مێژوو دوباره‌ نا‌دێ!

شفق نيوز

 

مه‌رام له‌ى قسه‌یله‌، باسكردن هاتن و بار په‌نابه‌ره‌یل هه‌زاران كورد خوه‌رئاواس ئه‌را هه‌رێم كوردستان، ك پیشبینى كریه‌ید رێژه‌یان به‌رزه‌و بوود ئه‌را 250هه‌زار كه‌س.

ئه‌یه‌ رویداگیگه‌ له‌مێژوو نویسریه‌ید، ئیمه‌ى حكوومه‌ت و هاووڵاتیه‌یل هه‌رێم كوردستان تویه‌نیم ئیچنه‌ كاریگ بكه‌یم ك نه‌وه‌یل ئاینده‌مان شانازى وه‌پیمانه‌و بكه‌ن و هه‌ر له‌هه‌مان وه‌خت تویه‌نیمیش وه‌شیوه‌یگ ره‌فتار بكه‌یم دویاخر شه‌رمه‌زارى باریمنه‌ بان خوه‌مان.

ئیسه‌ حكوومه‌ت تویه‌نێد به‌شیگ له‌ خه‌رج گشتى كه‌مه‌و بكا ئه‌را هاوكارى هه‌ڵه‌په‌ڵه‌ى په‌نابه‌ره‌یل له‌لایگ و، له‌لایگ تریشه‌و تویه‌نێد نه‌ف وه‌ربگرێد له‌ دامه‌زریاگه‌یل نه‌ته‌وه‌یل یه‌كگرتگ له‌ هه‌رێم كوردستان و عراق ئه‌را ره‌سانن ده‌سمه‌یه‌ت هه‌ڵه‌په‌ڵه‌و شیوه‌ى دابه‌شكردن و نیشته‌جیكردنیان، ك ئه‌وان له‌و رویه‌و ئه‌زموون وه‌رفراوانیگ دیرن. وه‌ل ئه‌وه‌یشا هه‌رێم كوردستانیش ك به‌شیگه‌ له‌ حكوومه‌ت فیدراڵى عراق و چه‌ن وه‌زیریگ دیرێد له‌و حكوومه‌ته‌، تویه‌نن نه‌خش خاسیگ داشتوون له‌ قه‌ناعه‌تكردن وه‌ ئه‌نجوومه‌ن وه‌زیره‌یل عراق ئه‌را تایبه‌تكردن بودجه‌یگ خواست ئه‌را په‌نابه‌ره‌یل. یه‌یش له‌وه‌ختیگ ك وه‌گووره‌ى زانیاریه‌یل وڵاته‌یل كه‌نداو ڕێ نایه‌ن یارمه‌تیه‌یلیان باێد ئه‌را هه‌رێم و هه‌ر له‌ ڕێ نه‌ته‌وه‌یل یه‌كگرتگه‌و ئاراسته‌ى كه‌نه‌ په‌نابه‌ره‌یل سورى، له‌ ئوردن و لوبنان و جارجاریگیش له‌ توركیایش وه‌ مه‌هانه‌ى ئه‌وه‌ك عراق وڵاتیگ ده‌وڵه‌مه‌نه‌و تویه‌نێد ده‌سمه‌یه‌ت خواست ئه‌را ئه‌و ئاواره‌یله‌ دابین بكا، نووڕید مه‌سه‌له‌گه‌ جى گرنگى نییه‌ له‌لایان. بێجگه‌ ئه‌وه‌یش عراق وزاره‌تیگ تایبه‌ت له‌ى رویه‌و دیرێ و خوه‌شبه‌ختانه‌یش وه‌زیره‌گه‌ى كورده‌و تویه‌نێد به‌شێگ له‌و رۆتینه‌ نه‌یلید ئه‌را ئه‌وه‌ك ده‌سمه‌یه‌ت هه‌ڵه‌په‌ڵه‌یگ بڕه‌سێده‌ ئه‌و كورده‌یله‌ ك په‌نا بردنه‌سه‌ وه‌ر خاك هه‌رێم كوردستان.

هه‌ر له‌یریشه‌و پێشنیار یه‌یش ئه‌كه‌یم ك ده‌زگایه‌یل وه‌رپرس بتویه‌نن سه‌ندووق هاوكارى له‌ گشت شاره‌یل دابنه‌ن ئه‌را گرده‌وكردن پویل له‌جیاى خوه‌راك ئه‌رایان، چوینكه‌ خوه‌راكه‌گه‌ شایه‌ت خراو بوود له‌وه‌ر گه‌رمى، وه‌لى پویله‌گه‌ نه‌ف له‌لى وه‌رگرن ئمجا ئه‌و برایه‌یل خوه‌رئاوا ك ئیسه‌ هانه‌ هه‌رێم كوردستان ئمڕوو یا سوو هه‌ر گله‌وخوه‌ن ئه‌را زێدو ماواى خوه‌یان، ئمجا ئیمه‌یش وه‌ ملله‌ت و حكوومه‌ته‌و بیلا مێژوو خاسیگ ده‌رهه‌قیان تومار بكه‌یم.

عه‌دنان سه‌ید حسێن

ج . أ