فه‌یلیه‌یل جاریگتر له‌وه‌رانوه‌ر چێكه‌یل وه‌خشین

شفق نيوز

وه‌رجه‌ نویسه‌ره‌یل كورد، وه‌ بوونه‌ى ئه‌وه‌ك وه‌رده‌وام قه‌ڵه‌میان وه‌كار بوى له‌ داواكارى ئه‌را پشتگیركردن له‌ى چین زوڵملیكریاگه‌.

قسه‌ له‌بان مه‌ویسى فه‌یلیه‌یل كه‌متر نیه‌ له‌ مه‌ویسى فره‌ى ملله‌ت عراق و یه‌یش هه‌ق خوه‌یانه‌و زوورمیان به‌دبه‌ختى قورس دینه‌ چه‌و، ئمجا هه‌رچه‌نى ئه‌وسا وه‌و به‌دبه‌ختیه‌ گوزه‌ر كردن، وه‌لى ئمڕوویش هه‌ر جویر دویه‌كه‌س.

له‌سه‌ره‌تاى دامه‌زرانن ده‌وڵه‌ت عراقى تا ڕووژ ئمڕوو كار وه‌ڕیه‌وبه‌ر شوناسنامه‌ له‌ گشت كاره‌یل زیاتر غرووره‌، وه‌تایبه‌ت له‌شاره‌یل ناوڕاس و باشوور عراق و زوورم ئه‌وانه‌ك له‌ باكوور به‌غداو بڕیگ له‌ پاریزگایه‌یل بوین كه‌فتوینه‌ ژیر حوكم میرات ئه‌و پۆسته‌. وه‌لى ئه‌را نموونه‌: ئه‌گه‌ر ڕووڵه‌یگ كورد فه‌یلى خوه‌ندن ئاماده‌یى ته‌واو بكرداگ و بتواسیاگ بچیاتاگه‌ زانكۆ، ئه‌وه‌ بیگومان سه‌عات سفر له‌لاى خێزانه‌گه‌ى دیاگه‌ زه‌نگ و بایه‌سه‌ هه‌رچى به‌ڵگه‌یل كویه‌نه‌ هه‌ر له‌سه‌رده‌م عوسمانیه‌و گرده‌و بكردان وه‌ل وه‌ره‌قه‌ى داین پویل كاره‌با له‌و مانگیشه‌و گشتى وه‌یه‌كه‌و بخستانه‌ وه‌رده‌س ده‌سه‌ى وه‌رگرتن خوه‌ندكاره‌یل له‌ زانكۆ یا جامعه‌ له‌وه‌ر خاتر وه‌رگرتنى.

له‌وه‌خت وسیان جایه‌ڵ جوانیگ له‌ رووڵه‌ى كورده‌یل فه‌یلى له‌وه‌رده‌م وه‌ڕیه‌وبه‌ر شوناسنامه‌(مدیر الجنسیه‌)، پرسیار گشت چشتیگ له‌لى كردیاگ له‌باوه‌ت كاركردنى یا دارایى و بیجگه‌ ئه‌وه‌یش پۆلیسه‌یل ئاسایش له‌یوا له‌لى كردیان و له‌ گیان جاڕسى كردیان وه‌جووریگ هه‌رچى پویل داشتیاگ و له‌ كه‌لپه‌ل و ناوماڵه‌ بایه‌سه‌ گشتى بفرووشتاگ تا كارى وه‌پى ته‌واو بكرداگ و له‌یوا وه‌ پى كردیان وه‌ته‌واوى چكانیانه‌ى.

وه‌ل ئه‌وه‌یشا هه‌ر یه‌كیگ له‌لیان له‌ حاڵه‌تیگ ئه‌گه‌ر باتاگ و فایل یا ئزباره‌ى گه‌ورایگ  وه‌ربگرتیاگ ئه‌وه‌ بایه‌سه‌ له‌به‌غدا دوباره‌ باتاگه‌و ئه‌را ماڵ و هه‌رچى كه‌م وكوڕیه‌ گشتى پر ِه‌و بكرداگ تا كارى بخستیانه‌ ڕى و بكه‌فتیاگه‌ وه‌ر چێكه‌یل وه‌خشین.

هیمان هه‌زاره‌ها له‌ فه‌یلیه‌یل له‌ ئیران و له‌گشت ده‌وڵه‌ته‌یل تر و سه‌ده‌ها هه‌زار  له‌لیان له‌ ناوخود عراق، ئه‌و چێك وه‌خشینه‌ نه‌یرن و له‌لیان بوى رژیم سه‌دام وه‌ چه‌ن ده‌قه‌یگ تاڵانى كرد و ئیسه‌یش له‌ماوه‌ى هه‌یشت ساڵ له‌ دیموكراسى ئه‌و هه‌قه‌یلیانه‌ ئه‌ڕایان گله‌و نه‌خواردگه‌. ئنجا له‌وه‌ر وژدان دیموكراسى، ئه‌وه‌ بوى بڕیگ له‌ فه‌یلیه‌یل شوناسنامه‌ وه‌رگرتن، وه‌لى وه‌هه‌مان به‌دبه‌ختى و پویلداین ته‌نیا كووچ وه‌پیكردن له‌تى نه‌وى!!!

