هاوسه‌رگيری ناچاری

شفق نيوز

ئمڕوو ژن له‌ كوومه‌ڵگا دياره‌ تا راده‌يگ ئازادی له‌ هه‌ڵوژانن هاوسه‌ر ئه‌را رووڵه‌گه‌ی ديريد، وه‌لی جی داخه‌ ئه‌و ئازاديه‌ له‌بان شيواز چه‌فت و نادروسيگ ئه‌يه‌ريده‌ كار و ئاده‌ميزاد تر له‌تی ئه‌كاده‌ قوربانی و باج ئه‌و ره‌فتار و هه‌ڵسووكه‌فت ناڕه‌وا.

له‌ی سه‌رده‌مه‌ ك له‌تی ژيه‌يم دياره‌ جايه‌ڵ جوانه‌يل تا راده‌يگ ماف ئه‌وه‌ ديرن وه‌ گووره‌ی ئه‌قڵ و په‌سه‌نكردن بچنه‌ ناو ژيان هاوسه‌رگيری و بتويه‌نن هاوسه‌ر ژيان خوه‌يان هه‌ڵوژنن وه‌ تايبه‌ت ك رووژ وه‌ ڕووژ پيشكه‌فتن فيشتر ته‌نگ وه‌ نه‌ريته‌يل زوڵم و سته‌م هه‌ڵچنيدو له‌وه‌رچه‌و گرتن هوير وڕای كوڕ و دويه‌ت له‌ی جووره‌ پرووسه‌يگ خاڵ بنه‌ڕه‌تيگه‌ ئه‌را بنه‌مای دروسبوين ژيانيگ پڕ ئاسووده‌يی و به‌خته‌وه‌ری له‌ ئاينده‌.

له‌يرا ناچاركردن دويه‌ت وكوڕ ئه‌را هه‌ڵوژانن يه‌كتری مانای دويره‌وخستن دادگه‌ری و نزيكه‌وكردن گرفت و ئه‌نگه‌مه‌ی چه‌وه‌ڕيكرياگه‌ له‌ژيان ئه‌و هاوسه‌رگيری ناچاريه‌ ك شايه‌ت له‌وه‌ر مه‌رام تايبه‌تيگ ئه‌نجام درياگه‌، چوينكه‌ له‌يرا ماف هه‌ڵوژانن راسكانی دزرياگه‌و له‌ هه‌مان وه‌خت وه‌ ناچاری بڕيار وه‌پی درياگه‌ ئه‌را رازيبوين وه‌ ژيانيگ ك دڵ په‌سه‌نی نه‌كردگه‌و جار له‌يوا هه‌س باوگ يا دايگ له‌وه‌ر به‌رژه‌وه‌ندی بنه‌ماڵه‌يی پشت له‌ نه‌خش دويه‌ته‌گه‌ يا كوڕه‌گه‌يان ئه‌كه‌ن، ك جی داخه‌ تائيسه‌يش ئی مه‌سه‌له‌ی له‌لای خيزانه‌يليگ ريڕه‌و ئاسايی خوه‌یوه‌رنه‌گرتگه‌و له‌ئاكام ئی مامڵه‌و هه‌ڵسووكه‌فتيشه‌ جگه‌رگووشه‌يليان ئه‌كه‌نه‌ ئاگردوی مه‌رام چه‌سپياگ و به‌رژه‌وه‌نديه‌يل تايبه‌تيان.

له‌ی جووره‌ی حاڵه‌ته‌يليگ دوينيم جارجاريگ بڕيگ له‌و پرووسه‌يله‌ دويای ماره‌بڕين له‌وه‌ر هه‌ر هووكاريگ بوود وه‌رده‌وام نادێ و ئه‌و كوڕ و دويه‌ته‌ وه‌رجه‌ ئه‌وه‌ك بوونه‌ ژن و شوی و بچنه‌ ناو ژيان هاوسه‌ريه‌و، جيايی و ته‌ڵاقداين ئه‌كه‌فێده‌ ناونيان، ئمجا له‌ی حاڵه‌ته‌ تير و تانه‌و قسه‌ی مه‌ردم په‌يا ئه‌دێ و چه‌نه‌ها پرسيار جوراوجوور ئه‌كريه‌يدو چه‌نه‌ها گومان له‌لای مه‌ردم په‌يا ئه‌دێ و له‌وانه‌يش: ئايا چوين له‌ يه‌كتری جياوه‌ بوين؟ ئه‌ی سه‌ره‌تا ئه‌راچه‌ ئی كاره‌ ئه‌نجام دريا؟ ئه‌ی ئه‌راچه‌ زوور له‌ليان كريا مادام دڵيان وه‌ يه‌كتريه‌و نه‌وی؟ ئه‌و دويه‌ته‌ كی دی بخوازيده‌؟ دی چ خيزانيگ دويه‌ت خوه‌ی بيه‌يده‌ ئه‌و كوڕه‌؟ ئه‌يانه‌و چه‌نه‌ها پرسيار و قسه‌يل تر جوور تانه‌و ناونيتگ ئه‌كه‌فێده‌ بان زووان ژنه‌يل قه‌وم و خيش و هاوساو ناسياره‌يل و فريه‌جاريش قسه‌ی فيشتريش ئه‌رايان هه‌ڵواسن و ناوزڕ ئه‌كريه‌ن و له‌ هه‌مان وه‌خت وه‌ چه‌و سووكيشه‌و ته‌ماشای ئه‌و كوڕ و دويه‌تيشه‌ ئه‌كريه‌يد جوور ئه‌وه‌ك تاوان گه‌ورايگ ئه‌نجام داوين، وه‌لی له‌ڕاسی مه‌سه‌له‌گه‌ له‌يوا نيه‌و ره‌فتار ناوه‌جی باوگ و داڵگ له‌ هه‌ڵوژانن هاوسه‌ر ئه‌را رووڵه‌گه‌يان و ناچاركردنی ئی هه‌مگه‌ شك و گومانه‌ دروس ئه‌كاو چاره‌نويس ئه‌و دويه‌ت و كوڕه‌ له‌كه‌دار ئه‌كه‌ن.

ره‌نجده‌ر ئاواره‌