كورد چه‌بكه‌ێگ؟

شفق نيوز


ئه‌و جه‌نگه‌ ك ئیسه‌ له‌یه‌مه‌ن ده‌س وه‌پێ كردێه‌ ، سه‌ره‌تاى جه‌نگێگ خوێناوی تایفیه‌ و بێجگه‌ دوژمن موسڵمانه‌یل هیچ كه‌س و هێز و لاێه‌نێگ له‌ێ جه‌نگه‌ سوودمه‌ند نیه‌وگ و ێه‌یش وه‌بێ به‌رنامه‌ نه‌كریاس ، به‌ڵكم وڵاته‌یل ئه‌وروپا و ئه‌مریكا هانه‌ ته‌ما له‌ ڕێ جوێله‌ وه‌پێكردن و پشتگیری كردن چه‌ن وڵاتێگ هه‌رێمى ، جه‌نگ له‌ ناوچه‌گه‌ وه‌رده‌وام بووگ و وه‌بێ ئه‌وه‌گ سه‌ربازه‌یل خوه‌یان به‌شدارى له‌تێ بكه‌ن و پوێل خوه‌یان خه‌رج بكه‌ن و، دویاخریش چه‌ك وه‌لاێه‌نه‌ جه‌نگ كه‌ره‌گان بفروشن و له‌و ڕێه‌وه‌ قانجاز و سوود فه‌ره‌ێگ بكه‌فێگه‌ ده‌سێان و ، له‌ شوون جه‌نگیش ئه‌وان ئه‌ڕا وه‌ده‌س هاوردن قانجازێگ زیاتر له‌ ڕێ كومپانیاگانیان تێه‌نه‌وه‌ ئه‌ڕا ناوچه‌گه‌ و ئه‌ڕا به‌رژه‌وه‌ندى درێژخاێه‌ن له‌ ناوچه‌گه‌ مینن و كومپانیه‌گانێان ، وێرانێه‌یل جه‌نگ سه‌ر له‌ نوو بونیاد نه‌ن و مه‌به‌سیانیش ئه‌وه‌سه‌ كار ئه‌ڕا كومپانیاگانیان و كومه‌ك ئه‌ڕا ئابوورى وڵاته‌یلێان بوێننه‌و.
ئه‌وه‌گ له‌ ئاسوى ئى جه‌نگه‌ دیاره‌ ، به‌ش به‌شه‌و بوێن لاێه‌نه‌یل جه‌نگه‌ له‌ ناونی دو به‌ره‌ یا جه‌بهه‌ ، سونیه‌گان سعودیه‌ و توركیه‌ سه‌روكایه‌تییان كه‌ن و به‌ره‌ى شیعه‌یش ئێران و هه‌ر وه‌ێ خاتره‌ ئه‌گه‌ر ئیمه‌ێ كورد ژیرانه‌ مامه‌ڵه‌ وه‌ل سه‌ره‌تا و ئه‌نجامه‌گان ئێ جه‌نگه‌ نه‌كه‌یم ، شایه‌د وه‌زه‌ره‌د كورد بشكێه‌یگه‌و ، چوین وه‌بێ گومان ، به‌شدارى كورد له‌ هه‌ركام له‌و دو به‌ره‌ یا جه‌بهه‌ وه‌نه‌ف و قانجاز كورد نییه‌ و لاێه‌نگریمان له‌ یه‌كێگ له‌و دوو به‌ره‌ بووگه‌ بایس ئه‌وه‌گ ، قانجاز سه‌رمایه‌ بخوه‌ێگ و ناوچه‌گه‌ێ ئیمه‌یش جور جاران به‌ش به‌شه‌و بووگه‌ بان زون سه‌وز و زه‌رد و ئیسه‌یش جور جاران نییه‌ ، نه‌فت و غاز له‌ كوردستان په‌ێا كریاس و بارودوخه‌گه‌ قویلتر و سه‌ختتره‌و بووگ و هه‌ر وه‌ێ خاتره‌ سه‌رنجه‌گه‌م له‌ى چه‌ن خاڵه‌ خه‌مه‌ ڕوێ :
1-له‌ ئیسه‌وه‌ بایه‌د پارت دیموكرات كوردستان ، وه‌چه‌و براێه‌تى و شه‌راكه‌ته‌وه‌ بنوڕێگه‌ یه‌كیه‌تى و ئه‌گه‌ر هاوكیشه‌گه‌ پێچه‌وانه‌وه‌ بوێه‌و ، دوێر نییه‌ یه‌كیه‌تى وه‌شێوه‌ێگتر جواو پارتى بێه‌ێگه‌و.
2-به‌شدارى كردن ڕاسه‌وخوى سه‌ربازی له‌و ناوچه‌یل ده‌یشت سنووره‌یل كوردستان ، وه‌زه‌ره‌د كورد شكێه‌یگه‌و و باێه‌د پێشمه‌رگه‌ ، ته‌نیا ئه‌ڕا پارێزگارى كردن خاك كوردستان وه‌كار بگیرێه‌یگ.
3-باێه‌د ده‌سه‌ڵاتداره‌یل كورد وه‌تایبه‌ت حكومه‌ت هه‌رێم ، نه‌چوگه‌ هوێچ به‌ره‌ێگ ئێران و توركیه‌وه‌ ، و سیاسه‌ت سه‌روه‌خوه‌ێ و په‌یوه‌ندى وه‌ل گشت وڵاته‌ێل وه‌بێ جیاوازى داشتوگ ، وه‌تایبه‌ت وه‌ل ئه‌و دو وڵاته‌.
4-سه‌روكاێه‌تى هه‌رێم و حكومه‌ت كوردستانیش زیاتر پرس و ڕاوێژ وه‌سه‌رجه‌م لاێه‌نه‌یل بكه‌ێگ و پشت گوش خستن هه‌ر لاێه‌نیِگ سیاسی له‌ كوردستان ، وه‌تایبه‌ت ئه‌وانه‌گ ، گوزه‌یشته‌ێ سه‌ربازى وه‌یه‌كه‌وه‌ داشتنه‌ ، ده‌رفه‌ت ئه‌وه‌ زیاێه‌و كه‌ێگ ك یه‌كرزى ناو ماڵ كورد ناكامڵ بووگ و ئه‌وسا وه‌رپرسیارى گه‌ورا و یه‌كمیش كه‌فێگه‌ سه‌ر شان وه‌رپرس یه‌كم هه‌رێم.