كوردو پایه‌ هه‌رێمایه‌تیه‌گه‌ى

شفق نيوز

 

له‌ى رویه‌و كورد تا راده‌ى فریه‌یگ په‌یوه‌نداره‌ وه‌ى ئه‌گه‌ره‌و بایه‌سه‌ ناوماڵ خوه‌ى ریك بخه‌ید، وه‌نا چه‌رخ زه‌مانه‌ ده‌وار ئاره‌زووه‌یلى تا ده‌یه‌ها ساڵ تر شیونیده‌ یه‌كا، ئنجا دو هووكار هه‌ن ك فریه‌ وه‌ئاشكرا بوونه‌ رینیشانده‌ر كورد وه‌خاتر ده‌سه‌وه‌ركردن پرووژه‌یگ وه‌ئامانج ده‌سكه‌فت فیشتر له‌و ئاڵشتكاریه‌یله‌ ك له‌بان ئاست هه‌رێمایه‌تى و ناوده‌وڵه‌تى رویده‌ن، یه‌كه‌میان ئاڵشتكاریه‌یل دونیاى عه‌ره‌بیه‌ وه‌تایبه‌ت سوریا ك به‌شیگ له‌ خاك كوردستان وه‌ زوور لكیاسه‌ پیه‌وه‌و ئیسه‌ هانه‌ خه‌م ئاشكراكردن ئداره‌ى كوردى له‌ورا، دویه‌میش پیكهاتگه‌ له‌ ده‌ركه‌فتن جوگرافیاى كوردى و خاك كوردستان جوور شماره‌یگ تازه‌ له‌بان نه‌خشه‌ى جه‌هان وزه‌ له‌وه‌ر وجوود ریژه‌ى فریه‌یگ له‌ نه‌فت و غاز سروشتى له‌ هه‌رێم كوردستان. ئنجا ئى هه‌ردوگ هووكاره‌ له‌ به‌رژه‌وه‌ندى لایه‌ن كوردیه‌ ئه‌گه‌ر وه‌ته‌واوى له‌ دید نیشتمانیه‌و ته‌ماشا بكریه‌ن، ئه‌گه‌ریش مه‌سه‌له‌گه‌ فیشتر بخه‌یمنه‌ وه‌ر دقه‌تكردن، ئه‌وه‌ له‌بان ئاست چوار وڵات هه‌رێمایه‌تییش ئاكامه‌یلى ئه‌را كورد تاڕاده‌یگ دڵخوه‌شكه‌رن.

هه‌رێم كوردستان په‌یوه‌ندى خاسیگ وه‌ل توركیا دیرید، راسه‌ په‌یوه‌ندیه‌گه‌ فیشتر لایه‌نیگ ئابوورى و بازرگانى گرته‌سه‌و، وه‌لى وه‌ گووره‌ى ئه‌ڕاى چوین له‌ زانستى سیاسه‌ت په‌یوه‌ندى بازرگانییش چووده‌ چوارچیوه‌ى په‌یوه‌ندیه‌یل ناوده‌وڵه‌تى و بووده‌ هه‌ڵگر فۆرمیگ سیاسى، ئنجا هویچ دو وڵاتیگ ناتویه‌نن په‌یوه‌ندى بازرگانى و ئابوورى ناونیان وه‌ره‌و نوا بووه‌ن ئه‌گه‌ر په‌یوه‌ندیه‌یل سیاسى ناونیان خاس نه‌ود، یه‌یش شایه‌ت ده‌رفه‌تیگ به‌یده‌ كورده‌یل باكووریش ك كیشه‌گه‌یان له‌ چاره‌سه‌ر نزیكه‌و بكه‌ن ك جوور ئیسه‌ تاڕاده‌یگ گام وه‌ره‌و ئاشتى ناگه‌.

ئه‌وه‌ك له‌ ئاكام ئى واقعه‌ دوینریه‌ید، ئه‌ویش سه‌نگ كورده‌ له‌بان ئاسته‌یل هه‌رێمایه‌تیه‌گه‌، ئه‌و پایه‌ ك ئیسه‌ كورد دیریده‌ى وه‌ته‌نیا له‌ئاكام هیز ره‌ق نیه‌، به‌ڵكوو هیز نه‌رم كوردى وه‌تایبه‌ت له‌ توركیا روى له‌ گه‌شه‌كردن كردگه‌، ئنجا هیزه‌یل هه‌رێمایه‌تى ئه‌را په‌ره‌سه‌ندنیان هه‌وه‌جه‌ وه‌ هیز كورد دیرن و ئى ده‌رفه‌تیشه‌ نیه‌و ته‌نیا له‌لایه‌ن كوورده‌و جوور هووكار سه‌ركه‌فتن بدریه‌یده‌ ده‌وڵه‌ته‌یل داگیركه‌ر، به‌ڵكوو كارت كورد ئیسه‌ سه‌نگ و قورسایى خوه‌ى دیریدو یه‌یش ده‌رفه‌ت ده‌ید ئه‌را چاره‌سه‌ركردن كیشه‌گه‌.

هه‌ر له‌ى روییشه‌و گرتنه‌وه‌ر سیاسه‌ت" یا گشتى یا هویچ" وه‌گووره‌ى په‌یمانه‌یل زانستى كار خراویگه‌، به‌ڵكوو ئه‌را ئى واقعه‌ هیز كورد تواناى ك چه‌نیگ له‌وه‌ر خاتر وه‌ده‌سهاوردن ده‌سكه‌فته‌یل و هاوردنه‌وه‌ى هه‌قه‌یلى دیرید بایه‌سه‌ خواسته‌یلیانیش هه‌ر ئه‌ونه‌ بوون، ك وه‌ل ئه‌وه‌یشا خه‌و سه‌روه‌خوه‌ییش بایه‌سه‌ ئاماده‌گى داشتوود و له‌بان ئاست گشتى كار جددى ئه‌را وه‌دیهاوردنى بكریه‌ید.

خه‌ڵه‌ف غه‌فور

ج . أ