دۆسیه‌ى كورده‌یل فه‌یلى بى شوون ونوین كریاى... پرسیار و نادیارى

شفق نيوز

كریان و زوورمیان له‌ جایڵ و جوانه‌یلن، بویه‌سه‌ مایه‌ى پرسیاركردن له‌باوه‌ت چاره‌نویسیان و شوونه‌یل خاك كردنیان، ئه‌گه‌ر پاشمه‌نى ته‌رمه‌یلیان مه‌نویده‌وه‌ وه‌گووره‌ى قسه‌یل كه‌سوكاره‌یلیان، له‌ شوون ئه‌وه‌گ چه‌ن زانیارییگ كه‌فتیه‌سه‌ ده‌سیان ك زوورمیان كریانه‌سه‌ قوربانى تاقیه‌وكردن ئه‌و چه‌كه‌یل كیمیاویه‌ ك ڕژیم وه‌رین ئاماده‌ى كردیاد ئه‌را جه‌نگه‌یلى دژ وه‌ نه‌یاره‌یلى و دژ وه‌ وڵاته‌یل هاوسا، ئه‌وه‌ بیجگه‌ ئه‌و زانیاریه‌یله‌ ك ئه‌وه‌ ئاشكراكردن ك فره‌ له‌ى جایڵ و جوانه‌یله‌ كلكریان ئه‌را به‌ره‌یل جه‌نگ عێراق و ئیران؛ ئه‌را وه‌كارهاوردنیان جویر قه‌ڵغان یا سپه‌ڕیگ به‌شه‌رى و له‌ورا تووپخانه‌ى لایه‌ن وه‌رانوه‌ر كوتكوتیان كرد، یا خریانه‌ ناو ئه‌و كێڵگه‌یل مین یا حقول ئه‌لغام ك له‌ناوبه‌ین هه‌ردوگ سوپاى عێراق و ئیران بوین.

نوێنه‌ریگ وه‌رین ئه‌نجوومه‌ن نوێنه‌ره‌یل له‌بان ئه‌وه‌ جه‌ختكرد ك :"ڕژیم وه‌رین له‌و زوڵم و سته‌م و زووره‌ ك دژ وه‌ ملله‌ت عیراق ئه‌نجامى دا، به‌ش شێر كرده‌ خه‌ڵات كورده‌یل فه‌یلى".

عامر سامر له‌ په‌یوه‌ندییگى وه‌ل ماڵپه‌ڕ شه‌فه‌ق وت:"ڕیكخریایه‌یل ناوده‌وڵه‌تى، جوور خاچ قرمز و مانگ قرمز، شماره‌یل گه‌ورایگ له‌و كورده‌یل فه‌یلیه‌ ئاشكرا كرد ك ڕژیم وه‌رین ده‌ریان كرد و ده‌یان هه‌زار له‌ ڕووڵه‌یلیان وه‌ره‌و شوونه‌یل نادیار برد، و تا ئیسه‌یش هویچ لایه‌نیگ ڕه‌سمى نیه‌زانید چاره‌نویسیان چه‌س".

عامر سامر گوزارش داخ ئه‌را ئه‌وه‌ خوارد ك هویچ هه‌وڵ و ته‌قه‌لایگ ناوده‌وڵه‌تى و ناوخوه‌یى نیه‌ ئه‌را ئاشكراكردن چاره‌نویس ڕووڵه‌یل كورد فه‌یلى  بى  شوون ونوینكریاى.

له‌ هه‌مان وه‌خت، وه‌زیر ماف ئاده‌میزاد له‌ حكوومه‌ت عیراق ئه‌وه‌ ئاشكراكرد ك زیاتر له‌ یه‌ك میلیۆن كه‌س بى سه‌روشوون هه‌س ك له‌ سه‌رده‌م ڕژیم وه‌رینه‌و تا ئیسه‌یش چاره‌نویسیان نادیاره‌.

