شه‌فتالوى چایخانه‌ى حه‌یده‌رخانه‌و ترسیانى له‌حه‌سه‌ن فه‌یلى

شفق نيوز

له‌تیان تومار كریاگه‌و له‌وانه‌یش: چایخانه‌ى عارف ئاغا له‌ جاده‌ى (ره‌شید)ك له‌سه‌ره‌تاى ساڵه‌یل 30 سه‌ده‌ى وه‌رین شوون گرده‌وبوین رووژنامه‌نویس و مامۆستاو رووشنهویره‌یل بویه‌. چایخانه‌ى (عه‌زاوى)یش له‌ناوچه‌ى مه‌یدان ك ئه‌ویش شوون هونه‌ر و گورانى بویه‌و بیجگه‌ ئه‌وه‌یش چایخانه‌ى خه‌لیفه‌ له‌هه‌مان شوون ك یه‌یش شوون كه‌ڕ و لاڵه‌یل و ئه‌وانه‌ك حه‌ز له‌په‌روه‌رده‌ى بوڵبوڵه‌یل كردیان بویه‌و زیاتریان له‌وره‌ گرده‌و بویان. له‌ناوچه‌ى (به‌تاوین)یش چایخانه‌ى گزار كوردى بویه‌ ك ناودارترین چایخانه‌یگ بویه‌ له‌وه‌خت خوه‌ى له‌بان ئاست به‌غدا.

وه‌ل ئه‌وه‌یشا چایخانه‌ى حه‌سه‌ن عه‌جمى، ك یه‌كیگ بویه‌ له‌و چایخانه‌یل پاك به‌غدا له‌ناوچه‌ى حه‌یده‌رخانه‌، ك چاى تامدار و پڕ له‌زه‌ت له‌تى پیشكه‌ش كریاس. ئمجا له‌چایخانه‌ى حه‌سن عه‌جمى كابرایگ باڵاكوڵ له‌تى كار كردگه‌و ناوى(شه‌فتالوى)بویه‌و گشت ئه‌و مه‌ردمه‌ ناسیاگ ك هاتوچوو چایخانه‌گه‌ كردیان، ك وه‌جووریگ  هه‌میشه‌ نیه‌تى پاك نه‌ویه‌ وه‌ل مه‌ردماو بایه‌سه‌ له‌گشت هه‌واڵ و باسیگیان بزانستاد. ئمجا ئى شه‌فتالویه‌، دووس و دوشمنیگ داشتگه‌، دووسه‌گه‌ى ناوى(خه‌لیلو) بویه‌ فره‌ ناشرین و به‌دفه‌ساڵ بوى، وه‌لى شاره‌زایى فره‌یگ داشتگه‌ له‌ مه‌قامه‌یل عراقى و گورانیچڕین ك هه‌میشه‌ له‌بان خه‌یر و سه‌ده‌قه‌ى ئه‌ى و ئه‌و ژیاگه‌ وه‌تایبه‌ت له‌لایه‌ن ناسیار و هونه‌رمه‌نده‌یل ده‌سمه‌یه‌تى دریاگه‌.

دوشمن شه‌فتالوییش كابرایگ بویه‌ وه‌ناو (حه‌سه‌ن حراسه‌)، ك هه‌ر وه‌ختى حه‌سه‌ن بهاتیاد ئه‌را چایخانه‌گه‌، هه‌ر له‌دویره‌و شه‌فتالوى چه‌وى وه‌پى بكه‌فتیاد یه‌كسه‌ر هه‌یواى و خوه‌ى له‌شوونیگ تر شاردیاده‌و، چوینكه‌ ره‌حمه‌تى حه‌سه‌ن حراسه‌ كابرایگ غیره‌تدار و پاڵه‌وان بویه‌و(شه‌فتالوى)یش كابرایگ وه‌یفرووش و ده‌منه‌وسیاگ بویه‌ جویر ئه‌وه‌ك باسى كه‌ن. شه‌فتالوى له‌بنه‌ڕه‌ته‌و عراقى نه‌ویه‌و خه‌ڵك وڵاتیگ تر بویه‌و ئه‌وسایش مه‌ردمان فره‌یگ له‌وه‌ر خاتر كاركردن هاتیان و روى كردیانه‌ شاره‌یل عراق وه‌تایبه‌ت شار به‌غداى پایته‌خت وه‌خاتر كاركردن و گوزرانیان. ئمجا ئى شه‌فتالوى ناوه‌ له‌چایخانه‌ى حه‌سه‌ن عه‌جمى له‌ناوچه‌ى حه‌یده‌رخانه‌ فره‌ ده‌خاڵه‌ت كردیاگه‌ تایبه‌تمه‌ندى مه‌ردم، هه‌ر له‌وه‌ر ئه‌وه‌یش حه‌سه‌ن حراسه‌ى كورد فه‌یلى دژ ره‌فتار ناپه‌سه‌ن شه‌فتالوى بویه‌و هه‌ر له‌وه‌ر ئه‌وه‌یش شه‌فتالوى له‌لى ترسیاس و نه‌تویه‌نستگه‌ نزیكیه‌و بوود، ئمجا هه‌ر وه‌ختى بژنه‌فتیاد حه‌سه‌ن هات شوون وه‌خوه‌ى نه‌گرت و نه‌زانست له‌تاوى چوین بهه‌یوایگ و خوه‌ى بشارێده‌و. وه‌لى داخ گرانیگم ئه‌را ئیجووره‌ كوڕه‌یلیگ ك ئیسه‌ هه‌ق روڵه‌یلیان كه‌فتیه‌سه‌ ژیرده‌س كه‌سه‌یلیگ دگان وه‌ ڕاسییا نیه‌ن ئه‌را جى وه‌جیكردن داواكاریه‌یل و هاوردنه‌وه‌ى هه‌قه‌یل زه‌فتكریاگیان، ك له‌سایتیگ كلتوورى له‌باوه‌ت رویداگه‌یل ئه‌وساى به‌غدا تویه‌نستیم ئى زانیارى راسكانیه‌ بخه‌یمنه‌ڕوى جویر یادگارییگ رووژگاره‌یل كویه‌ن.