ره‌فتار خاسد نیشان بیه‌، نه‌ك زینه‌ت دونیا

شفق نيوز

مایه‌ى تیرو تانه‌ى مه‌ردمان فره‌یگ و له‌هه‌مان وه‌خت له‌ڕوى داب و نه‌ریتیشه‌و مه‌رز ئه‌خلاق و ڕه‌سه‌نایه‌تییش شكانگه‌و چیه‌سه‌ چوارچیوه‌ى نه‌فامى و بى شه‌رمى. گشتمان زانیم ك دارایى و ده‌وڵه‌مه‌نى لاى گشت كه‌سیگ جوور یه‌ك نیه‌، فره‌جاریش خوداوه‌ند به‌خشنده‌ ماڵ ده‌یگه‌ كه‌سه‌یلیگ، وه‌لى نووڕید وه‌ قه‌درى نیه‌زانن و ره‌فتار ناپوخت و ناپه‌سه‌ن له‌بانیه‌و كه‌ن.

پیشینه‌یل وتنه‌(ماڵ دونیا چرك ده‌سه‌)، ماناى ئه‌وه‌سه‌ شایه‌ت ئه‌و ماڵه‌ ئمڕوو دیریده‌ى سوو نه‌یاشتویده‌ى، چوینكه‌ خودا خوه‌ى ده‌یگ و خوه‌ى به‌یگ، ئمجا ئه‌گه‌ر هات و داپید شایه‌ت تاقیده‌و بكاو ئه‌گه‌ریش وه‌پید نه‌یا ناشوكرى مه‌كه‌. چوینكه‌ گشتمان سه‌فه‌ر دویر و دریژیگ ها وه‌رده‌ممان و بایه‌سه‌ ماڵئاوایى بكه‌یم و ماڵ و موڵك و داراییمان گشتى بیلیمنه‌جى و ڕوى بكه‌یمنه‌ قاپى هه‌ق.

فره‌ وه‌داخه‌و ئمڕوو له‌ناو كومه‌ڵگا چشته‌یل ئه‌ڵاجه‌وییگ كه‌فیگه‌ وه‌رچه‌و جویر دیارده‌یگ ناشرین كومه‌ڵایه‌تى، وه‌تایبه‌ت له‌لاى هه‌ردوگ ڕه‌گه‌ز ژن وپیاو، ئمجا ئه‌و دیارده‌ زیاتر له‌لاى ژنه‌یل كریه‌یگه‌دى، ئه‌ڕا نموونه‌: دوینید ژنه‌ ده‌وڵه‌مه‌نیگ خودا وه‌پیداگ سه‌رتاپاى لاشه‌ى گشتى خشه‌ى تیه‌یگ له‌ته‌ڵاو مجه‌وهه‌رات، وه‌لى ره‌فتار و هه‌ڵسووكه‌فتى شانازیكردن یا ته‌باهیه‌ له‌وه‌رچه‌و ژنه‌یل تر نه‌دار و فه‌قیر، ك هه‌میشه‌ له‌وه‌رچه‌و ژنه‌ فه‌قیر زینه‌ت نیشان ده‌یگ و باڵ له‌لى ئه‌ڵماڵیگ تا ده‌سوینكه‌یل ده‌سى بوینن، یا وه‌ گوشخاره‌ى ته‌ڵاو ملوانك گه‌ردنى هه‌ناسه‌ى سه‌رد وه‌ ژنه‌یل تر ده‌وروه‌رى هه‌ڵكیشیگ  و ئامانجى ئه‌وه‌سه‌ له‌دونیا جوانى خوه‌ى وه‌و ته‌ڵاو مجه‌وهه‌راته‌ نیشان به‌یگ  و له‌هه‌مان وه‌خت وه‌چه‌و نزمه‌و ته‌ماشاى ژنه‌یل فه‌قیر و سیه‌چاره‌ بكا. بیگومان به‌ش فره‌یگ له‌ دویه‌ت و ژنه‌یل ئاره‌زوو سه‌ندن و له‌وه‌ركردن ته‌ڵاو جه‌واهیرات كه‌ن، ك یه‌یش هه‌ق سروشتى خوه‌یانه‌و چشت ئاساییگه‌ ك ژن حه‌زه‌و خود ڕازاننه‌وه‌و خود جوانكردن بوود، چوینكه‌ ئه‌وانه‌یش به‌شیگن له‌ ئكسسوارات جوانى و سروشت ژنیش له‌جوانى و سووز و نازگیه‌و سه‌رچه‌وه‌ گرتگه‌و له‌ هه‌مان وه‌خت شه‌رعیش ڕى وه‌ ژنه‌یل داگه‌ ته‌ڵا  بپووشن، وه‌لى ئایا ئه‌و ڕه‌فتاره‌ ته‌نیا هه‌ر مه‌به‌س له‌ جوانكاریه‌؟

ژن له‌یوا هه‌س له‌ بوونه‌یل جووراو جوور وه‌ك ده‌زویرانى یا سویركردن یا ماره‌بڕین و چشته‌یل تر نزیكه‌ى نیم كیلۆ ته‌ڵا ها قه‌یان، وه‌ڕاى من فره‌یگ له‌ى ره‌فتاره‌یله‌ ته‌نیا له‌وه‌ر خود ده‌رخستن و نازكردنه‌ له‌بان مه‌ردم و هویچ تر، وه‌نا نیم كیلۆ ته‌ڵا ئه‌ڕا چه‌یه‌ له‌یوا له‌خوه‌ى بكا؟

هه‌ر وه‌ بوونه‌ى ئى ره‌فتار و هه‌ڵسووكه‌فت ناپه‌سه‌نه‌ ك ئه‌نجام دریه‌یگ له‌لایه‌ن به‌ش فره‌یگ له‌ ژنه‌یل، بیجگه‌ ئه‌وه‌ك كه‌سایه‌تى خوه‌یان وه‌پى له‌ده‌سده‌ن له‌هه‌مان وه‌خت ئه‌ومید و ئاره‌زوو ژنه‌یل فه‌قیر و نه‌داریش وه‌پى له‌ده‌سده‌ن، چوینكه‌ ژن له‌یوا هه‌س له‌ساده‌یى و به‌دبه‌ختى خوه‌ى وه‌ختى چه‌وى كه‌فیگه‌ ئه‌و ناز ونعمه‌ته‌ له‌ قه‌ى یه‌كیگ تر له‌ هاوڕه‌گه‌زه‌یلى دى سه‌ر دونیا له‌لى نیشیگه‌ یه‌ك و هویچ گرنگى یا ئه‌همیه‌تیگ  ئه‌را ژیان خوه‌ى نیه‌نه‌یگ و گشت دونیا له‌وه‌رچه‌وى تیه‌ریكه‌و بوود و ترویسكه‌یگ رووشنایى له‌تى نیه‌وینیگ، ئمجا ئه‌و ژنه‌ تا وه‌ فه‌قیرى بمینیگ هه‌ر هه‌ناسه‌و ئاخ گه‌رم هه‌ڵكیشیگ. هه‌ر له‌وه‌ر ئه‌وه‌یش ئامووژگارى یا نه‌سیحه‌تمان ئه‌را دویه‌ت و ژنه‌یل دارنده‌ ئه‌وه‌سه‌ ره‌فتار خاسیان نیشان بیه‌ن نه‌ك زینه‌ت دونیا.

 

 

جه‌ماڵ ئه‌ركه‌وازى