مالكی كه‌ی هات ئه‌را كه‌ركوك؟
ئيسه ك ناكووكی‌و ململانيه‌يل سیاسى ناونى هه‌رێم‌و به‌غدا روى له هه‌ڵكيشانه‌‌و كه‌ركوكیش جه‌مسه‌رێگ كێشه‌گانه‌‌و گرفته‌گانیش له‌وه گه‌ورا‌ترن ك ته‌نيا كێشه‌ی ناونى بارزانی‌ومالكی بوود، خه‌م لایه‌ن‌و پێكهاته‌ی تریش هاتيه‌سه بانى وه لایه‌ن شیعه‌يش ك شايه‌د دیارترینیان مه‌سه‌له‌ی گله‌‌وخواردن تارمایی مه‌ركه‌زیه‌ت‌و سته‌مكاری‌و خوه‌یدزینه‌وه بوود له حكوومه‌ت شه‌راكه‌ت نیشتیمانی‌و رێككه‌فتننامه‌ی هه‌ولێر ك مالكی وه‌پى كريا سه‌رۆك وه‌زیر.
له‌ئيچنه وه‌زعيگ سه‌ردان بارزانی و نه‌یاره‌یل مالكی ئه‌را به‌غدا یا وه چه‌واشه‌وه هاتن مالكی ئه‌را هه‌ولێر ئه‌و راسه‌رێه‌سه ك ئه‌كريه‌ێ ئومێد له‌بانى هه‌ڵبچنيه‌ێ ئه‌را وازكردن گريه‌كووره‌‌و نه‌هيشتن ناكووكیه‌گان و ره‌سين وه چاره‌سه‌ر, وه‌لی له‌ى وه‌خت‌وساته هه‌رجووره سه‌ردانێگ له‌لایه‌ن هه‌ر سه‌ركرده‌یگ له‌ى سه‌ركرده دیار‌و خاو‌ن بڕیاره‌يله ئه‌را كه‌ركوك ك وێسگه‌‌و چه‌ق ململانييگ ئیداری‌و سیاسی‌و نه‌ته‌وه‌یی‌و نیشتیمانیه بيجگه له قويله‌وكردن كێشه‌گان‌و غرورى‌و بێمنه‌تی له وه‌راێوه‌ر ئه‌وه‌كه‌ی تر‌و ره‌سانن په‌یام لويتبه‌رزی‌و ته‌حه‌داكردن هیچ ئاماژه‌یگ تر هه‌ڵناگرێ.
مالكی خاس ئه‌زانێ یه‌كێ له كێشه‌يل بنه‌ره‌تی ناونى هه‌رێم‌و به‌غدا فه‌رامووشكردن ماده‌ی 140 و خوه‌يدزینه‌وه‌ی حكوومه‌ته‌یل جه‌عفه‌ری‌و مالكی‌و شايه‌د له‌شوون ئه‌يانیش بوود له جيوه‌جيكردنى ئه‌وه‌يش نائوميدی‌و بێ متمانه‌یی فره‌یگ له‌لای كورد‌و خه‌ڵك ئه‌وناوچه‌يله دروسكردگه‌‌و چنه كردگه ئه‌وشوينه‌يله تا ئمڕوو وه ناوچه‌ی جى ناكووكى له‌سه‌ر بمێننه‌و و گله‌ونه‌دريه‌ن ئه‌را بان ناسنامه‌ی راسكانى خوه‌یان, مالكی له‌جياتی ئه‌وه‌گ نیازپاكی ئه‌را چاره‌سه‌ركردن كێشه‌گان نیشانبياد و هه‌نگاو وه‌ره‌و جيوه‌جيكردن ده‌ستور‌و رێكه‌فتننامه‌ی هه‌ولێر بناد‌و ماده‌ی 140 ته‌فعیل بكا‌و عێراق له‌ى قه‌یرانه رزگاربكا, دوينيد وه‌وه‌يشه‌و ناو‌سێ ك سه‌ردان كه‌ركوك بكا به‌ڵكو ناپرسێديش ك ئه‌ى سه‌ردانه له ئيسه چه‌نيگ هه‌سیار‌و مه‌ترسیداره وه‌ختێگ وه وه‌رچه‌و وه‌رپرسه‌یل بێده‌نگ كورد ئه‌و شاره‌‌وه ده‌هۆڵ ناسنامه‌ی عێراقی بوين كه‌ركوك ئه‌كوتێ‌و بيجگه له‌و ناسنامه هویچ ناسنامه‌یگ تر ئه‌را كه‌ركوك قبوڵ ناكا ئه‌وه‌يش دگان وه‌پیاناينيگ راسكانى قبوڵنه‌كردن ئه‌نجام ریفراندۆم‌و ره‌دكردنه‌وه‌‌و كووره‌وكردن ماده‌ی 140و كردن به‌نزینه وه‌ئاگر كه‌ركوك, بايه‌د وه‌رپرسه كورده‌گان دانیشتگ ئه‌و مه‌جلسه راشكاوانه وه‌مالكی بوتيان عه‌فو فه‌رمايش كرديد جه‌ناب سه‌رۆك وه‌زیران راسه كه‌ركوك شارێگ عێراقییه وه‌لی ناسنامه‌‌و شوناسی كوردستانییه./ش
ئالان ره‌ئوف
