ترۆریست وه‌ خوه‌ى خه‌نید یا وه‌مه‌ردم!؟

شفق نيوز

  ئاشكراس ك له‌شوون ساڵ 2000 وه‌ دویاوه‌، كه‌مه‌ كه‌مه‌ گرووپه‌یل ترۆریستى و ریكخریاگه‌یل قاعیده‌ ده‌سكردنه‌ ئه‌نجامداین كرده‌وه‌یل چه‌كدارى له‌ ناوچه‌گه‌ وه‌ تایبه‌ت له‌شوون 2003 و نه‌مه‌ندن رژیم سته‌مكار به‌عس ك بویه‌ بایس له‌ناوبردن هه‌زاران له‌ رووڵه‌یل بیتاوان ئى وڵاته‌ وه‌ مه‌هانه‌یل جوراوجوور ، ئه‌ویش له‌ ئاكام ئه‌وه‌ك ئاگادار بوین له‌وه‌ك ئه‌مریكاو هاوپه‌یمانه‌یلى جه‌نگ ئازادى ملله‌ته‌یل له‌ ناوچه‌گه‌ به‌رپا ئه‌كا، وه‌تایبه‌ت هه‌ر مه‌سه‌له‌ى داگیركردن كوه‌یت وڵاته‌یل یه‌كگرتگ ئه‌مریكا ئه‌و په‌لامار و ره‌فتار حكوومه‌ت و سوپاى عراقه‌ ئه‌را ئه‌و وڵاته‌ وه‌ جووریگ له‌ مه‌ترسى زانست ئه‌را بان ئاسایش ناوچه‌گه‌ وه‌گشتى و هه‌ر وه‌و خاتریشه‌ كه‌فته‌ مینه‌ى گرده‌وكردن هاوپه‌یمان و ته‌نانه‌ت ره‌سیه‌ حاڵه‌تیگ ك ئه‌گه‌ر وه‌ ته‌نیایش بویه‌ هه‌ر بایه‌سه‌ روى وه‌ڕوى هیز سته‌مكار سه‌دام حسێن بووده‌و تا مه‌رام دڵ خوه‌ى خاكه‌سار نه‌كریه‌ید و دویاخر ئه‌مریكا ك حزبه‌یل ئۆپۆزسیۆن په‌نا وه‌پى بردیان وه‌ چه‌و بیده‌سڵاتى ته‌ماشاى بكریه‌ید وه‌تایبه‌ت له‌لایه‌ن وڵاتیگ جوور ئیران ك دوشمن سه‌ره‌كى ئه‌مریكاس له‌ ناوچه‌ى خوه‌رهه‌ڵات ناوین.

له‌یرا مه‌رام له‌ باسه‌گه‌مان ئه‌وه‌سه‌، له‌وه‌ر هووكار له‌كیسچگن به‌رژه‌وه‌ندى، ئه‌وه‌ بوى ك له‌ى عراق تازه‌ى وه‌ناو دیموكراسیه‌ دویاى ئه‌وه‌ك هویچ هساویگ ئه‌را كویه‌نه‌ به‌عسیه‌یل و شۆفێنیه‌یل نه‌كریا، ئه‌وانیش له‌وه‌رانوه‌ر ئى مه‌سه‌له‌ وه‌ پشتگیرى بڕیگ له‌ ده‌وڵه‌ته‌یل ناوچه‌گه‌ هان ترۆریست و خوه‌یكوش و چه‌كداره‌یل تونڕه‌و دان له‌وه‌رانوه‌ر به‌خشین بڕه‌ پویلیگ وه‌پیان ده‌س بكه‌نه‌ كوشتن و بڕین و گرتن و ده‌سوه‌شانن له‌ به‌رژه‌وه‌ندیه‌یل ملله‌ت عراق ئاشتیخواز.

وه‌ هه‌رحاڵ كار ره‌سیه‌ ئه‌وه‌ك رووژ وه‌ ڕووژ ئى عراقه‌ فیشتر كاره‌سات خوینڕشانن له‌تى ئه‌نجام بدریه‌ید له‌ ژیر په‌رده‌ى جیهاد و فه‌تواى ناوه‌جى و ناشه‌رعى بڕیگ له‌ پیاوه‌یل مورشد و ئایینى ریشدار ك له‌ڕاسى ئایین موحه‌مه‌د به‌ریه‌ له‌لیان.

وه‌ل ئه‌وه‌یشا دوینیم ك جایه‌ڵ جوانه‌یل فریه‌یگیش وه‌پیان خه‌ڵه‌تیانه‌و ڕى شه‌یتان گرتنه‌و ئه‌را خاتر بڕه‌ پویل كه‌میگ ده‌سیان وه‌ خوین روڵه‌یل عراق قرمز كه‌ن و له‌یوا مه‌ژگیان شوریاگه‌ ك گوایا ئه‌گه‌ریش كوشیان شه‌هیدن و له‌ به‌هه‌یشت وه‌رین ره‌سنه‌ لاى په‌یغه‌مبه‌ر"مه‌حه‌مه‌د" سڵام خودا له‌لى.

ئیمه‌ زانیم ك ئایین ئسلام پاك و بیگه‌رده‌و هویچ وه‌ختى فه‌تواى كوشتن ناهه‌ق له‌تى نه‌دریاگه‌و قورئانیش وه‌ ئاشكرا گشت چشتیگ باس كردگه‌و ئه‌و فه‌توا له‌ ئایین ئسلام نیه‌ خوین بیتاوان بڕشنید، هه‌ڵبه‌ته‌ ئه‌را ئى كاریشه‌ دیاره‌ مه‌ردمانیگ ترۆریست و تونڕه‌و هه‌ن ك خوه‌یان كرنه‌سه‌ شێخ و مه‌لاو گشت فه‌توایگ له‌ گیرفان خوه‌یانه‌و درارن و روڵه‌یل وڵات وه‌پى بكوشن. ئه‌ى دى نازانیم ترۆریسته‌یل دڵیان وه‌چه‌ خوه‌شه‌ ئه‌گه‌ر كویره‌ى دووزه‌خ ئه‌رایان گه‌رم كریاگه‌و چه‌وه‌ڕیان ئه‌كا؟ دى نازانیم ترۆریست وه‌ خوه‌ى خه‌نید یا وه‌ مه‌ردم؟ وه‌ هه‌ر حاڵ ئیسه‌ له‌ شوونه‌یل فریه‌یگ له‌ى جه‌هانه‌ وه‌ تایبه‌ت له‌ بڕیگ له‌ ده‌وڵه‌ته‌یل عه‌ره‌بییش وه‌تایبه‌ت دویاى وه‌هار عه‌ره‌بى ترۆریسته‌یل وه‌بى ره‌حمانه‌ كرده‌وه‌یل چه‌كدارى ئه‌نجام ده‌ن و روى له‌ هه‌ر وڵاتیگ بكه‌ن ئامانجیان ویرانكردن و نواگرتنه‌ له‌ ئاسایش و سه‌قامگیرى.

ره‌نجده‌ر ئاواره‌

ج . أ