ئیمه‌ ئه‌گه‌ر بایمنه‌ پاى راسى، وه‌رپرسه‌یل ئمڕوو هه‌مان ئۆپۆزسیۆنه‌یل دویه‌كه‌ن، ك له‌وه‌خت ئۆپۆزسیۆن جووره‌ها قسه‌و گفتوگوو كردیان له‌باوه‌ت كیشه‌ى كورده‌یل فه‌یلى و هه‌ر وتیان كیشه‌ى كورده‌یل فه‌یلى له‌گشت لایگه‌و یه‌كیگه‌ له‌كیشه‌یل گه‌وراى ئنسانیه‌ت و رژیم به‌عس له‌گشت چینیگ زیاتر دژ ئى چین زوڵملیكریاگه‌ بوى، وه‌لى ئه‌وه‌سه‌ ده‌سڵاتداره‌یل ئمڕوو هه‌رچه‌نى تا دویه‌كه‌ له‌ ئۆپۆزسیۆن قه‌وڵ گشت چشتیگ وه‌ كورده‌یل فه‌یلى دیان، ئمڕوو وه‌داخ فره‌یگه‌و ئه‌وه‌سه‌ وه‌ئاشكرا هویچ ئه‌را ئى چین زوڵملیكریاگه‌ نه‌یرن بیجگه‌ گومكردن هه‌قه‌یلیان.

ئه‌وه‌ وژدان نیه‌ تاوان بخه‌یمنه‌ بان خود فه‌یلیه‌یل و منایان بكه‌یم ئه‌را ئه‌وه‌ك مه‌یل ئه‌را لایه‌نه‌یل جووراو جوور داشتوون، فه‌یلیه‌یل كار وه‌ وزاره‌ت سیادیه‌و نه‌یرن، یا وه‌ جیگر په‌نجم سه‌رۆكایه‌تى كوومار، به‌ڵكوو مناى خود حكوومه‌ت كه‌یم له‌ى ڕویه‌، چوینكه‌ مه‌سه‌له‌ى شوناسنامه‌ ته‌نیا كورده‌یل فه‌یلى له‌لى جیاوه‌ كریاگه‌ ته‌نیا شماره‌ى كه‌میگ نه‌وگ له‌لیان شوناسنامه‌ وه‌رگرتگه‌و جیاوازى وه‌لیانا كریه‌یگ وه‌ل مه‌ردمان تر له‌ هاووڵاتیه‌یل عراقى.

تویه‌نیم بویشیم مامڵه‌ى حكوومه‌ته‌یل یه‌ك له‌شوون یه‌ك له‌دویاى رمیان حكوومه‌ت به‌عس، په‌یمانه‌یگه‌ ئه‌را وژدان ئى حكوومه‌ته‌یله‌و چوینیه‌تى تیكه‌ڵكردن خاس وخراو، وه‌لى دى نیه‌زانیم مه‌به‌سیان چه‌س له‌ى كاره‌و ئایا وه‌ دڵ ئه‌نقه‌ز مه‌سه‌له‌گه‌ پشتگووش خریاگه‌ یا له‌وه‌ر خه‌مسه‌ردى؟

كیشه‌ى كورده‌یل فه‌یلى هه‌وه‌جه‌ وه‌هویچ نه‌خشه‌و خوه‌ندنه‌وه‌یگ نه‌یرى، به‌ڵكوو خواستیگ سیاسى كاره‌گه‌ گریه‌ داگه‌و نیه‌گونجیه‌یگ وه‌ مه‌سه‌له‌ى ئنسانیا له‌ى وه‌خته‌ و ئه‌وانه‌ك پشت له‌ى چینه‌ كردنه‌، ئه‌وه‌ بیگومان هس ئنسانى له‌هویریانه‌و چیه‌. ئه‌گه‌ریش مه‌سه‌له‌گه‌ په‌یوه‌س بوود وه‌ ئیرانه‌و، ئه‌وه‌ بیگومان:

* گشت نیشانه‌و ده‌لیلیگ ئشاره‌ت وه‌ ئه‌وه‌ كه‌ن ك ئیران كاریگه‌رى گه‌ورایگ دیرى له‌ سیاسه‌ت عراق، وه‌لى خوه‌یشى گومه‌ له‌هه‌ر چاره‌سه‌ریگ له‌باوه‌ت كیشه‌ى كورده‌یل فه‌یلى له‌وانه‌ك هانه‌ ئیران!

* ره‌شید عالى گه‌یلانى كووچ وه‌ كورده‌یل فه‌یلى كرد و دویاخریش له‌وه‌ختى كوده‌تا یا ئنقلابه‌گه‌ى سه‌رنه‌گرت خوه‌ى داواى په‌نابه‌رى له‌ ئیران كرد!!

* له‌شوون كووچ وه‌پیكردن دویه‌میش له‌ ساڵه‌یل هه‌فتاى سه‌ده‌ى وه‌رین، نازم گوزار وه‌ڕیه‌وبه‌ر ئاسایش گشتى له‌سه‌رده‌م به‌كر، ك وه‌رپرس جیوه‌جیكار پروسه‌ى كووچ وه‌پیكردن بوى له‌ڕى وه‌ره‌و ئیران ده‌سگیر كریا له‌شوون شكه‌ست كوده‌تاگه‌ى!!