مه‌حه‌مه‌د شیاع سودانى، له‌ ئان دیدار برۆسیلاڤ تۆماسۆڤ سه‌فیر كۆمار چیك له‌ عیراق و سیرل بۆبلانك جیگر نوێنه‌رایه‌تى چیك له‌ به‌غدا، وتیه‌ ك هیمان دونیا وه‌شیوه‌یگ ته‌واو باخه‌وه‌ر نیه‌ له‌و هه‌مكه‌ تاوانه‌یله‌ ك ڕژیم سه‌دام ئه‌نجامى دایه‌ و گشت قانوونه‌یل و په‌یماننامه‌یل و دابونه‌ریته‌یل ناوده‌وڵه‌تى شكانیه‌.

سودانى ئومید ئه‌وه‌یشه‌ خواستیه‌ ك عیراق له‌ پسپۆرى و كارزانى چیك سوود وه‌ربگرید له‌ دۆكیمه‌نتكردن ئه‌و ته‌عه‌دایه‌یله‌، وه‌تایبه‌تى له‌ شوون ڕه‌د بوین 8 ساڵ وه‌بان ڕمیان ڕژیم وه‌رین، چوینكه‌ تا ئى وه‌خته‌ هه‌وڵ و ته‌قه‌لا له‌ مه‌یدان دۆكیمه‌نت كردن فره‌ گه‌ورا نه‌ویه‌ وه‌گووره‌ى قسه‌یلى.

نوێنه‌ریگ وه‌رین په‌رله‌مان عیراق ئه‌وه‌ ئاشكراكرد ك :" شماره‌ى گه‌ورایگ ده‌ركریاى و كووچوه‌پیكریاى هه‌س ك هیمان ئه‌را عیراق نه‌هاتنه‌سه‌و، و یه‌یشه‌ وه‌شوونكه‌فتن چاره‌نویس ڕووڵه‌یلیان دویاخه‌ید ك له‌وه‌خت خوه‌ى داموده‌زگایه‌یل ئاسایشى ڕژیم وه‌رین ده‌سگیر و زندانییان كرد".

سامیه‌ عه‌زیز له‌ په‌یوه‌ندییگى وه‌ل ماڵپه‌ڕ شه‌فه‌ق له‌ى باوه‌ته‌ ئویشى:"وه‌زاره‌ت ماف ئاده‌میزاد زویتر هه‌وڵ و ته‌قه‌لاى فره‌یگ دا ئه‌را ئاماده‌كردن تاقیگه‌یل (دى – ئێن – ئێن) ئه‌را تاقیه‌وكردن ناسنامه‌ى ئه‌و ته‌رمه‌یله‌ ك له‌ قه‌ورسانه‌یل ده‌سه‌جه‌مى دوینریانه‌سه‌و، له‌وه‌ختیگ ك هه‌وڵ و ته‌قه‌لاى به‌ختیار ئه‌مین وه‌زیر وه‌رین ماف ئاده‌میزاد سه‌رنه‌كه‌فت، له‌وه‌ر نه‌وین ئیجووره‌ تاقیگه‌یلیگ".

له‌لاى خوه‌یه‌و سه‌رۆك كوومه‌ڵه‌ى كورده‌یل فه‌یلى ئه‌وه‌ ڕووشنه‌وكرد ك كوومه‌ڵه‌گه‌ى :"دویاى هه‌وڵ و ته‌قه‌لاى گه‌ورایگ تویه‌نست ئه‌وه‌ ئسپات بكه‌ید ك 4990 ناو كورد فه‌یلى بى شوون ونوین كریاى هه‌س، ئه‌ویش له‌ سایه‌ى نه‌وین كوومه‌ك حكوومى".

ماهر ڕه‌شید زیاتریش ئویشى:"ڕژیم وه‌رین تاكتیكه‌یل و فه‌نه‌یل كه‌موینه‌ وه‌كار هاورد ئه‌را گومه‌وكردن ده‌یان هه‌زار له‌ جایڵ و جوانه‌یل كورد فه‌یلى تا ئه‌و ڕاده‌ ك فره‌ سه‌خته‌ ئه‌را پسپۆره‌یل ك بتویه‌نن ئمڕوو چاره‌نویسیان ئاشكرا بكه‌ن و شوون خاك كردنیان بویننه‌و".

ن: كفاح هادى

ت: ماجد سوره‌مێرى