وه‌ره‌و ئنسافكردن كورده‌یل فه‌یلى

شفق نيوز

 

ئه‌و تاوانه‌یله‌ تاوانه‌یلیگ بوى پڕ له‌ كوشتن و كووچ وه‌پیكردن زووره‌ملى و زه‌فتكردن ماڵ و موڵك و به‌ڵگه‌نامه‌و ئاواره‌كردن پڕ له‌ خوسه‌و كینه‌ت.

جاده‌و كویچه‌یل به‌غداو شوون و شاره‌یل تر فره‌یگ له‌ ناوڕاس و باشوور عراق ئاشناى ئاده‌میزاد كورد فه‌یلى بوین ك خه‌باتكه‌ر و ئازاو چالاكه‌ له‌ بنیاتناین نیشتمان وه‌ ئه‌ره‌ق تیوڵ و هیز باوه‌ڕ و ئیراده‌، وه‌لى دویاخریش ئه‌وه‌ بوى له‌و نیشتمانه‌ ده‌ركریا ك بنیاتى ناو شوون ژیان و مه‌ڵوه‌نى بوى، هه‌ر له‌وه‌ر ئه‌وه‌یش له‌وه‌ختیگ داروده‌سه‌ى رژیم وه‌رین وه‌ پیسترین شیواز مامڵه‌ وه‌لیانا كردن مایه‌ى ژان و گیرسن و به‌دبه‌ختى بوى و ئه‌قڵ باوه‌ڕ وه‌پى نه‌یاشت ئه‌وه‌نه‌ كینه‌ت له‌و مه‌ردمه‌ بگرید ك شه‌كه‌ت بوى له‌ى وڵاته‌ ك بنیاتى ناگه‌و مینه‌ى تیكه‌ى نان له‌تى كردیاد وه‌گشت كه‌رامه‌تیگ ئه‌را گوزران مناڵ و خیزانى.

گام یه‌كه‌م گام خاسیگ بوى پڕ له‌وژدان له‌وه‌ختیگ دگان وه‌ تاوانه‌یلیان نریا جوور له‌ناوبردن وه‌جه‌م"جینۆساید"، وه‌لى ئى گامه‌ وه‌ته‌نیا به‌س نیه‌ ئه‌را ریگه‌ى دویر ودریژه‌ وه‌خاتر هاوردنه‌وه‌ى گشت ئه‌و هه‌قه‌یله‌ ك ئه‌و تاوانباره‌یله‌ له‌لیان زه‌فتى كردن و ئه‌و تاوانه‌یله‌ ك هاته‌ تویشیان و هه‌ر بایه‌سه‌ كیشه‌یلیان چاره‌سه‌ر بكریه‌ید و شوونه‌وار خراو لاوریه‌ید له‌بان ئى پیكهاته‌.

بیگومان ئى كرده‌وه‌یلیشه‌ بایه‌سه‌ وه‌ گامه‌یل جیاوازیگ جیوه‌جى بكریه‌ید ئه‌را ساڕیژكردن زه‌خم ده‌روینى و په‌روه‌رده‌یى و رووشنهویرى ئى پیكهاته‌ى خه‌باتكه‌ره‌و قه‌ره‌بوو گشت چشتیگ ئه‌رایان بكریه‌ید تا وه‌ڕاسى هس بكه‌ن ك له‌نیشتمان خوه‌یان ژیه‌ن و گرینگى وه‌پیان دریه‌ید.

ئیمه‌ گشتمان وه‌رپرسیم له‌بان لاوردن شوونه‌وار تاوان، ك ئه‌ویش وه‌گووره‌ى گشت ره‌فتاریگ ئدارى وه‌ل قوربانیه‌یل و وازكردن گشت قاپیه‌یلیگ له‌وه‌رده‌میان ئه‌را هاوردنه‌وه‌ى ئه‌و هه‌قه‌یل ماددى و مه‌عنه‌ویه‌ ك رژیم دیكتاتۆرى وه‌بى ئه‌خلاقانه‌و بى وژدان له‌لیان زه‌فتى كرد.

وه‌ل ئه‌وه‌یشا ئویشیم حاڵه‌ت كورد فه‌یلى شایسته‌ى كۆنگره‌و سیمینار و چالاكیه‌یل مه‌ردمى فیشتره‌و هه‌وه‌جه‌ى فره‌یگ دیرید وه‌ى جووره‌ چالاكیه‌یله‌ وه‌خاتر هاوردنه‌وه‌ى هه‌قه‌ی و زه‌رده‌خنه‌ ئه‌را بان لیوه‌یل نه‌وه‌یل ئیسه‌ى كورده‌یل فه‌یلى تا له‌ناو یادگاریه‌یگ تیه‌ڵ نه‌ژیه‌ن.

فه‌وزى ئه‌تروشى

ج . أ