پروسه‌ێ ئاشتى خزمه‌تێگه‌ وه‌توركیه‌ و كێشه‌ێ كورد

شفق نيوز


چاره‌سه‌ر و ئاماده‌كاریه‌گان و ده‌سپێشخه‌ریه‌گان وه‌ختێگ جددێه‌و بوون ك نیه‌ته‌ێل پاك بوون و گامه‌یل پراكتیكى وه‌ره‌و باوه‌ر وه‌ماف یه‌كتری داشتن ئه‌ڵگیرێه‌ێ و ئاماده‌ێى ته‌واو ئه‌را دگان ناین وه‌ماف یه‌كترى له‌ ڕێ دیالوگ ئه‌نجام بگرێگ ، و ئێ گامه‌یله‌ توێه‌نن بوونه‌ بنه‌واێگ ك پشت وه‌پێیان بوه‌سرێه‌ێ و سه‌ره‌نجام نه‌خش سه‌ركرداێه‌تى و گرنگ عه‌بدوللا ئوجه‌لان و به‌شداری كردن فكرێى له‌وه‌ر چه‌و بگیرێه‌ى جور رابه‌ر پارت كارگه‌ره‌ێل كوردستان و حزبیش ئاماده‌ێى خوه‌ێ نیشان بێه‌یگ ئه‌ڕا وسانن جه‌نگ و چه‌ك دانان له‌ وه‌راوه‌ر دگان ناین له‌ بان ماف ڕه‌واى ملله‌ت كوردستان له‌ توركیه‌.
گرنگترین ئه‌و گامه‌یله‌ ئه‌وه‌سه‌ ك ئوجه‌لان جور ڕابه‌ر حزب ئاماده‌ بووگ له‌و دیالوگ و گوفتوگوه‌یله‌ ك له‌ شوون ئازاد كردنێ ئه‌نجام گرێگ ، له‌ شوون ئه‌و ماوه‌ێ دوێر و درێژه‌ ك له‌ ساڵ 1999 تائیسه‌ ده‌س وه‌سه‌ر كریاس وه‌بێ هوێچ هوكارێگ یاسایی.  
ئازاد كردن ئوجه‌لان ده‌سپێشخه‌رى ئیجابیێگه‌ و نیاز پاكى ده‌سه‌ڵات توركیه‌ نیشانده‌ێگ ، و قاپى له‌ ڕوى دیالوگ و داخوازى گوفتوگوی وه‌رفراوان ئاشتیانه‌ واز كه‌ێگ ، وه‌تایبه‌ت ك زیاتر له‌ جارێگ داكوكى كردێه‌ ك باێه‌د ده‌نگ تفه‌نگه‌یل كپ و ده‌نگ ئاشتى به‌رزه‌و بكرێه‌ێ ، له‌وه‌ر ئه‌وه‌گ هاله‌و باوه‌رَه‌ ك چاره‌سه‌ر پرس كورد له‌ توركیه‌ له‌ ڕێ جه‌نگ و وه‌كار بردن چه‌ك ئه‌نجام نێه‌گرێگ و سه‌رجه‌م لاێه‌نه‌ێل جه‌نگ زه‌ره‌د كه‌ن و ێه‌یش هه‌ڵوێستێگ مه‌بده‌ئی و ئنسانیه‌ و هه‌میشه‌ خوه‌ێ و حزبه‌گه‌ێ پابه‌ندن وه‌پێ و له‌ همان وه‌ختیش ده‌رفه‌تێگ مێژووییه‌ ئه‌ڕا ده‌سه‌ڵات فه‌رمانڕه‌وا له‌ توركیه‌ ، یه‌یش له‌ وه‌ختێگه‌ ك ئوجه‌لان ئێ قوناغه‌ وه‌قوناغ نوو خه‌بات كردن ناو بردێه‌ ، وه‌ێ جوره‌ خه‌بات چه‌كدارى ئاڵشت كریاسه‌ خه‌بات سیاسی ، ئه‌گه‌ر ده‌سه‌ڵات توركێه‌یش بتواێگ سه‌ر ئه‌ڕا ئاشتى ڕاسه‌قینه‌ بچه‌منێگ. ملله‌ت كوردستان له‌ توركیه‌ به‌هاێ گرانێگ ئه‌را وه‌ده‌س هاوردن مافه‌ ڕه‌واگانێ داس و ئێ قوربانیداین گه‌ورا بێ هوده‌ نه‌وێه‌ ، له‌وه‌ر ئه‌وه‌گ كورد له‌ قوناغ خه‌بات چه‌كدارى ناسنامه‌ێ تایبه‌ت خوه‌ێ پاراستیه‌ و ڕه‌سیه‌سه‌ ئێ قه‌ناعه‌ته‌ ك ئمڕو یا سوو مافه‌ ڕه‌واگانێ تێه‌رێگه‌ ده‌س ، ئه‌ویش وه‌یه‌كێه‌تى و یه‌ك هه‌ڵویستی.
حكومه‌ت هه‌رێم كوردستان عراق سه‌رله‌ نوو پشتگیرى خوه‌ێ له‌ پروسه‌ێ ئاشتى له‌ ناونی حزب كارگه‌ره‌یل كوردستان (PKK) وحكومه‌ت توركیه‌ ده‌ربڕیه‌ و ئاماده‌یى خوه‌یشێ نیشانداس ئه‌ڕا به‌شدارى كردن و دانان گامه‌یل ئه‌ڕا هاوكارى و سه‌رخستن پروسه‌گه‌ و دانان ڕێگه‌ چاره‌یل هاوبه‌ش ك جى ڕه‌زامه‌ندى هه‌ردولا بووگ.
