هونه‌رمه‌ند سه‌روه‌ت ئه‌نوه‌‌ر سه‌وز

شفق نيوز

ساڵ 1970 له‌ په‌یمانگا‌ی هونه‌ره‌يل‌ جوان به‌غدا وه‌رگیرياس‌. له‌ووره‌ به‌ش گرافیک وه‌ پله‌‌یگ به‌رز ته‌واو کردگه‌. له‌شوون ئه‌وه‌ ئه‌را ماوه‌ی دو ساڵ چووده‌ ئه‌ورووپا و سه‌رله‌نوو تيه‌ێده‌و ئه‌را‌ کوردستان.

 

یه‌که‌م پێشانگای له‌ زانکۆی سلێمانی وه‌ هاوبه‌شی چه‌ن هونه‌رمه‌ندێگ تر له‌ ساڵ 1976 کردگه‌سه‌و‌. دويای ئه‌وه‌ چه‌نه‌ها پێشانگا‌ له‌ شاره‌یل سلێمانی، هه‌ولێر، دهۆك، به‌غدا و شاره‌یل تر عێراق کردگه‌سه‌و‌.

 

ساڵ 1992 وه‌ل هونه‌رمه‌ند "نامیق عه‌لی قادر" پێشانگايگ له‌ شار پاریس کردنه‌و‌. ساڵ 1993 له‌بان ده‌عوه‌ت "فرانسوا میته‌ران" پێشانگه‌یگ هاوبه‌ش وه‌ل چه‌ن هونه‌رمه‌ندێگ كورد داشتگه‌‌. هه‌ميش له‌ وڵاته‌یل تر جوور به‌ریتانیا، ئه‌ڵمانیا و ئیتاڵیا پێشانگا داشتگه‌. چه‌نه‌ها پێشانگای هاوبه‌ش وه‌ل هونه‌رمه‌ند "سامان که‌ریم" كردگه‌سه‌و‌.

 

له‌ ده‌يه‌ی نه‌وه‌د، سه‌وز هونه‌رمه‌ند ئه‌را ماوه‌ی چه‌ن ساڵێگ له‌ ڕێکخرياگ "MAG" کار مین هه‌ڵگرتن کردگه.

 

ئاخرين پيشانگا‌ی هاوبه‌شی له‌ 16/3/2004 بوی ئه‌را یاد ساڵڕووژ شانزه‌ی مانگ مارت. هه‌ر له‌و ڕووژ‌يشه‌  ئۆتۆمۆبیليگ ده‌ێده‌ لی و وه‌ سه‌ختی زه‌خمدار بوود. له 28/3/2004 له‌ نه‌خوه‌شخانه‌ی "ئه‌لجادریه"‌ی شار به‌غدا، سه‌عات په‌نج ئيواره‌ گیانی له‌ ده‌سدا.