ئه‌ڕاچه‌ وتنه مانی نه‌ويد؟!!!

شفق نيوز

كاريگ ئه‌نجام داويگ و دويای ته‌واوكردن كاره‌گه‌ی هه‌ر له‌وه‌ر ئه‌و شه‌كه‌تيه‌ ك وه‌پيه‌وه‌ كيشاسه‌ی جوير قه‌درزانينيگ ئويشنه‌پی مانی نه‌ويد ، ئی مسته‌ڵه‌حيشه‌ له‌ناو كوومه‌ڵگای كورده‌واری خوه‌مان فره‌ وه‌كار تيه‌يگ ، وه‌لی له‌يوا دياره‌ وشه‌ی (مانی) ئيمه‌ له‌شيوه‌زوان خوه‌مان راستر وه‌كار تيه‌ريمنه‌ی ، چوينكه‌ له‌شيوه‌زوانه‌يل تر كوردی هه‌مان وشه‌و هه‌مان مه‌به‌سه‌ وه‌لی جاروباريگ پيت يا حه‌رفيگ ئه‌رای زيای كرياگه‌ جوير ئه‌وه‌ك وه‌ سۆرانی (ماندو) و هه‌ولێرييش كردنه‌سه‌ی (ماندی) ، وه‌لی هه‌ر هه‌مان وشه‌گه‌س .

وه‌گووره‌ی سه‌رچه‌وه‌ی فه‌رهه‌نگ (ئاڤێستا) ك باس بويچگيگ له‌ی ‌باوه‌ته‌وه‌ كردگه‌و له‌تی ئه‌وه‌ ئاشكرا كرياس ك ئی وشه‌ی (مانی)يه‌ په‌يوه‌ندی وه‌ (مانی) په‌يامبه‌ره‌وه‌ ديريگ و له‌وه‌ختی كه‌سيگ ئويشيگه‌ كه‌سيگ تر مانی نه‌ويد وه‌مه‌عنای ئه‌وه‌سه‌ ك جوير مانی په‌يامبه‌ر وه‌پيد نايگ ، بيگومان يه‌يش په‌يوه‌ندی وه‌و رويداگه‌يل تيه‌ڵ و ناخوه‌شه‌وه‌ ديريگ ك هاته‌سه‌ بان مانی په‌يامبه‌ر و بڕيگ له‌سه‌رچه‌وه‌يل ئويشن گوايا خه‌ڵك هه‌مه‌دان رووژهه‌ڵات كوردستان بويه‌و قه‌يريگ له‌سه‌رچه‌وه‌يليش وتنه‌ خه‌ڵك شار ماردين باكوور كوردستانه‌ ك ئه‌و سه‌رده‌مه‌ پايته‌خت سلوكيه‌يل بويه‌ ، مانی له‌ساڵ ٢١٥ی زايينی له‌دايگ بويه‌و له‌ساڵ ٢٧٣ی زايينی له‌ئاوايی(شاپوور) له‌بان ده‌روازه‌ی شاره‌گه‌ وه‌ناڕه‌حه‌تی و ئازار فره‌يگه‌وه‌ ملی كرياسه‌ په‌ته‌وه‌و درياگه‌ له‌سێداره‌ . مانی له‌بنه‌ماڵه‌يگ خانه‌دان و ناودار بويه‌و هه‌ر له‌وه‌ختيگ مناڵ بويه‌ هووكاره‌ی زانست ئه‌و سه‌رده‌مه‌ بويه‌و شيه‌وكردنه‌يل فراوانيگيش داشتگه‌ له‌بان دينه‌يل جياواز و دوياخريش وه‌ختی عومری بويه‌سه‌ ٢٤ ساڵان خوه‌ی وه‌ك په‌يامهاوه‌ريگ ئاشنا كردگه‌و سه‌ره‌تايش له‌وڵات دوچه‌مانه‌وه‌ ده‌س كرده‌سه‌ په‌خشكردن دينه‌گه‌ی و (شاپوور) پاشا سه‌ره‌تا قه‌دروحورمه‌ت فره‌يگ له‌دينه‌گه‌ی ناو مه‌ردميش لايه‌نگيری خوه‌يان ئه‌رای نيشاندان و پشتگيری له‌لی كردن ، وه‌لی دوياخر پاشا پشت له‌لی كردو كه‌فته‌ دژايه‌تيكردنی و له‌وڵات قاوی دا ، دی مانی روی كرده‌سه‌ هندستان و چين و شوونه‌يل تر ، وه‌ختيگيش (شاپوور شا) مردگه‌ له‌ساڵ ٢٧٢ زايينی هاته‌سه‌وه‌ ئه‌را وڵات و (هورمز) جينشين شاپوور حورمه‌ت فره‌يگ له‌لی ناگه‌و دوباره‌ ده‌س كرده‌سه‌ په‌خشكردن دينه‌گه‌ی ، وه‌لی له‌شوون ماوه‌يگ (به‌هرام يه‌كم) هاته‌ بان ته‌خت ده‌سڵات و باڵبه‌سی كردو فه‌رمان له‌سێداره‌داينی دا . ئمجا بڕيگ سه‌رچه‌وه‌ ئويشن گوايا مانی وه‌سه‌ره‌وه‌ نرياسه‌ چاڵ تا ناوقه‌ی ، وه‌لی بڕيگ سه‌رچه‌وه‌ی تر ئويشن وه‌چه‌واشه‌وه‌ گوايا نيمه‌ی لاشه‌ی له‌ قوله‌وه‌ نرياسه‌ چاڵ . مانی بيجگه‌ ئه‌وه‌يش خه‌ريگ په‌خشكردن دينه‌گه‌ی بويه‌ ، وه‌لی هه‌مان وه‌خت ده‌سنويس و كتاوه‌يل فره‌يگيش نويساو ئه‌را مه‌ردمه‌يل نه‌خوه‌نه‌واريش ئه‌و ئامووژگاری و نويساننه‌يله‌ وه‌ك ره‌سم دروس كردياگ ، هه‌ر له‌وه‌ر ئه‌وه‌يش وه‌ (مانی نيگاركيش) يا (ره‌سام)يش وه‌ناوبانگه‌ ، وه‌لی دين مانی تا سه‌رده‌م هاتن خه‌ليفه‌يل به‌غدا وه‌رده‌وام بويه‌و دوياخر له‌بان ده‌س خه‌ليفه‌يل فه‌توای لاوردن و نه‌هيشتنی درياگه‌ .

تويه‌نيم بويشيم ئی ئه‌رای چوين و رويداگه‌ شايه‌تيده‌ر ئه‌وه‌سه‌ ئه‌را وه‌كارهاوردن مسته‌ڵح (مانی نه‌ويد) يا جوير مانی وه‌پيد نايگ ، چوينكه‌ ئه‌و جوير ئه‌وه‌ك ئشاره‌ت وه‌پی كرديم وه‌ئازار وشكه‌نجه‌ی فره‌يگه‌وه‌ مردگه‌و هه‌ر له‌وه‌ر ئه‌وه‌يش له‌وه‌رخاتر سه‌ڵامه‌تی و نه‌وينه‌چه‌و ئه‌و جووره‌ كاره‌ساتيگ مه‌سه‌له‌ی مانی په‌يامبه‌ر جوير نموونه‌يگ هه‌ڵوژرياگه‌ ئه‌را سه‌ره‌وخه‌يری ئاده‌ميزاد .