ناسیۆنالیزم ناوچه‌یى و خه‌و دوڵه‌ت كوردى

شفق نيوز

 

وه‌رده‌وام له‌ عراق گیان نه‌ته‌وه‌گه‌رى و ناسیۆنالیزمى عه‌ره‌بى باڵاده‌س بویه‌و له‌لاى سه‌ركرده‌ى عراقى نه‌ته‌وه‌ له‌ رووح تاكیگ جه‌مه‌و كریه‌یده‌و ئه‌گه‌ر هه‌ر تاكیگ هیزیگ ناوه‌كى پاڵنه‌رى نه‌ود ئه‌را داكووكى له‌ زووان و نه‌ته‌وه‌گه‌ى، ئه‌وه‌ بیگومان وه‌ لاده‌ر له‌ ڕى و تاوانبار دریه‌یده‌ قه‌ڵه‌م.

له‌ دید رووحى نه‌ته‌وه‌ییه‌و هه‌میشه‌ ئه‌وه‌ك عه‌ره‌به‌یل عراق و ناوچه‌گه‌ توان نیشانى بیه‌ن ئه‌وه‌سه‌ ك ئه‌وان خوه‌یان وه‌ نه‌ته‌وه‌ى یه‌كه‌م زانن وه‌ جیاوازى نه‌ته‌وه‌یل تر و هه‌میشه‌ چنه‌و ئه‌را دین ئسلام و رووح خوه‌شه‌ویسى عه‌ره‌بى خوه‌یان وه‌ ئه‌وه‌ك په‌یغه‌مبه‌ر ئسلام"س. خ" له‌لى له‌ ئه‌وانه‌و دین ئه‌را نه‌ته‌وه‌ى عه‌ره‌ب و جوور گه‌وراییگ ئه‌را عه‌ره‌ب شماریه‌ید.

ئیمه‌ ئه‌گه‌ر هه‌ر وه‌ختیگ ته‌ماشاى هه‌ر به‌شیگ كوردستان گه‌ورا بكه‌یم، ئه‌وه‌ واقع ناسیۆنالیزم ناوچه‌یى ئه‌و وڵاته‌یله‌ دوینیم ك كوردستان له‌بانیان دابه‌ش كریاگه‌، ك وه‌رده‌وام ئه‌و دیدو فامستن و خه‌باته‌یله‌ له‌بار به‌ن ك له‌باوه‌ت نه‌ته‌وه‌ى كورد و خه‌و ئازادى و ده‌وڵه‌ت كوردیه‌و په‌یا بوود، ئنجا له‌ى باره‌ ك گیان ناسیۆنالیزم لاى ئه‌و وڵاته‌یله‌ ئه‌را دژایه‌تیكردن كورد وه‌رده‌وام ها له‌گه‌شه‌كردن و كار له‌وه‌ر خاتر تاواننه‌وه‌ى كلتوور و فه‌رهه‌نگ كوردیمان كه‌ن، بایه‌سه‌ ئیمه‌ى تاك كورد خوه‌مان مقه‌یه‌ت بكه‌یم له‌ هه‌ر كوشتن و ئازارداینیگ ك له‌و چه‌مك و فه‌ن وفیڵ و سیاسه‌ته‌و سه‌رچه‌وه‌ گرتوید و سه‌بردار بویمن ك نه‌وده‌ له‌یه‌كترازیان و له‌باربردن خه‌و ده‌وڵه‌ت كوردیمان.

وه‌گووره‌ى سه‌رچه‌وه‌یل تاریخ تویه‌نیم بویشیم: ناسیۆنالیوم كوردى له‌ سه‌ده‌یل گوزه‌یشت ناسیۆنالیزمیگ كز بویه‌، ئه‌گه‌ر ته‌ماشاى تاریخ خه‌بات ئه‌و جمشت و شووڕشه‌یل ئه‌وساى كورده‌ بكه‌یم ك له‌وه‌رخاتر سه‌ركه‌فتن و ره‌سین وه‌ هه‌قه‌یل و ئازادى و ده‌وڵه‌ت سه‌روه‌خوه‌یى كوردى خه‌بات كردنه‌، ئه‌وه‌ زوورمیان له‌وه‌ر كزى رووح ناسیۆنالیوم سه‌ربازه‌یله‌و ئه‌را هه‌ر جمشتیگ و كاریگه‌رى نه‌یاره‌یلیان هه‌ر زوى شكه‌ست هاوردنه‌و نه‌ڕه‌سینه‌سه‌ خه‌و ده‌وڵه‌ت كوردى.

ئنجا ئیسه‌ وه‌ به‌راورد وه‌ل هه‌ر قوناغیگ تر تاریخ، هه‌ل ومه‌رج و مه‌سه‌له‌ى كورد جیاوازه‌و پایه‌ جوگرافیه‌گه‌ى كوردستانیش گونجیاگه‌ ئه‌را كاڵین رووح ناسیۆنالیزم له‌لاى تاك كوردو دامه‌زرانن ده‌وڵه‌ت كوردى، چوینكه‌ وه‌گووره‌ى ئه‌ڕاى چوین نویسه‌ره‌یل و فكرمه‌نه‌یل چه‌مك ناسیۆنالیزم په‌یوه‌ندییگ راسه‌وخۆ دیرید وه‌ ده‌وڵه‌ت و نیشتمان و ده‌وڵه‌ت هووكار پیشخستن ناسیۆنالیزمه‌.

ئازاد ئبراهیم

ج . أ