ئاینده‌ى عراق

شفق نيوز

 

سه‌ركه‌فتن ئى هه‌وڵه‌ ئاكامه‌یل قویلیگ له‌لى كه‌فیده‌و ئه‌را ناوچه‌گه‌و ئه‌را خود عراقیش، ك عراق له‌ جه‌نگ خوازترین و سه‌رسه‌خترین دوشمن خوه‌رئاواوه‌ ئاڵشت ئه‌كا ئه‌را حكوومه‌تیگ ئاشتیخواز و دووس و پشتگیر خوه‌رئاوا.

 

ئنجا بوود بنگه‌یل سه‌ربزى سوپاى وڵاته‌یل یه‌كگرتگ له‌ عراق دامه‌زریه‌ن و عراقیش تویه‌نید بووده‌ هاوبه‌ش و به‌شدار له‌ روى وه‌ڕوى بوینه‌وه‌ى دژایه‌تیكردن ترۆریزم و ته‌نانه‌ت باس له‌وه‌یش كریه‌ید ك عراق بووده‌ نموونه‌ى دیموكراسى ئه‌را ده‌وڵه‌ته‌یل تر خوه‌رهه‌ڵات ناوین و بووده‌ سه‌رچه‌وه‌یگ و نموونه‌یگ ئه‌را خاسسازى.

 

له‌لایگ تریشه‌و شكه‌ست دیموكراسى له‌عراق یا شكه‌ست دامه‌زرانن و چه‌سپانن دیموكراسى، بووده‌ مایه‌ى نائارامى ناوچه‌گه‌و دى ئه‌و وه‌ختیشه‌ جه‌نگ و ناكووكى و تایفه‌گه‌رى وڵاته‌گه‌ گریده‌و، ك یه‌یش به‌دبه‌ختى و مه‌ینه‌تى فراوانیگ له‌لى كه‌فیده‌وه‌و كووچكردن وه‌جه‌م له‌لى دروس بوود.

 

هه‌ر وه‌و خاتریشه‌ شایه‌ت توركیاو ئیران و ده‌وڵه‌ته‌یل تریش ده‌خاڵه‌ت بكه‌ن له‌وه‌ر خاتر مقه‌یه‌تكردن به‌رژه‌وه‌ندیه‌یلیان و پشتگیرى ئه‌و كه‌س و لایه‌نه‌یله‌ بكه‌ن ك سه‌روه‌ خوه‌یانن. هه‌ر له‌وه‌ر ئه‌وه‌یش ناسه‌قامگیرى تویه‌نید عراق بكاده‌ خاك و ماواى ترۆریسته‌یل و ئه‌و توانا به‌یده‌ گرووپه‌یل كاره‌یل خوه‌یان له‌تى وه‌ ئاسانى ئه‌نجام بیه‌ن و نه‌خشه‌ له‌تى بكیشن.

 

ئه‌گه‌ر حكوومه‌ت به‌غدا بووده‌ حكوومه‌تیگ دژ و دوشمن، شایه‌ت عراق سه‌رله‌نوو هه‌وڵ وه‌ده‌سهاوردن چه‌كه‌یل جه‌مكوش بیه‌ید یا هه‌ڕه‌شه‌ له‌ هاوسایه‌یلى بكا، ته‌نانه‌ت سه‌ركه‌فتنیش مه‌ترسى خوه‌ى دیرید.

 

وجوود هیز سه‌ربازى گه‌وراى وڵاته‌یل یه‌كگرتگ ئه‌را چه‌نه‌ها ساڵ تر شایه‌ت كار خواستیگ بوود، وه‌لى ئه‌یه‌ وه‌ شیوه‌یگ حه‌تمى بووده‌ خاڵ كیشانن ریكخریاگ قاعیده‌و گرووپه‌یل تر ترۆریستى.

 

وه‌ل ئه‌وه‌یشا وڵاته‌یل یه‌كگرتگیش تومه‌ت وجوود ئمپریالیه‌ت خریه‌یده‌ پاڵى و ره‌وته‌یل رادیكاڵیش ئه‌و داگیركاریه‌یله‌ ئه‌را كیشانن و هاوردنه‌ ڕز ئه‌ندام تازه‌ وه‌كار تیه‌رن و بیجگه‌ ئه‌وه‌یش ئه‌گه‌ر هات و دیموكراسییش له‌ عراق بووده‌ سه‌رچه‌وه‌ى خاسیگ ئه‌را دیموكراسخوازه‌یل تر له‌ ناوچه‌گه‌، ئه‌وه‌ بیگومان ئه‌گه‌ر وه‌ شیوه‌یگ وه‌ختییش بویه‌، بار وڵاته‌یل گرینگ و سه‌ره‌كى ناسه‌قامگیر ئه‌كا.

 

كه‌ریم ئه‌حمه‌د

ج. ا