سسته‌میگ په‌روه‌رده‌یى نوو له‌ هه‌رێم كوردستان

شفق نيوز

نوویگ په‌یڕه‌و كریه‌ید و وه‌گووره‌ى ئى سسته‌مه‌ ده‌رچویله‌یل یا خریجه‌یل ئاماده‌یى ك توان ئه‌را زانكۆ و په‌یمانگایه‌یل پیشكه‌شبكه‌ن ئه‌زموونیگ وه‌پیان كریه‌ید.

له‌ى باوه‌ته‌ عومه‌ر نوره‌دینى سه‌رۆك لوجنه‌ى په‌روه‌رده‌ له‌ په‌رله‌مان هه‌رێم له‌ په‌یوه‌ندییگى وه‌ل ماڵپه‌ڕ شه‌فه‌ق ئویشى:" هاماركردن یا تعدیل نوو ك په‌یوه‌سه‌ وه‌ قوناغ ئاماده‌یى له‌ هه‌رێم كوردستان ده‌ق ئه‌وه‌ هاتى ك نمره‌یل قوتابى یا ته‌له‌به‌ به‌شه‌وكریه‌یده‌ بان شه‌ش كۆرس و به‌شه‌وكریه‌یده‌ بان قوناغه‌یل 10 و 11 و 12، تاگه‌ر قوتابى به‌ڵگه‌نامه‌ یاشه‌هاده‌ى ئاماده‌یى وه‌ربگرید".

زیاتریش وت:" هه‌ركه‌سى بتواید پیشكه‌ش بكه‌ید ئه‌را زانكۆ یا په‌یمانگا له‌ شوون وه‌رگردن به‌ڵگه‌نامه‌ى ئاماده‌یى بایه‌ته‌ له‌ ئه‌زموون یا ئمتحانیگ تر به‌شدارى بكه‌ید ناوى نریاس( ئه‌زموون نیشتمانى) و نمره‌ى ئى ئه‌زموونه‌ وه‌ 70% شماره‌ كریه‌ید و 30% یشى له‌ نمره‌ى ئاماده‌یى شماره‌ كریه‌ید، وهه‌ردوگ نمره‌گه‌ جه‌مه‌وكریه‌ن ئه‌را شماره‌كردن ئه‌و ڕێژه‌ یا معدله‌ ك وه‌پى له‌ زانكۆ و په‌یمانگایه‌یل قه‌بوول كریه‌ن".

ئه‌وه‌یشه‌ ڕووشنه‌وكرد ك:" ئى سسته‌مه‌ له‌ وڵاته‌یل هاوسایش جوور ئیران و توركیا وه‌پى كار كریه‌ید و وه‌ ئه‌زموونیگ سه‌ركه‌فتى شماره‌كریه‌ید".

وئاماژه‌یش وه‌وه‌دا ك:" مه‌مه‌ر له‌ى سسته‌م په‌روه‌رده‌یى نووه‌ ئاسانكاریه‌ ئه‌را قوتابیه‌یل و به‌رزه‌وكردن ئاست هووكاره‌كردن، نه‌ك ته‌گه‌ره‌ داناین له‌ڕیگه‌ى".

له‌ لاى خوه‌یه‌و ئه‌ندام لوجنه‌ى په‌روه‌رده‌ له‌ په‌رله‌مان كوردستان سائر عبد الاحد له‌ په‌یوه‌ندییگى وه‌ل ماڵپه‌ڕ شه‌فه‌ق له‌ى باوه‌ته‌ ئویشى:" سسته‌م په‌روه‌رده‌یى نوو ئه‌را قوناغ ئاماده‌یى له‌ هه‌رێم وه‌شیوه‌ى كۆرسه‌یله‌ و هه‌ر قوناغیگ قوتابى 10 نمره‌ گیر تیه‌رى، و سه‌رجه‌م كووتایى 30 نمره‌یه‌، تا به‌ڵگه‌نامه‌ى ئاماده‌یى دریه‌یده‌ پى ئه‌را خاتر دامه‌زرانن نه‌ك ئه‌را خاتر قه‌بوولكردن له‌ زانكۆ و په‌یمانگایه‌یل".

