دێر یا زوێ ، خوه‌ر كوردستان ، هه‌ر ده‌ركه‌فێگ

شفق نيوز

چوێن مه‌زار باوه‌ گورزێن ك یه‌كێگ له‌ مه‌زاره‌یل كوێه‌نه‌ێ كاكه‌ییه‌یله‌ نزیكیان بوى و هه‌ردوگیان ده‌س نماز گردن و له‌وه‌ر ئه‌وه‌گ كورده‌گه‌ زوان عه‌ره‌بى نه‌زانستیارد ، شوانه‌ عه‌ره‌به‌گه‌ داوا كرد هه‌ر كامیان وه‌زوان خوه‌ێ قه‌سه‌م بخوه‌ێگ و كابراێ عه‌ره‌ب ووت: (بابا كورزدین ئنته‌ تدری و ئانى ئه‌درى ، سه‌خڵه‌ مال هه‌ل كوردى فی به‌تن جدری).

كورده‌گه‌ ك زوان عه‌ره‌بى نه‌زانست له‌ خوه‌یا شوانه‌ عه‌ره‌به‌گه‌ قه‌سه‌م خوارد ، عه‌ره‌به‌گه‌یش ئه‌وقه‌ره‌ خه‌نست ك ئه‌سر له‌ چه‌وه‌یلێ ڕێ گرد ، كورده‌گه‌ له‌ خوه‌یا عه‌ره‌به‌گه‌ له‌ خه‌جاڵه‌تى ئه‌وه‌گ تومه‌ت دزى دریاسه‌ لێ ده‌س نا گیری و یه‌كسه‌ر ووته‌ پێ : به‌سه‌ به‌سه‌ نه‌گیر باێه‌د كه‌فاره‌ بێه‌م له‌وه‌ر ئه‌وه‌گ تومه‌ت ناڕه‌وا دامه‌ لید ، وه‌لى یه‌ك چشت مه‌نگه‌ بوێشمه‌ پید ك له‌ێره‌و دویا په‌سه‌گانم وه‌ل هه‌نه‌یل تنا تێكه‌ڵ نیه‌كه‌م تا ئشكال پێش ناێگ.

ئمڕویش دیارده‌ى كوشتن ئاێم له‌ بان ئاین و مه‌زه‌و له‌ێ وڵاته‌ دوێنیم و له‌ خوه‌ش به‌ختیمانه‌ هێزه‌یلمان وه‌ل لایه‌نه‌یلتر تێكه‌ڵ نین و هه‌ر چه‌ن زیاتر له‌ هه‌زار و په‌نج سه‌د پێشمه‌رگه‌مان شه‌هید بوێه‌ ، وه‌لێ گیسكه‌گه‌مان نه‌دزریاس و شك و گومانیش له‌ كه‌س نه‌یریم و جور كورد بڕیاردایمه‌ ، داعشه‌یل له‌ خاكمان ده‌ربكه‌یم ته‌نانه‌ت ئه‌گه‌ر كوردیش له‌ ناوێان بووگ و مه‌قه‌ێه‌تى ئه‌نباره‌یل نه‌فت بكه‌ێم ، له‌وه‌ختێگ ئه‌وانه‌گ چینه‌ ناو سه‌لاحدین مه‌قه‌ێه‌تیان نه‌كردن و ، دوژمنیش چین یا نه‌ته‌وه‌ێ تایبه‌تێگ نێه‌كه‌ێگه‌ ئامانج ، به‌ڵكم هه‌ر عراقیێگ كه‌ێگه‌ ئامانج ك جنگ نوو بكه‌ێگه‌ وه‌ر و جور گشت به‌نده‌یل خودا له‌ عه‌ید شادی بكه‌ێگ.
به‌ڵێ دوژمن له‌ پشت كوێه‌یل موسل و له‌ لاێ وڵاتێگه‌وه‌ ك وه‌ناو بانگه‌ له‌ دوژمنى كردن وه‌ل عراق وعراقیه‌یل كه‌مین داناس تا ته‌ڕو وشك وه‌ێه‌كه‌وه‌ بسوزنێگ ، هه‌لبه‌ته‌ ئه‌و دوژمنه‌ ده‌ره‌قه‌ت ملله‌ت كورد نیه‌تێه‌ى ، له‌وه‌ر ئه‌وه‌گ دوژمنه‌یل دوێه‌كه‌ى ملله‌ته‌گه‌مان ك هه‌مان دوژمنه‌یل ئمڕون گشت شیوه‌یل كوشتن و بڕین دژ و مناڵه‌یل و ژنه‌یل كوردستان وه‌كار گردن و غازه‌یل كوشه‌نده‌ێ كیمیاوى وه‌كار هاوردن و سه‌دان هه‌زار بێ تاوان زینگ وه‌چاڵ كردن وه‌لێ هه‌رگز ئێ ملله‌ته‌ سه‌ر ئه‌ڕا دوژمنه‌یل نه‌چه‌مان.  


ئه‌گه‌ر ئیمه‌ ئمڕو داواى جیاوه‌ كردن ڕیه‌ن خوه‌مان كه‌یم جور شوانه‌ كورده‌گه‌ێ سه‌ره‌تاى باسه‌گه‌مان ، ئه‌ێه‌ له‌ ڕخ و ترسمان نییه‌  ، له‌وه‌ر ئه‌وه‌گ شك و گومان وه‌كه‌س نه‌یریم ، به‌ڵكم دونیا شك له‌ حكومه‌ت ناوه‌ندی كه‌ێگ (مه‌به‌ست ته‌نیا حكومه‌ت عبادى نییه‌).
له‌ێ ڕوێه‌وه‌ لوجنه‌ێ په‌یوه‌ندیه‌ خارجیه‌گان ئه‌مریكا مه‌رج ئه‌ڕا كل كردن چه‌ك و ته‌قه‌مه‌نى ئه‌ڕا عراقیه‌یل داناس و مه‌رجه‌گه‌ێ ئه‌وه‌سه‌ ئه‌و كومه‌كه‌یل سه‌ربازیه‌ براو به‌ش بكرێه‌ێ و هه‌ركام له‌ پیكهاته‌یل عه‌ره‌ب شیعه‌ و سوننه‌ 35% بوه‌ێگ و كوردیش وه‌سوننه‌ و شیعه‌وه‌ ئه‌ڕای سابت بوێه‌ ك لاێه‌ن وه‌راوه‌ر له‌ زوڵم وستم و خاره‌ت و چه‌پاو كردن جیاوازى نێه‌كه‌ێگ و گشت وه‌یه‌ك چه‌و ته‌ماشا كه‌ێگ ، له‌وه‌ر ئه‌وه‌گ ئه‌وان عه‌شایرن و هویچ كامیان به‌زه‌یى وه‌ئه‌وه‌كه‌یتر نیه‌تیه‌ی و ڕازی نیین و ئاماده‌یش نیین شه‌راكه‌ته‌گه‌ بشێونیم و هه‌ر كه‌ به‌ش خوه‌ێ جیاوه‌ بكه‌ێگ ، هه‌رچه‌ن ك كوردستان نیه‌توێه‌نى وه‌ شه‌و و ڕوژێگ له‌و شه‌راكه‌ته‌ جیاوه‌ بووگ و ئه‌گه‌ریش بووگ زه‌ره‌د ئه‌ڕا هویچ پیكهاته‌ێگ عراقی نه‌ێرێ.

سه‌لاح مندلاوى

ج ك