ئێزيديه‌يل ئمڕوو...كورده‌يل فه‌يلی دويه‌كه‌

شفق نيوز

 

ئه‌وه‌ك وه‌رجه‌ سێ ده‌يه‌ رويدا جوور كووچ وه‌پيكردن و تاڵان و زه‌فتكردن ماڵ وموڵك كورده‌يل فه‌يلی و دويره‌وخستن خيزانه‌يليان له‌ ژن و مناڵ و پير و په‌ككه‌فتگ ئه‌را بان مه‌رزه‌يل ئيران جوور ئه‌وه‌سه‌ ك ئمڕوو له‌ شه‌نگاڵ و هاماری نه‌ينه‌وا په‌يڕه‌و ئه‌كريه‌يد.

له‌ساڵ ١٩٨٠ رژيم سه‌دام ده‌سكرده‌ ئه‌نجامداين گه‌وراترين كرده‌وه‌ی كووچ وه‌پيكردن زووره‌ملی ده‌رهه‌ق كورده‌يل فه‌يلی، له‌و وه‌خته‌يله‌ سه‌ياره‌يل سه‌ربازی ده‌سكرده‌ جيوازكردن هاووڵاتيه‌يل ره‌سه‌ن عراقی ئه‌را مه‌رز ئيران و به‌ره‌ی جه‌نگ له‌ نزيك خانه‌قين وه‌بی ڕيداين وه‌ بردن هويچ هه‌وه‌جه‌يگ وه‌ل خوه‌ياناو گشت ماڵ وموڵك و به‌ڵگه‌يليانيش له‌لیان زه‌فت كرياو بيجگه‌ ئه‌وه‌يش ده‌سڵات به‌عس ده‌سكرده‌ گرتن جايه‌ڵه‌يليان له‌وانه‌ك عومريان له‌ناونی ١٦ تا ٤٠ ساڵ بوی و خسته‌يانه‌ زيندانه‌يل تيه‌ريك خوه‌ی و دويای ئه‌وه‌يش فه‌وتانه‌يان وه‌گشت شيوه‌يگ تاوانباری و بڕيگيش له‌ليان هاورده‌ كار له‌ تاقيگای كيمياوی و غازه‌يل ژاراوی و بايلۆجی.

ئه‌و كاره‌يل تاوانباريه‌ سه‌ره‌تايگ بوی ئه‌را ئيچنه‌ كرده‌وه‌يليگ له‌ شه‌نگاڵ و هاماری نه‌ينه‌وا ك هاته‌ تويش رووڵه‌يل پيكهاته‌ی ئێزيدی و مه‌سيحی و شه‌به‌ك و توركمان و مه‌ردمان تر، ئی كاره‌يله‌ بويه‌ نه‌ريتيگ له‌لای حزب به‌عس ك هه‌ر له‌سه‌ره‌تای شاڵ ١٩٦٣ مه‌شقی كرد له‌بان ده‌س چه‌ته‌يل وه‌ناو پاسه‌وان نيشتمانی.

نه‌ته‌وه‌يل و تايفه‌يل ئايينی و نه‌ته‌وه‌يی له‌ عراق جوور كورده‌يل فه‌يلی و شه‌به‌ك و مه‌سيحی و ئاشووری و سريانی و كلدان و ئێزيدی و سابئه‌ی مه‌ندائی و مه‌ردمان تر وه‌شيوه‌يگ وه‌رده‌وام تويش ترۆر و كوشت وكوشتار و تاڵانكردن ئه‌يه‌ن چ وه‌ده‌س هيزه‌يل حكوومی يا وه‌ده‌س چه‌ته‌يل ياخی وه‌خاتر وه‌ده‌سهاوردن ده‌رفه‌تيگ ئه‌را جيوه‌جيكردن خوسه‌و كينه‌ت خوه‌يان له‌بان هاووڵاتيه‌يل بيتاوان وه‌هخاتر تيركردن ئامانجه‌يل له‌و رواكانن و ده‌سدريژی و كوشتن و دی و تاڵانه‌.

كوومه‌ڵگای عراقی و كوومه‌ڵگای عه‌ره‌بی و ئسلامی وه‌گشتی هه‌وه‌جه‌ وه‌ زينگه‌وكردن رووشنهويريه‌ت و بڵاوكردنه‌وه‌ی گيان ئاشتی ديريد له‌جيای ئه‌و خوسه‌و كينه‌ت و جيايه‌، ئمجا ده‌سڵات و حكوومه‌ت و ده‌زگايه‌يل په‌روه‌رده‌يی ك مه‌شق كوشتن و توڵه‌سه‌ندن مه‌ردم ئه‌كا جوور ئه‌وه‌ك زويتر له‌ فتووحات ئسلامی رويدا، به‌ش گه‌ورايگ له‌ی تاوانه‌يله‌ ئه‌كه‌فيده‌ بانيان.

ئيمه‌ ئمڕوو هه‌وه‌جه‌ وه‌ له‌وه‌رچه‌وگرتن ئنسانی سه‌رده‌م ديريم له‌ برايه‌تی و ژيان هاوبه‌ش وه‌ل يه‌كتری، تا بتويه‌نيم كوومه‌ڵگايگ بنيات بنه‌يم بگونجيه‌يد وه‌ل كرامه‌ت هاووڵاتيه‌گه‌ی، هه‌ر وه‌و خاتريشه‌ داوا له‌ نه‌ته‌وه‌يل يه‌كگرتگيش ئه‌كريه‌يد پشتگيری كه‌مينه‌يل ره‌گه‌زی و ئايينی بكا له‌ عراق له‌وه‌رخاتر وه‌پيداين ئمتيازات فيشتر له‌ مه‌سه‌له‌ی مقه‌يه‌تيكردن له‌ چه‌كداره‌يل ك پيكهاتنه‌ له‌ بڕيگ چه‌ته‌يل نا ده‌ستووری و نا ياسايی.

د. موئه‌يه‌د عه‌بدلستار

ج . أ