بڵاوكردن ‮ ‬دڵەڕاوكى خیانەت‮ ‬نیشتمانیە

شفق نيوز

نموونه‌يل فريه‌يگ هه‌ن له‌ مێژوو، ئه‌مريكا وه‌و گه‌وراهيزييه‌و له‌(پێرڵ هاربه‌ر) له‌ جه‌نگ جه‌هانی دويه‌م له‌لايه‌ن يابانه‌و خافڵگير كرياو ده‌س كوشنده‌يگ له‌لی دريا ك چه‌وه‌ڕی ئه‌وه‌ نه‌كرد، وه‌لی هه‌ر زوی ملله‌ت ئه‌مريكا جاريگتر خوه‌ی گرده‌و كرد و وه‌ هيز و باوه‌ڕ تازه‌يگه‌و كه‌فته‌ مه‌يدان جه‌نگ، ئه‌ويش تا راده‌يگ ك له‌ كووتايی شكه‌ست وه‌و ده‌سدريژيه‌ يابانه‌ هاوردو زرانی وه‌پی نا زه‌وی.

سه‌برداری ملله‌ت روسيای سۆڤێت له‌ جه‌نگ جه‌هانی دويه‌م و وه‌رگری ملله‌ت فره‌نسا له‌ وه‌رانوه‌ر نازيه‌يليش نموونه‌يگ ئاشكرايگن له‌ سه‌برداری مێژوويی ك تويه‌نستن دويای شكه‌ست و ده‌سدريژی له‌ناكاو جاريگتر له‌بان دوشمنه‌يليان سه‌ربكه‌فن.

ملله‌ت كوردمان مێژوو دوير و دريژيگ ديريد له‌ روی وه‌ڕوی بوينه‌وه‌و هه‌ڕه‌شه‌و پيلانكاری دوشمنه‌يل و يه‌يش يه‌كه‌مين جار نيه‌ ك دوشمنه‌يل هه‌ل وه‌ربگرن و خه‌ريك جيوه‌جيكردن پلانه‌يليان بوون ده‌رهه‌ق ئی ملله‌ت ئيمه‌، وه‌لی كورد هه‌ميشه‌ وه‌و ئه‌زموون دوير و دريژ خوه‌يه‌ جاريگتر وه‌ حه‌ماسه‌ت به‌رزيگه‌و هه‌ڵسياگه‌و شكه‌ست وه‌ دوشمن هاوردگه‌.

دوشمنه‌يل ئی ملله‌ته‌ وه‌ بوردمانكردن قه‌ڵادزێ و هه‌ڵه‌بجه‌ له‌و باوه‌ڕه‌ بوين ك كورد دی واز له‌ خه‌بات چه‌كداری ئه‌يه‌ريد و ئه‌چێده‌ ژير بار ئه‌وان و پشت ئه‌كاده‌ چه‌ك، ئمجا له‌ بوردمانكردن و كيمياواران هه‌ڵه‌بجه‌و ناوچه‌يل تر كوردستانيش هه‌ر وه‌و ئه‌زره‌ته‌ بوی ك وه‌ل خوه‌يا ناره‌ی قه‌ور. ئمڕوويش شه‌ڕخوازه‌يل وه‌ هوير چه‌فت و ئه‌قڵيه‌ت كويه‌ن و هزر وه‌حشيه‌تانه‌يگه‌و ئه‌را بخوازن دوباره‌ی مێژوو بكه‌نه‌و جوور ئه‌وه‌ك ئيسه‌ هه‌وڵ ئه‌رای ئه‌يه‌ن، ئه‌وه‌ بايه‌سه‌ ئی دوشمنه‌يل نه‌فامه‌ ئه‌و راسيه‌ بزانن ك ئاكاميان هه‌ر سه‌رشووڕيه‌و ملله‌ت ئيمه‌ هه‌ر سه‌ركه‌فتگ بويه‌و ئه‌وانيش ته‌نيا روی سيه‌يی مێژوو و شه‌رشووڕی ئه‌رايان مه‌نده‌سه‌و.

ئه‌وه‌ك گرينگه‌ له‌يرا، هيز ناوخوه‌يی خوه‌مان و سه‌برداريمان هووكار سه‌ركه‌فتن و شكانن دوشمنه‌، ك ئه‌را ئی مه‌راميشه‌ بايه‌سه‌ هويچ وه‌ختيگ ڕی نه‌دريه‌يد دعايه‌ی چه‌واشه‌كار له‌ناو ملله‌ت بڵاو بدێدو موڵه‌ت دوشمنه‌يل و ناحه‌زه‌يل نه‌دريه‌يد ك نه‌ف خراو له‌و جووره‌ دعايه‌يله‌ وه‌ربگرن و گوڕه‌ی ملله‌ت وه‌پی له‌كه‌دار بكريه‌يد.

ملله‌ت قاره‌مان ئيمه‌ ئيجاره‌يشه‌ ئی قوناغه‌ گوزه‌رنيدو سه‌ركه‌فتن ئيمه‌يش وه‌ بازوو پێشمه‌رگه‌يل قاره‌مان و دووسه‌يلمان ئه‌را هه‌تا هه‌تايی ده‌سه‌وه‌ر ئه‌كريه‌يد.

سه‌لام عه‌بدوڵڵا

ج . أ