كورده‌یل فه‌یلى

شفق نيوز

 

ئه‌و فیلمه‌ وه‌حشیه‌ت و خوینمژى رژیم ده‌رخست له‌ مامڵه‌كردنى وه‌ل ئى پیكهاته‌ى گرینگه‌، به‌ڵكوو شیوازه‌یل جوراوجوور به‌عس نیشان دیاد له‌ ره‌فتارى وه‌ل فه‌یلیه‌یل وه‌گشت دڵڕه‌قییگ له‌ كوشتن و كووچ وه‌پیكردن ئى پیكهاته‌.

 

ئنجا جوور ئه‌وه‌ك وزاره‌ت هه‌قه‌یل ئاده‌میزاد ها له‌هویر سازكردن ئى جووره‌ رى و ڕه‌سمه‌یلیگ ، بایه‌س بوى ده‌زگایه‌یل تر حكوومییش له‌ى جووره‌ چالاكیه‌ ئه‌نجام بیاتان ك وه‌ وه‌حشیه‌ت رژیم دیكتاكۆرى و سیاسه‌ت پاكسازى ره‌گه‌زى دریه‌یده‌ قه‌ڵه‌ك ده‌رهه‌ق ئى پیكهاته‌ى ره‌سه‌نه‌، ك رژیم ئسپات ئه‌وه‌ كرد جوور یه‌ك زوڵم له‌ گشت روڵه‌یل فه‌یلى كردگه‌و كه‌سیگ له‌و تاوانه‌یله‌ قورتار نه‌ویه‌ له‌لیان.

 

رى وڕه‌سمه‌گه‌ى وزاره‌ت هه‌قه‌یل ئاده‌میزاد چشته‌یل جووراوجوور له‌تى نمایش كریا له‌ناونى فیلمه‌یل به‌ڵگه‌یى و ره‌سم فۆتۆگرافى و خوه‌ندنه‌وه‌ى شعر و دابه‌شكردن كتاوه‌یل ئاشناكردن مه‌ردم وه‌و هه‌مگه‌ تاوانه‌یله‌ ك رژیم وه‌رین هاورده‌ى كار ده‌رهه‌ق كورده‌یل فه‌یلى.

 

كورده‌یل فه‌یلى ئازایه‌تى و سه‌بر فره‌یگ داشتن له‌بان ئه‌و هه‌مگه‌ سزایه‌یله‌و ئه‌و مه‌ینه‌تیه‌یل كووچ وه‌پیكردن و مه‌سه‌له‌ى سه‌ندنه‌وه‌ى ره‌گه‌زنامه‌ى عراقى و گرتن روڵه‌یل جایه‌ڵ جوانیان و له‌سێداره‌داین فیشتر له‌ 18 هه‌زار شه‌هیدو ده‌ركردن فیشتر له‌ نیم ملیۆن هاووڵاتى كورد فه‌یلى.

 

ئمڕوو ئه‌وان وه‌ل باقى پیكهاته‌یل تر عراقى دوباره‌ هه‌وڵ بنیاتاناین نیشتمانیان ده‌ن و به‌شدارى كه‌ن له‌ ژیان سیاسى له‌ڕى وجوود فره‌یگ له‌ ژن و پیاگه‌یل كاندیدكریاگیان و به‌شداریكردنیان له‌ هه‌ڵوژاردنه‌یل ئه‌نجوومه‌ن پاریزگایه‌یل.

 

ئنجا وه‌ل ئه‌و گشته‌ كاره‌ساته‌ ك رژیم به‌عس هاورده‌ى تویش كورده‌یل فه‌یلى، جى داخه‌ ك دوینیم كه‌سه‌یلیگ  داواى هاتنه‌وه‌ى به‌عس گوڕ وه‌گووڕ كه‌ن و هه‌وڵ ئه‌وه‌ ده‌ن له‌ هه‌ڵوژاردنه‌یل ئاینده‌ به‌شدار بوون، دى نازانیم ئامانج ئه‌وانه‌ چه‌س ك داواى هاتنه‌وه‌ى تاوانباره‌یل و ترۆریسته‌یل كه‌ن و داواى لاوردن له‌سێداره‌داین تاوانباره‌یل كه‌ن له‌ ریكخریاگ قاعیده‌ى ترۆریستى وه‌ مه‌هانه‌ى هه‌قه‌یل ئاده‌میزاد، ك ئایا چ وژدانیگ رازیه‌ وه‌ ئه‌وه‌ك تا دویه‌كه‌ خوین مه‌ردم بیتاوان رشانگه‌و ئمڕوو ئازاد بكریه‌ید و هه‌واڵه‌ى دادگا نه‌ود!.

 

بیگومان ئه‌وه‌ك وه‌رگرى له‌ بكوشه‌یل دویه‌كه‌ ئه‌كا، هه‌ر ئه‌وانه‌ن كرده‌وه‌یل قاعیده‌ بیتاوان كه‌ن و خوازیار ئه‌وه‌نه‌ ئاژاوه‌ دروس بوود له‌ى وڵاته‌، وه‌لى ئه‌وانه‌ك خاوه‌ن وژدان پاكن بایه‌سه‌ داواى لاوردن حوكم له‌سێداره‌داین ئه‌و بكوشه‌یل ملله‌ت عراقه‌ نه‌كه‌ن و نه‌یلن ئازاد بكریه‌ن.

 

عه‌لى وه‌حید عه‌بودى

ج . أ