دویه‌ت مه‌ردم بایه‌سه‌ ئازاد بوود، وه‌لى خوه‌یشگ من نه‌!!

شفق نيوز

فره‌جار ئازادى وه‌ ماناى غه‌ڵه‌تیگه‌وه‌ شیه‌و كه‌ن و له‌خوه‌یانا ئازادى جووریگه‌ له‌ وه‌ره‌لایى، وه‌جووریگ ك قانوون هویچ نه‌خش یا ده‌وریگى نیه‌مینیگ و هه‌ركه‌س ئازاده‌ له‌ڕه‌فتار و قسه‌كردن وه‌ل مه‌ردم و ده‌وروه‌ریا وه‌و جووره‌ك خوه‌ى توایگ هه‌ڵسووكه‌فت بكاو چوین دارایى گشتى باریگه‌ كار و چشته‌یل تر، یه‌یش له‌وه‌ختى ك ئازادى بیجگه‌ مه‌رزداركردن وه‌ چه‌نه‌ها بنه‌ماى قانوونى ك له‌لایه‌ن ده‌زگایه‌یل قانوونه‌وه‌ دانریانه‌و مقه‌یه‌تى به‌رژه‌وه‌ندى گشتى ئه‌را گشت تاكیگ هه‌ر له‌ مناڵییه‌وه‌ تا گه‌ورایى و دویاى مه‌رگیش كریاگه‌، ك شایه‌ت مه‌سه‌له‌ى جى وه‌جیكردنى له‌شوونیگه‌وه‌ ئه‌را شوونیگ تر جیاوازى داشتووگ، له‌هه‌مان وه‌خت وه‌ چه‌نه‌ها قانوون ئه‌خلاقى بڕیگ له‌مه‌ردمه‌وه‌ مه‌رزدار كریاگه‌، وه‌لى دید بڕیگ له‌ پیاوه‌یل ئه‌را ئازادى ژنه‌یل تا ئه‌نازه‌ى فره‌یگه‌و جویر كۆمیدیایگه‌و ته‌نیا ئه‌را نوكته‌و خه‌نستن گونجیه‌یگ باس له‌لى بكریه‌یگ ، وه‌ل ئه‌وه‌یشا كیشه‌ى فره‌ گه‌ورایگ ئه‌را كومه‌ڵگا دروس كردگه‌، ك هه‌رچه‌نى خود ژنه‌یلیش تا ئیسه‌ نه‌تویه‌نستنه‌ مانایه‌یل ئازادى ئه‌را خوه‌یان و ده‌وروه‌ریان له‌یه‌كه‌و بیه‌ن و له‌لى بڕه‌سنه‌وه‌، وه‌لى وه‌ختى ك ژن داواى ئازادى ئه‌كا مه‌به‌سى ئه‌وه‌ نیه‌ مه‌رزه‌یل ئه‌خلاقى و ئنسانى بشكنیگ، به‌ڵكوو ته‌نیا مه‌به‌سى ئه‌وه‌سه‌ توایگ ك چوین قانوونه‌یل كومه‌ڵگاى مه‌ده‌نى ڕى وه‌پى دانه‌، وه‌ گووره‌ى ئه‌وه‌ هه‌ڵسووكه‌فت بكاو به‌شدار بووگ له‌ وه‌ره‌ونوابردن كومه‌ڵگاو مه‌سه‌له‌ى گرنگ كومه‌ڵگا، ئنجا چ له‌ڕوى ئابووریه‌وه‌ بووگ یا سیاسى و كومه‌ڵایه‌تى و ...، له‌یرا توایم باس جووریگ له‌ ئازادى بكه‌یم له‌دید پیاوه‌یله‌، هه‌رچه‌نى ئى قسه‌ گشت پیاوه‌یل نیه‌گریگه‌وه‌، وه‌لى به‌ش فره‌یگ له‌ پیاوه‌یل گریگه‌وه‌. نموونه‌ى ئه‌و پیاوه‌یله‌ فره‌س، ك بان زووان و بن زووانیان قسه‌كردنه‌ له‌بان ئازادى وه‌ختى راى خوه‌یان نیشانده‌ن و تا ڕاده‌ى خاسیگیش هه‌ق ده‌نه‌ ئازادى ژن، ته‌نانه‌ت باس له‌ئازادى كوڕ و دویه‌تیش كه‌ن له‌ڕوى دووسایه‌تى. ئه‌و پیاوه‌یله‌ هان وه‌ل ئه‌وه‌یا ك ژن گشت وه‌ختى ئازاد بووگ له‌وه‌ك كه‌ى چووگه‌وه‌ ئه‌را ماڵ یا نه‌چووگه‌وه‌، مۆبایل بارنه‌ كار یا نارنه‌كار، دووسیگ دیریگ یا چه‌ن دووسیگ. ئه‌و پیاوه‌یله‌ فره‌ وه‌پیان خوه‌شه‌ ژنه‌یل ئازاد بوون له‌وه‌ك ك جنگ نیمه‌ڕویت بپووشن و جارجاریگیش له‌شوونه‌یلیگ وه‌ك پیاوه‌یل بنیشن و شه‌راو بخوه‌ن، بڕیگ له‌و پیاوه‌یله‌ وه‌پیان خوه‌شه‌ ئه‌و دویه‌ت و ژنه‌یله‌ وه‌ مكیاج فره‌جوانیگه‌وه‌ له‌سه‌در سه‌یاره‌ دانیشن و ئه‌را هه‌ر شوونیگ وه‌پیان خوه‌شه‌ بچن، ئنجا ئه‌و پیاوه‌یله‌ گوایا به‌ش فره‌یگ له‌لیان رووشنهویر و نویسه‌ر و مامۆستاى زانكۆ و كه‌سه‌یل سیاسن، ئه‌وانه‌ توان كومه‌ڵگا وه‌ره‌و وازبوین یا ئنفتاح بچووگ، وه‌لى ئایا كام جووره‌ وازبوین و پیشكه‌فتنیگ ، ئه‌و جووره‌ وازبوینه‌ ك خوه‌یان وه‌ك تاكیگ توانه‌ى نه‌ك ئه‌و ئننفتاح خاسه‌ ك له‌لایه‌ن زاناو شاره‌زایه‌یل كومه‌ڵناسى باس كریاگه‌و گفتوگوو له‌بانى كریه‌یگ ، چوینكه‌ ئه‌و جووره‌ پیاوه‌یله‌ ك شماره‌ى فره‌یگ كومه‌ڵگا پیك تیه‌رن، ئه‌و ئازادیه‌ ته‌نیا ئه‌را دویه‌ت و ژن كه‌سه‌یل ده‌وروه‌ر خیزان و بنه‌ماڵه‌ى خوه‌یان توان و هویچ وه‌ختى ڕى نیه‌نه‌ ژن و دویه‌ت خوه‌یان ئه‌و جووره‌ ئازادیه‌ داشتوون ك خوه‌ى توایگه‌ى ئه‌را ژنه‌یل.

