كیگ په‌یڕه‌وى بكا.

 

زه‌مانه‌ى ئه‌وساى كورده‌واریمان پڕ بوى له‌ شه‌ونشینى و قسه‌ى خوه‌ش، وه‌لى ئمڕوو چه‌واشه‌ى ئه‌و رووژگاره‌یله‌سه‌و هه‌ر ئیواره‌ هات قه‌پى ره‌حمه‌ت به‌سیه‌ێدو كه‌س له‌كه‌س نه‌یرێد خه‌وه‌ر، له‌ى باوه‌تیشه‌و پرسیار له‌هه‌ر كه‌سیگ كه‌ید هه‌ر ئویشێد" وه‌ڵڵا برا شه‌كه‌تیم!" یا "دێر تیه‌مه‌و له‌كار"، وه‌لى باوه‌ڕ بكه‌ن مه‌سه‌له‌گه‌ له‌یره‌ نییه‌، مه‌سه‌له‌ ها له‌وره‌ ك شه‌ونشینى بویه‌ نه‌زر دراماو فیلمه‌یل بیگانه‌ ك بوینه‌سه‌ مایه‌ى سسه‌وبوین شه‌ونشینى و هامشووكردن وه‌تایبه‌ت ئه‌و درامایه‌یل هه‌ڵه‌وگه‌ردیاگه‌ ئه‌را زووانه‌یل تر ك ئیچنه‌ فه‌رزى له‌بان خوه‌یان كردنه‌ ئه‌گه‌ر هه‌ڵقه‌یگى نه‌وینن چمانى لایگ له‌ بووسانیان خاره‌ت كریاگه‌و هه‌ر ئاخ و حه‌سره‌ت كاڵ ئه‌ڕاى هه‌ڵكیشن!!

 

ئمڕوو ژن وپیاو له‌وه‌رده‌م شاشه‌ى ته‌له‌فزیۆن چنه‌ وه‌پیان هاتگه‌ ك ئى زنجیره‌ فیلمه‌ ده‌ن ده‌م ئه‌وه‌كه‌و، تا دوكوت شه‌وار نیشنه‌ دیار فیلمه‌یل توركى و دوبلاژكریاگ، هه‌ر له‌وه‌ر ئه‌وه‌یش مه‌گه‌ر ساڵ ومانگیگ جاریگ شه‌ونشینییگ ئه‌نجام بیه‌ن له‌ناونى خوه‌یان و خیشه‌یلیان، له‌ڕاسى ئى حاڵه‌ته‌ كاریگه‌رى خراویگیش ئه‌ناده‌ بان مناڵه‌یل و رووڵه‌یل ئاینده‌و شایه‌ت رووژیگ بیه‌ێد مه‌سه‌له‌ى شه‌ونشینى وه‌ته‌واوى له‌ لیست ئنسانیه‌ت و ره‌حمداریه‌تى بكوشیه‌ێده‌و، دویاخریش ئه‌یاكه‌ دڵسووزى ئه‌را ئه‌و قه‌ومه‌گه‌ى نه‌یرێدو ژیانیگ دویرگرى له‌لى په‌یا بوود.

 

گشت كه‌سیگ له‌ئیمه‌ بیجگه‌ ئیسه‌ بایه‌سه‌ هویر له‌ بانانیش بكه‌یم، ئیمه‌ى ئاده‌میزاد به‌سیایمه‌سه‌ یه‌كه‌وه‌و زامه‌ته‌ ده‌سوه‌ردار یه‌كترى بویمن، چوینكه‌ له‌خوه‌شى و ته‌نگى هه‌وه‌جه‌ وه‌ یه‌كترى دیریم، هه‌ر له‌وه‌ر ئه‌وه‌یش بایه‌سه‌ ته‌قالا بكه‌یم و په‌یوه‌ندیه‌یلمان بته‌وتره‌و بكه‌یم و زیاتر مه‌یل ئه‌را یه‌كترى داشتویمن و ئامووژگارى مناڵه‌یلمان بكه‌یم دویرگر نه‌ون و هه‌میشه‌ هامشوو داشتوون وه‌ل قه‌وم و خیش خوه‌یان، چوینكه‌ وه‌ نه‌وین په‌یوه‌ندى و سووزدارى دریغى گه‌ورایگ له‌ سفه‌ت ئنسانى و خوه‌شه‌ویسى و قه‌ومایه‌تى كه‌یم.

 

جه‌ماڵ ئه‌ركه‌وازى