هه‌میش حكومه‌ت هه‌رێم كوردستان پێشوازى له‌ گامه‌یل ئێ دوێاخره‌ كردێه‌ ئه‌ڕا پشتگیرى كردن پروسه‌ێ ئاشتى ك له‌ ده‌ به‌ند تایبه‌ت پێك هاتێه‌ ، له‌ وه‌ختێگ سه‌ركرده‌ مه‌یدانیه‌گان پارت كارگه‌ره‌یل كوردستان ته‌ئكید كردنه‌ ك ئاماده‌ نین چه‌ك دابنه‌ن تا وه‌ختێگ عه‌بدوللا ئوجه‌لان ئازاد نه‌كرێه‌ێ ، له‌وه‌ر ئه‌وه‌گ داخوازى ئازادكردن ئوجه‌لان ، داخوازى ڕه‌واێگه‌ و له‌ هه‌مان وه‌ختیش نیشانه‌ى نیاز پاكى لاێه‌ن وه‌راوه‌ره‌ و ڕاسى ته‌قالاگان ئه‌ڕا به‌رقه‌رارى ئاشتی ئاشكراوه‌ كه‌ێگ.
ئوجه‌لان وه‌رجله‌ ماوه‌ێگ له‌ ئه‌ندامه‌یل حزبه‌گه‌ێ داوا كرد چه‌ك دابنه‌ن و كوتایى بارنه‌ جه‌نگ 30 ساڵه‌ وه‌ل حكومه‌ت توركیه‌ ، جور ته‌قالاێ ڕاسه‌قینه‌ێگ ئه‌ڕا پروسه‌ێ ئاشتى و خستن توپه‌گه‌ ئه‌ڕا ناو مه‌یدان توركیه‌ ، تا ئه‌نقه‌ره‌ێش سوود له‌ێ ده‌رفه‌ته‌ بوه‌ێگ ئه‌ڕا پاراستن ملله‌ت توركیه‌ و ئاینده‌ێ و په‌له‌كردن له‌ به‌رقه‌رارى ئاسایش و دوسى له‌و وڵاته‌.
سه‌ركرده‌ سیاسیه‌گان هه‌رێم كوردستان عراق ، بازیكه‌ره‌ێل سه‌ره‌كى و نه‌خش گرنگێگ دێرن له‌ پشتگیرێ دیالوگ و گوش داین وه‌ دیدگاگان لاێه‌ن وه‌راوه‌ر، چوێن ئێ كاره‌ پشتگیریه‌ له‌ پروسه‌ى ئاشتی و كوتایی هاوردن وه‌جه‌نگ ، له‌وه‌ر ئه‌وه‌گ به‌رقه‌رارى ئاشتى له‌ باكور كوردستان بایخ گه‌وراێگ دێرێ له‌ سه‌قامگیرى ناوچه‌گه‌ وه‌گشتێ و كوردستان و توركیه‌ وه‌تایبه‌ت.
هه‌میش ئێ كاره‌ ده‌سپێخه‌رى نیاز پاكیه‌ ئه‌ڕا وه‌ پیریه‌و چگن داخوازێه‌یل مه‌ردمى و ئنسانى تایبه‌ت وه‌ ئاشتى و وسانن جه‌نگ له‌ توركیه‌ و گامیگیشه‌ ئه‌ڕا ئازاد كردن ئوجه‌لان و نیشانه‌ى مكوڕى ده‌سه‌ڵاتداره‌ێل توركیه‌س ئه‌ڕا په‌ێا كردن ، ڕێگه‌ چاره‌ێل هاوبه‌ش و ئنسانى ئه‌ڕا كیشه‌گه‌ ، ئازاد كردن ئوجه‌لان نیشانه‌ێ پابه‌ندی حكومه‌ت توركیه‌ وه‌ یاسا و رێزگردن له‌ ده‌ستور توركیه‌ و ڕێباز ماف مروڤه‌ ، تابڕه‌سێگه‌ ئاستێگ بتوێه‌نێ بووگه‌ ئه‌ندام له‌ یه‌كێه‌تى ئه‌وروپا.  
ڕى ئاشتی وه‌گوڵ هه‌موار نێه‌كرێه‌ێ ، و لاێه‌نیل وه‌جه‌نگ هاتگ باێه‌د ته‌قالا بكه‌ن ، ڕێگه‌ چاره‌یل هاوبه‌ش ئه‌ڕا نوا گردن له‌ خوێن ڕێژى و كوتایی هاوردن وه‌ ململانێ سه‌ربازى بارن و ئه‌وانه‌گ په‌روش چاره‌سه‌ر كردن كێشه‌ێ ملله‌ته‌گه‌ێانن باێه‌د ته‌قالا بكه‌ن ڕێگه‌ چاره‌ێل ئنسانى بوێننه‌و ك وه‌ل مافه‌یل مروڤ و ئازادێه‌یل سه‌ره‌كى بگونجیه‌ێ و ئه‌وانه‌یش په‌روش ئه‌وه‌ن توركیه‌ وه‌ره‌و ئاێنده‌ێگ ئارام و سه‌قامگیر گام ئه‌ڵگرێگ ، باێه‌د هه‌وڵ ئه‌ڕا چاره‌سه‌ره‌یل مه‌نتقى و ئه‌قڵانى بێه‌ن ك ئوجه‌لان له‌ چه‌ندین بوونه‌ خوازیارێ بوێه‌ و وه‌شێوه‌ێ جدیێگ كار ئه‌ڕا ئازاد كردنێ بكه‌ن له‌وه‌ر ئه‌وه‌گ مه‌ننى له‌ زندان وه‌پێچه‌وانه‌ێ ئه‌قڵ و مه‌نتقه‌.

سه‌رچاوه‌pukmedia
ج ك