تائیسه‌ هویچ پیاویگ نه‌ویه‌ ئه‌و جووره‌ ئازادیه‌ ئه‌را دویه‌ت یا خوه‌یشگ یا ژنى قه‌بوول بكا، وه‌لى دوینید ئه‌را خوه‌ى فره‌ ئاساییه‌ وه‌ل دویه‌ت مه‌ردما ده‌ربچووگ و ئه‌را هه‌ر شوونیگ  خوه‌ى توایگ و گه‌مه‌ وه‌ هس دویه‌ته‌گه‌ بكا، یا دوینید هه‌ڕه‌شه‌ى ئه‌وه‌یش له‌لى ئه‌كا ك ئه‌گه‌ر واز له‌لى باریگ، له‌ناو مه‌ردم ئاوڕویى به‌یگ ! له‌وه‌ر ئه‌وه‌ بایه‌سه‌ یه‌كه‌مجار ژن و دویه‌ت و خوه‌یشكه‌یل خوه‌یان ئاگاداره‌و بكه‌ن و بزانن چه‌ توان و یه‌كه‌مجار له‌ژنه‌یل خوه‌یانه‌وه‌ ئه‌و ئازادیه‌یله‌ بوینن نه‌ك وه‌ دویت و ژنه‌یل مه‌ردم ئه‌و ئازادیه‌ بخه‌نه‌ ناو كومه‌ڵگا.

 

ئاوات محه‌مه‌د