شاعریگ له‌ سێداره‌دریاگ

شفق نيوز

 

ته‌یموور له‌ عومر 21 ساڵى له‌ له‌شكر مه‌لك نیازخان گۆران بویه‌سه‌ سه‌رباز، له‌ ساڵ 1852 له‌وه‌ختى ك توركه‌یل په‌لامار شار ته‌یران دان و تاڵانى كردن، ته‌یموور وه‌ خوه‌ى له‌شكره‌گه‌یه‌و توركه‌یل ته‌فروتوین كرد و ته‌یران قورتار كرد، یه‌یش بویه‌ هووكار ئه‌وه‌گ له‌شكره‌گه‌ له‌لایه‌ن ناسره‌دین شاى قاجاره‌و پاداش بكریه‌ید. دى وه‌و جووره‌ له‌شكره‌گه‌ له‌بان داواى شا له‌ ته‌یران مه‌ندو ته‌یمووریش خه‌ریك رابه‌رایه‌تى مه‌ردم یارسان بوى و هه‌ر وه‌ى خاتریشه‌ هه‌وڵ فریه‌یگ دا.

نه‌یاره‌یل ته‌یموور كه‌فتنه‌ دژایه‌ته‌یكردنى و له‌شوون بوختان فریه‌یگ ئمجا له‌لایه‌ن ناسره‌دین شاوه‌ ده‌سگیر كریاو خریا زیندان، ماوه‌یگ وه‌ زیندانى له‌ ته‌یران مه‌ند و جیواز كریا ئه‌را كرماشان، شه‌ش مانگ له‌و شاره‌ له‌ زیندان مه‌ندو دویاخر وه‌ فه‌رمان شا وه‌ تاوان زندیقى و ده‌رچگن له‌ ئایین ئسلام له‌ ساڵ 1856 دریا له‌ سێداره‌ دریا، یه‌یش بویه‌ شه‌هیدیگ تر هویر و ڕاى ئازادو په‌یڕه‌وه‌یل و یاره‌یل یارسانیش ته‌رمه‌گه‌ى وه‌رگرتن و له‌ كرماشان وه‌خاك سپاردنه‌ى.

ته‌یموور له‌ ریكخریاگ یارسانه‌یل وناوه‌ند ئاینییان وه‌"شا ته‌یموور بانیارانى"ناسریاگه‌. دیوان شعرى نزیكه‌ى 1000 به‌یت بوود ك ناسریاگه‌ وه‌ "ده‌فته‌ر ته‌یموورى" یه‌كیگه‌ له‌ نامه‌یل پیرووز یارسان.

ته‌یموور په‌یوه‌ندى وه‌ گشت شاعره‌یل گۆران سه‌رده‌م خوه‌ى داشتگه‌ وه‌ تایبه‌ت" سه‌ى براكه‌" ك ئه‌ویش یه‌كیگه‌ له‌ گه‌ورایه‌یل یارسان. شعر ته‌یموور ره‌نگدانه‌وه‌ى ئایینه‌گه‌یه‌ ك له‌ چوارچیوه‌ى سوفێزم خوه‌ى نیشان ئه‌یادو خه‌ریك تیۆریه‌یل دۆنا دۆنه‌و شیوه‌ى گردگار له‌گشت چشتیگ دوینید.

شاعر بانیاران له‌یرا وه‌ناو خوه‌یه‌و قسه‌ ئه‌كاو ئویشید:

من وه‌ى ده‌رده‌وه‌ من وه‌ى ده‌رده‌وه‌

تاكه‌ى بناڵم من وه‌ى ده‌رده‌وه‌

وه‌ى ده‌رد خواخه‌ى ساحێب شه‌رده‌وه‌

راى قه‌رار نوخت كه‌س نه‌كه‌رده‌وه‌

زووان وه‌ لاڵه‌و چه‌م وه‌ هه‌رده‌وه‌

دڵ وه‌ زوخاوان داخ و ده‌رده‌وه‌

تاكه‌ى بگێڵم وه‌ سه‌ر هه‌رده‌رده‌وه‌

وه‌ى هه‌رده‌ى دوجه‌یل مه‌جنوون به‌رده‌وه‌

سۆزیام وه‌ى شه‌وق دانه‌ى زه‌رده‌وه‌

دانه‌ى زه‌رد تاكه‌ى ها وه‌ گه‌رده‌وه‌

سه‌رچه‌وه‌: كتاوخانه‌ى ئه‌وین

ج . أ