تۆ خاوه‌ن بڕیارید؟

شفق نيوز

 

ئى جووره‌ ئاده‌میزاده‌یله‌ له‌ بنه‌ڕه‌ته‌و كه‌سایه‌تییان جیاوازه‌ له‌و كه‌سایه‌تیه‌ ك نیشانى ده‌ن و جیاواز له‌ كه‌سه‌یل تر له‌ڕوى شوون و جوور كه‌سه‌یل نووڕید كه‌سایه‌تى ئه‌یانه‌ جیاوازه‌و خاوه‌ن چه‌نه‌ها راى جووراوجوورن ك خوه‌یان وه‌پى نه‌خشنن و له‌ هه‌مان وه‌خت زه‌حمه‌ته‌ سروشت ئاساییان وه‌ ته‌واوى ده‌سنیشان بكه‌ید.

 

ئه‌را نموونه‌: وه‌خته‌یلیگ هه‌س وه‌ جووریگن ك گرنگ نییه‌ له‌لایان ئه‌گه‌ر زوورم ئه‌و كه‌سه‌یله‌ هانه‌ چوارده‌ورى ئیهانه‌ بكا ته‌نیا له‌وه‌ر ئه‌وه‌ك وه‌رپرس ئه‌و شوونه‌ ده‌ور بویچگیگ بیه‌یده‌ پى، یا زه‌رده‌خه‌نه‌یگ ئه‌راى بكا. ئمجا كێشه‌گه‌ ها له‌وه‌ گشت ئه‌و مه‌ردم ده‌ورگردیه‌ ئى حاڵه‌ته‌ دوینن، وه‌لى خوه‌ى ئاگاى له‌خوه‌ى نییه‌ یا ئیچنه‌ خوه‌ى نیشان ئه‌یاد ك بێئاگاس یا فره‌ دڵسووزه‌!.

 

ئه‌گه‌ر ته‌ماشاى ئى جووره‌ كه‌سه‌یله‌ بكه‌یم و گفت و ره‌فتاریان له‌یه‌كه‌و بیه‌ید، ئه‌وه‌ بیگومان ئه‌راد ده‌ركه‌فێد كه‌فتنه‌سه‌ ژێر كاریگه‌رى قویلیگ ك شایه‌ت ئى كاریگه‌ریه‌ بچووده‌و ئه‌را شێواز په‌روه‌رده‌بوینى.

 

وه‌لى وه‌ل ئه‌وه‌یشا مه‌رجیش نییه‌ ئى جووره‌ ئاده‌میزاده‌یله‌ گشتیان ده‌ور خراویگ نیشان بیه‌ن، ئه‌را نموونه‌: كه‌سیگ له‌بان قسه‌ى خێزانه‌گه‌ى یا قه‌وم و خیشه‌یلى چیه‌سه‌ كۆلیژیگ دیاریكریاگ وه‌بى ئه‌وه‌ك تواناى ئه‌و كۆلیژه‌ داشتوود یا حه‌ز له‌و به‌شه‌ بكا، ماناى ئه‌وه‌سه‌ هه‌ر خوه‌ى ناڕه‌حه‌تى كیشێد.

 

ئى كه‌سه‌یله‌ هویر له‌ ده‌روین خوه‌یان ناكه‌ن و پرسیار له‌خوه‌یان ناكه‌ن چه‌ خوزان، وه‌ دڵنیاییشه‌و له‌وه‌ختیگ ئه‌و پرسیاره‌  له‌ خوه‌یان كه‌ن ك كه‌فتنه‌سه‌ ناو غه‌ڵه‌ت خوه‌یان و خاڵ هاوبه‌ش له‌ناونیان ئه‌وه‌سه‌ ك هه‌ردوگیان په‌شیمانن له‌ كرده‌وه‌یلیان و له‌ى حاڵه‌تیشه‌ زه‌ره‌د ئه‌را خوه‌یان و كه‌سه‌یل ده‌ورگردیانیش دیرن.

 

هه‌ر له‌وه‌ر ئه‌وه‌یش ئه‌گه‌ر خوازید ژیانیگ ئاسایى و به‌خته‌وه‌ر داشتوید، بایه‌د خاوه‌ن خوه‌د و بڕیار خوه‌د بوید. دى دوینید گشتمان وه‌ جووریگ كاریگه‌رى كه‌سه‌یل تر ها بانمان وه‌لى بیلا ته‌نیا لایه‌نه‌ خاسه‌گه‌ى وه‌ربگریم ئه‌را ئه‌وه‌ك مناى كه‌سه‌یل تر نه‌كه‌یم و ئه‌گه‌ر غه‌ڵه‌تیگ كردید ته‌نیا خوه‌د باجه‌گه‌ى بیه‌ید و هه‌وڵ بیه‌ید وه‌ره‌و خاستر بووه‌یده‌ى و هه‌ر وه‌وجووره‌ خوه‌د نیشان بیه‌ ك هه‌ید، وه‌گه‌ر نه‌ ئه‌وه‌ بێگومان ژیاند جوور لاپه‌ڕه‌یگ چه‌رمگه‌ ك وه‌ خه‌ت قه‌ڵه‌م خه‌تخه‌تى كریاوید.

 

هه‌رێم عه‌بدولڕه‌حمان

ج . أ