ژن كورد له‌ چه‌پكه‌ گوڵ تاریخ

شفق نيوز

گوڵ ئومید نه‌ته‌وه‌یگ چروو داو ریشگى له‌دڵ تاریخ دانا، ئمجا نه‌ته‌وه‌ى كورد چه‌نه‌ها سه‌ده‌ وه‌رجه‌ زایین له‌ پاكترین و خاسترین خاك خوه‌شه‌ویسى و ئاسووده‌یى پڕ له‌پیت و به‌ره‌كه‌ت خوداوه‌ند ژیا.

 

له‌هه‌مان وه‌خت وه‌ل ئه‌و خاكه‌ تیكه‌ڵ بوى. دى له‌وه‌ر هه‌وه‌جه‌كردن سروشتى له‌خوارگ خوه‌رئاواى میزۆپۆتامیا پیشكه‌فتن كلتوورى و دینى و شارستانیه‌ت و شیوه‌ى وه‌به‌رهاوردن له‌ئه‌ورۆپا زویتر و فیشتر په‌یا بوى و په‌ره‌ سه‌ند، ته‌نانه‌ت كلتوور به‌رز هاته‌ وجوود، ملله‌ت كوردیش یه‌كیگ بوى له‌و ملله‌ته‌یله‌ ك به‌شدار بوین له‌و پێشكه‌فتنه‌و هه‌ر له‌وه‌رجه‌ له‌داڵگبوین مه‌سیح كورد ره‌سیه‌ پێشكه‌فتن گه‌ورا، ئمجا ئه‌گه‌ر ئه‌و هه‌مگه‌ په‌لامارو كاولكارى داگیركه‌ره‌یله‌ نه‌ویاتاد، ئه‌وه‌ ملله‌ت كورد كلتوور ده‌وڵه‌مه‌نتر داشت و بار ئابووریشى له‌ ئمڕوو فێشتر و پێشكه‌فتگ تر بویاد.

 

وه‌لى وه‌ل ئه‌و هه‌مگه‌ كاولكارى و به‌شبه‌شه‌وكردن كوردستانه‌ ملله‌ت كورد تویه‌نست مقه‌یه‌تى چشت فره‌یگ له‌ هه‌ڵسووكه‌فت و كلتووره‌گه‌ى بكا له‌و رووژگاره‌ ژیان كورده‌وارى و ژیان و پایه‌ى ژن كوردستان وه‌ره‌و خراوى چیه‌، ئمجا وه‌ ده‌رچگن خوه‌ر ئسلام له‌نیمچه‌ دویرگه‌ى عه‌ره‌بیه‌و دى رووشناییگ له‌بان جه‌هان دیارداو ئاڵشتكارى خاسیگ هاته‌ بان كومه‌ڵگاو ژیان ژن، ئه‌ویش له‌وه‌ختیگ هه‌ق ژنه‌یل دیارى كریاو جوور یاسایگ نویسریاو له‌ ئاكام ئه‌وه‌یش جموجویل بار چالاكى ژنه‌یل به‌رزه‌و كریاو له‌ كوردستانیش ئه‌و ئاڵشتكاریه‌ له‌باوه‌ت پایه‌ى ژنه‌و بته‌وتر بوى، چوینكه‌ په‌یوه‌ندى كوومه‌ڵایه‌تى ئه‌وساى ملله‌ت كورد پێشكه‌فتگ تر بوى له‌و ملله‌ته‌یل ده‌وروه‌ر نیمچه‌ دویرگه‌ى عه‌ره‌بیه‌و ژن و پیاوى یه‌كسان تر بوین.

 

 

ئمجا ئه‌گه‌ر بچیمنه‌ قویلایى تاریخ ملله‌ت كورد، ئه‌وه‌ ئه‌ڕامان ده‌ركه‌فێد ك ژن كورد له‌سه‌رده‌م كویه‌ن بوار و ده‌رفه‌ت فیشتر داشتگه‌و تویه‌نستگه‌ له‌گشت لایه‌نیگ ژیانه‌و وه‌رپرسیاریه‌تى بگرێده‌ مل، ك وه‌ل ئه‌وه‌یشا ژن وه‌ل پێشكه‌فتن كومه‌ڵگاو هرز ئاده‌میزاد كه‌مه‌ كه‌مه‌ هه‌ناسه‌یگ هه‌ڵمژى و ته‌ماشاى دونیا كردو له‌ ته‌لبه‌ن ده‌رچى.

 

بیجگه‌ ئه‌وه‌یش ژن كورد له‌وه‌ر قورتاربوین له‌ چه‌وسیان و ئه‌را ئه‌وه‌ك بڕه‌سنه‌ هه‌قه‌یل خوه‌یان هه‌ر بایه‌سه‌ ته‌قالا و خه‌بات بكه‌ن، ئمجا نموونه‌ى ئه‌و ژنه‌یله‌ ك په‌یوه‌س بوین وه‌ خاك و نیشتمان خوه‌یان له‌ڕوى پێشكه‌فتنه‌و جوور"حه‌بسه‌خان نه‌قیب" و "قه‌ده‌م خه‌یر" و...هتد، ك ته‌نیا وه‌ سه‌رڕشته‌ى خوه‌یان و باوه‌ڕ بته‌ویان تویه‌نستن بوونه‌ هێز چاره‌سه‌ر ئه‌را خزمه‌ت ئه‌و خاك و نیشتمانه‌ ك له‌بانى ژیه‌یم، چوینكه‌ ئایدۆلۆژیاى ژن بى خاك نیه‌ود و ته‌نانه‌ت مه‌سه‌له‌ى خاك و به‌رهه‌م و كشتوكاڵیش وه‌ هونه‌ر ژنه‌و به‌نه‌.

 

ماناى ئه‌وه‌سه‌ یه‌كه‌م بنه‌ماى ئایدۆلۆژیاى ژن ژیانكردنه‌ له‌بان ئه‌و نیشتمانه‌ ك له‌تى له‌داڵگ بویه‌. هه‌ر له‌وه‌ر ئه‌وه‌یش بایه‌سه‌ ژن گشت ژیان خوه‌ى جوور خه‌باتكه‌ریگ مه‌زه‌نه‌ بكاو ناسنامه‌ى خوه‌ى گوم نه‌كا، بایه‌سه‌ ژن خه‌باتكه‌ر خاسیگ بوودو هونه‌ر و كلتوور و جوانى تایبه‌تمه‌ند سروشت خوه‌ى فه‌رامووش نه‌كا هه‌ر له‌كار بگر تا جوانى فكرى و گفتوگووكردن و رووشنایى روحى ك وه‌ جووریگ په‌یوه‌س بوود وه‌ بنه‌ماى خوه‌ى، هه‌ر له‌وه‌ر ئه‌وه‌یش خه‌بات ژن له‌تاریخ ئه‌را قورتاركردن ملله‌ته‌گه‌مان له‌چه‌وسیان چشت و ئه‌رك خواستیگ بویه‌.

 

كه‌مال دوڵپه‌موویى

 

ج.ا