نیم سه‌ده‌ بچووه‌ دویا ئه‌را ئه‌وساى كوردایه‌تى!

شفق نيوز

كردگه‌و ره‌فتار و هه‌ڵسووكه‌فت ئاده‌میزادو بار كومه‌ڵگاو شیوه‌ى ژیان چه‌نیگ وه‌ل ئیسه‌یا ئاڵشت بویه‌؟

رووژگار كویه‌ن كورده‌وارى پڕ بوى له‌دڵپاكى و شه‌رم و هه‌واڵپرسى و به‌شداریكردن له‌خوه‌شى و ناخوه‌شیه‌یل، قوتابى وه‌چه‌و ترس و ڕیز و حورمه‌ت نوڕستیاگه‌ مامۆستاگه‌ى، لات و نه‌دار وه‌ل دارنده‌و ده‌وڵه‌مه‌نا له‌ڕووژه‌یل عه‌ید تیكه‌ڵ یه‌كترى بویان و گشت ماڵیگ وه‌رجه‌ ئه‌وه‌ك جنگ ئه‌را مناڵ خوه‌ى بسه‌ندیاگ لاوه‌ له‌یه‌تیم كردیان و هه‌وه‌جه‌یلى دابین كردیان، ئیسه‌ ئاوڕوى كه‌مه‌و سه‌ڵام بویه‌سه‌ مه‌سڵه‌حه‌ت و فه‌قیریش قیز له‌لى كریه‌یگ و قوتابى وه‌ پاكه‌ته‌ جغاره‌یگ نمره‌ى به‌رز وه‌رگرێد!

ژنه‌یل كورد ئه‌وسا وه‌شیوه‌ى كلتوورى جوانیگ خه‌ریك ته‌شى و به‌نڕسین و گڵیم و مه‌وج و لافدویرانن بوین وه‌ده‌م لایه‌لایه‌و قسه‌ى خوه‌ش و بیجگه‌ ئه‌وه‌یش جه‌وركیش و شووڕشكار بوین، ئیسه‌یش ئه‌وه‌سه‌ چین تازه‌ قه‌دریان نیه‌گرن و له‌هه‌مان وه‌خت وه‌ دویاكه‌فتگ و نه‌زان دریه‌نه‌ قه‌ڵه‌م.

ئه‌وسا مه‌ردم كومه‌ڵگاى كورده‌وارى دڵ له‌بان دڵ و خوه‌شڕه‌فتار بوین وه‌گووره‌ى داب و نه‌ریت پاك و بیگه‌ردو خه‌میان ته‌نیا ئازادى و سه‌روه‌خوه‌یى كوردستان بوى، وه‌لى مه‌ردم ئیسه‌ى كومه‌ڵگامان ئه‌و قه‌سه‌مه‌ شكانن و هه‌ر یه‌كیگ ڕه‌نگیگه‌و به‌شبه‌شه‌و بوینه‌و ئه‌یاكه‌ خه‌ت ئه‌واكه‌ نیه‌خوه‌نیگ و سه‌نگه‌ر هه‌ڕه‌شه‌و گوڕه‌شه‌ دروسكردنه‌و  توان كوردستان له‌ى ئازادیه‌ ناهمى بكه‌ن.

سه‌ره‌تاى ساڵ شه‌س، مه‌ردم وه‌دڵ ساده‌و پاكیگ شه‌وه‌كیان له‌ماڵ ده‌رچیان و روى كردیانه‌ باخ و بوسان و جفتیارى و خه‌له‌و خه‌رمان، ئه‌و تیكه‌ى نانه‌ وه‌شه‌كه‌تى و بیه‌ڵدارى و ئه‌ره‌ق ناو چه‌وه‌یلیان ده‌ركردیان و هه‌میشه‌ زووانیان له‌شوكر خوداى گه‌ورا بیبه‌ش نه‌وى، وه‌لى ئیسه‌ كارگه‌ر و كارمه‌ند هه‌میشه‌ هه‌وڵ فه‌ن و فێڵ و خود دزینه‌وه‌ ده‌یگ و كاره‌یلیان نیه‌مه‌و ناته‌واو ئه‌نجام ده‌ن و ته‌نیا چه‌وه‌ڕى سه‌رمانگ كه‌ن مه‌عاشه‌گه‌یان وه‌ربگرن و شوكر خودایش له‌زووانیان بڕیاگه‌.

ئه‌وسا گشت وه‌رپرسه‌یل رووژ خه‌بات وه‌ چه‌ك شانیانه‌و فره‌ ئاسایى وگیانفیدا بوین و سه‌ختى جه‌وه‌ڵه‌یل وه‌پا بڕیان و خواردنیان ته‌رخینه‌ یا خورماو ڕوینیگ بوى، وه‌لى ئیسه‌ بایه‌سه‌ ڕى له‌وه‌رده‌میان پاكه‌و بكریه‌یگ و مه‌ردمانیگ له‌شوونى ڕى بكه‌ن و پیاو فه‌قیر و بیده‌سڵات نزیكیانه‌و نه‌ود، وه‌ل ئه‌وه‌یشا خاسترین و تازه‌ترین سه‌یاره‌و ماڵ و تفاق و خوه‌راكیگ دیرن و زكر خودا له‌زووانیان ئه‌ڵڵاجه‌ویه‌.

دونیاى چه‌پى چه‌واشه‌یگه‌ كه‌فتیمنه‌تى، ئه‌وسا زوورم مه‌ردم كورد هه‌ر وه‌ختى قه‌سه‌م(وه‌سه‌ر مه‌لا مسته‌فا)بخواردیان دى كه‌س نه‌تویه‌نست سه‌رپیچى له‌لى بكاو قه‌درو حورمه‌ت تایبه‌تیگ ئه‌را ئه‌و نه‌مره‌ دانریا، وه‌لى ئیسه‌ قه‌سه‌م وه‌هه‌رچى ئه‌ولیاو ئیمامیشه‌ خوریه‌یگ و كاره‌گه‌ جى وه‌جى نیه‌كریه‌یگ .

رووژگار كویه‌ن باوگ و باپیره‌یل وه‌ روح نیشتمانى و راسكانى هه‌وڵ سه‌رخستن كیشه‌ى سه‌خت كورد دیان و شه‌ونه‌خه‌فى و خه‌بات بى وچان كردیان، ئیسه‌یش روڵه‌یلیان ئاواره‌و ده‌روه‌ده‌ر گووشه‌ى شاره‌یلن و كه‌س مه‌رحه‌بایان ناكا، پیشینه‌یل خوه‌مانیش وتنه‌(كى كرد و كى برد؟).