ئه‌وه‌یشه‌ ڕووشنه‌وكرد ك :" ئه‌زموونیگ ڕكابه‌ریكردن هه‌س ك بایه‌ته‌ قوتابى له‌ شوون ده‌رچوینى له‌ ئاماده‌یى ئه‌نجامى بیه‌ید، ك له‌مانگ هه‌یشتم ئه‌نجام گرید تا ئاماده‌باشى یا ته‌ئهیل بوود ئه‌را قه‌بوولكردن له‌ زانكۆ و په‌یمانگایه‌یل، و ئه‌زموونه‌گه‌ ئه‌زموونیگ گشتیه‌ ئه‌را گشت ئه‌و مادده‌یله‌ ك له‌ قوناغ 12 خوه‌نیه‌سه‌یان". و جه‌ختیش له‌ بان ئه‌وه‌كرد ك:" ئى سسته‌مه‌ ها له‌ به‌رژه‌وه‌ندى قوتابى".

له‌باوه‌ت هووكار به‌رقه‌راكردن ئى سسته‌مه‌، عبدالاحد ئاماژه‌ وه‌وه‌دا ك:" ئى سسته‌مه‌ ئه‌را هانداین خاوه‌ن پیشه‌یل و كاره‌یل ده‌سیه‌، ئه‌را دابینكردن كاركه‌ره‌یل، وتا كه‌ناڵه‌یلیگ تر وجوود داشتوود ئه‌را وه‌كاره‌وناین بیكاره‌یل بیجگه‌ وه‌زیفه‌یل حكوومى، و به‌رزه‌وكردن ئاست قوتابى ئه‌را قه‌بوولكردنى له‌ زانكۆ و په‌یمانگایه‌یل".

له‌باوه‌ت ئه‌و خودنیشانداین یا ته‌زاهورات قوتابیه‌یل پارێزگاى سلێمانى دژ وه‌ى سسته‌م په‌روه‌رده‌یى نووه‌ و كوچگواران كردن به‌ڕێوه‌به‌رایه‌تى په‌روه‌رده‌، عبدالاحد ئه‌وه‌ ڕووشنه‌وكرد ك:" نه‌فامستن و حالى نه‌وین ئى سسته‌م نووه‌ هیشت قوتابیه‌یل سلیمانى ئى كاره‌ بكه‌ن". و جه‌ختیش له‌بان ئه‌وه‌كرد ك :" بایه‌ته‌ به‌ڕێوه‌به‌ره‌یل په‌روه‌رده‌ و مه‌دره‌سه‌یل پارێزگاگه‌ ئى سسته‌مه‌ ئه‌را قوتابیه‌یل شیه‌و بكه‌ن و لایه‌نه‌یل ئیجابى نیشانیان بیه‌ن".

له‌ لاى خوه‌یه‌و به‌ڕێوه‌به‌ر وه‌رین ڕه‌سانن له‌ زانكۆى صلاح الدین و قوتابى ماجستێر  له‌ زانكۆى لوبنانى هۆشمه‌ند ڕه‌فیق ئویشى:"ئى سسته‌م په‌روه‌رده‌یى نووه‌ سسته‌میگ و سه‌رنه‌كه‌فتى(فاشل)ه‌  چوینكه‌ وه‌گووره‌ى خواست و ئومید قوتابیه‌یل هه‌رێم كوردستان نیه‌".

زیاتریش وت:"بایه‌ته‌ سستمه‌یل پیشكه‌فتى و نوو له‌ كوردستان وه‌كارباریمن جوور ئه‌وه‌گ له‌ وڵاته‌یل ڕووژئاوا په‌یڕه‌وى كریه‌ید".

شایان باسه‌ ك وه‌زاره‌ت په‌روه‌رده‌ى هه‌رێم كوردستان له‌ ساڵ 2007 سسته‌م په‌روه‌رده‌یى ئاڵشت كرد له‌ كۆنفرانسیگ 500 په‌روه‌رده‌كار له‌ هه‌رێم و له‌ناو و له‌ ده‌یشت عیراق له‌تى به‌شدارى كردن، وه‌گووره‌ى ئه‌و سستمه‌ خوه‌نین سه‌ره‌تایى و ناوه‌ندى كریا یه‌كا و بویه‌ یه‌ك قوناغ و ناوى نریا قوناغ بنه‌ڕه‌تى ك له‌ یه‌ك بنه‌ڕه‌تییه‌و ده‌س كه‌یده‌ پى تا نوو بنه‌ڕه‌تى.