خوه‌شبه‌ختى و به‌دبه‌ختى

شفق نيوز

 

له‌یره‌ وه‌ چه‌واشه‌ى خوه‌شبه‌ختى، وشه‌یگ تر هه‌س ك ئه‌ویش وشه‌ى به‌دبه‌ختیه‌و پێكهاتگه‌ له‌و هس ناخوه‌شیه‌ فره‌یگ له‌ ئاده‌میزاده‌یل ئه‌یه‌یده‌ تویشیان و ئویشنه‌ خوه‌یان به‌دبه‌ختیم و جارجاریگیش ئى ئاده‌میزاده‌یله‌ ژیان له‌خوه‌یان تیه‌ڵ و ناخوه‌ش كه‌ن و هویره‌و ناكه‌ن و ناگه‌ردنه‌ شوون هووكار بیتاقه‌تى و به‌دبه‌ختیه‌گه‌.

له‌ رووژگار ئمڕوو خوه‌شبه‌ختى له‌لاى ئاده‌میزاده‌یل بویه‌سه‌ چشت سه‌ختیگ ك ئه‌ویش وه‌ بوونه‌ى خوه‌یانه‌و، وه‌گه‌رنه‌ هه‌میشه‌ قاپى به‌خته‌وه‌رى وازه‌، ئمجا خوه‌شبه‌خت بوو ئه‌را ئه‌وه‌ك له‌ژیان خوه‌ش بژیه‌ید.

خوه‌شبه‌ختى وه‌ ره‌فتار و كرده‌وه‌یلمانه‌، گشت كه‌سیگ خوه‌شبه‌خته‌ ئه‌گه‌ر بخوازن بوونه‌ كه‌سیگ به‌خته‌وه‌ر، ئه‌گه‌ریش نه‌خوازن ئه‌وه‌ به‌دبه‌ختى وه‌ده‌س خوه‌یانه‌، چوینكه‌ خوه‌شبه‌ختى هه‌میشه‌ ها له‌ژیر ده‌س خوه‌د، وه‌لى وه‌مه‌رجیگ وه‌ ئاقڵانه‌ مامڵه‌ بكه‌ید وه‌ل ناڕه‌حه‌تى و به‌دبه‌ختیه‌یل ژیان تا بتویه‌نید خوه‌شبه‌ختى له‌تى بوینیده‌و.

ماناى ئه‌وه‌سه‌ ئه‌گه‌ر خوازید خوه‌شبه‌خت و دڵخوه‌ش و دویر له‌ خه‌م بوید، بایه‌د وه‌ كرده‌وه‌ ئسباتى بكه‌ید و هه‌وڵ ئه‌ڕاى بیه‌ید، له‌هه‌مان وه‌خت بایه‌سه‌ ئارام و سه‌بر داشتوید له‌گشت ناخوه‌شى و به‌دبه‌ختییگ . ئه‌را ئه‌وه‌ك خوه‌شبه‌خت بوید بایه‌د:

* هه‌ر وه‌ختیگ تویش خه‌م و خوسه‌ و ناخوه‌شى هاتید، ئه‌وه‌ یونس ئاسا زكر خودا بكه‌ تا دڵد ئارام بوود.

* هه‌میشه‌ ئارمگر بوید و تویڕه‌ نه‌وید و خوه‌د دویر بگرید له‌ ئاژاوه‌و تویڕه‌یى.

* ئه‌و كه‌سه‌ بوه‌خش ك سته‌م له‌لید كردگه‌و نه‌رمى وه‌لیا باره‌ كار.

* گشت چشتیگ وه‌ پشت و په‌ناى خودا بكه‌ تا ده‌رویند ئارام بوود.

* خوسه‌و كینه‌ت له‌وه‌رانوه‌ر كه‌س مه‌گره‌ دڵ.

* هویچ وه‌ختیگ خوه‌د وه‌ گه‌ورا مه‌زان و كه‌سیگ ساده‌و ئاسایى به‌.

* دگان وه‌ غه‌ڵه‌ته‌یلد بنه‌و هویچ وه‌ختیگیش بى ئومید نه‌و له‌ سووز و به‌زه‌یى خودا.

* چه‌وه‌ڕێ سوپاسگوزارى له‌ كه‌س مه‌كه‌و گووش مه‌یه‌ ئه‌و كه‌سه‌ ك خوسه‌و كینه‌ت و تویڕه‌یى وه‌پید به‌خشێد.

فره‌جار هووكار خوه‌شبه‌ختى یا به‌دبه‌ختى هووكاریگ ده‌روینیه‌، ك ئه‌ویش له‌وه‌ر دوباره‌ كردنه‌وه‌ى وه‌رده‌وام وشه‌ى به‌دبه‌ختم و چه‌سپاننى له‌بان خوه‌ى، ك یه‌یش له‌ڕوى پزیشیكیه‌و ئسبات كریاگه‌، ماناى ئه‌وه‌سه‌ با ئیمه‌ لایه‌ن ده‌روینى خوه‌مان خاسه‌و بكه‌یم و فیشتر په‌ره‌ وه‌پى بیه‌یم و نه‌یلیم خه‌م و بیتاقه‌تى زاڵ بووده‌ بانمان.

ج . أ