ئی درووه‌ كووتايی نه‌يريد؟

شفق نيوز

حكوومه‌ت دروويگ تر وه‌لمانا دا له‌بان زووان جيگر سه‌رۆكه‌گه‌ی ك وه‌رپرسه‌ له‌بان كه‌رت وزه‌و ناوی كانديده‌ ئه‌را سه‌رۆكايه‌تی حكوومه‌ت ئاينده‌!! له‌وه‌ختيگ ك قه‌وڵ دا كيشه‌ی كاره‌با وه‌ ته‌مامی چاره‌سه‌ر بكا له‌ كووتايی ٢٠١٣، به‌ڵكوو ئاشكرای ئه‌وه‌يش كرد ك به‌رهه‌مه‌ زيايه‌گه‌ی كاره‌بايش ئه‌فرووشيه‌يده‌ وڵاته‌يل هاوسا! وه‌لی ئه‌وه‌سه‌ ئيمه‌ زوورم مانگه‌يل ٢٠١٤يش گوزه‌ر كرديم و حاڵه‌ت ئيسه‌ی كاره‌با خراوتره‌ له‌چه‌و ساڵێگ وه‌رجه‌ ئيسه‌.

ئيسه‌يش حكوومه‌ت دروويگ پڕ مه‌ترسيدارتر له‌ كيشه‌ی كارت خوه‌راك و مه‌سه‌له‌ی كاره‌باو چشته‌يل تر وه‌لمانا ئه‌كا، ك ئه‌ويش دروويگ ئاشكراسه‌و په‌يوه‌سه‌ وه‌ مه‌سه‌له‌ی داگيركاری داعش و هاوپه‌يمانه‌يلی نزيكه‌ی سێبه‌شی رويوه‌ر عراق.

ئه‌و به‌ياننامه‌يله‌ ك قسه‌كه‌ره‌يل وه‌ناو حكوومه‌ت و سه‌ركردايه‌تی گشتی هيزه‌يل چه‌كدار باسی ئه‌كه‌ن و ئه‌و به‌رنامه‌يله‌ ك له‌ ئيزگه‌و كه‌ناڵه‌يل ته‌له‌فزيۆن حكوومه‌ت و نيمچه‌ حكوومیه‌و بڵاو ئه‌كريه‌ن و ئه‌و زانياريه‌يله‌ ك رووژنامه‌يل فه‌رمی و نافه‌رمی حكوومه‌ت پيشكه‌شی ئه‌كه‌ن، گشت ئه‌يانه‌ باس له‌و سه‌ركه‌فتنه‌يل گه‌ورای هيزه‌يل چه‌كداره‌و ئه‌و كوشتن و ده‌سگيركردن ده‌يه‌ها چه‌كداره‌يل رووژانه‌ی دوشمنه‌ ئه‌كه‌ن ك وه‌ی قسه‌يله‌ ئه‌وه‌ ده‌رخه‌ن ك دوشمن هويچ چشتيگ ئه‌رای نه‌مه‌ندگه‌ وه‌رگری وه‌پی بكاو گشتيان له‌ مه‌يدان جه‌نگ واينه‌و كوشيانه‌و ده‌سگير كريانه‌.

به‌ڵی ئه‌يه‌ درووييگه‌و ئه‌و سه‌ركه‌فتنه‌يله‌ ك جكوومه‌ت باسی ئه‌كا بايه‌سه‌ وه‌ڕاسی ئاشكرای بكاو گشت ئه‌و پيشكه‌فتن هيزه‌يل وشكانی و ئاسمانی و ئازادكردن ئاوايی و شارو شاروچكه‌يله‌ وه‌ چه‌و ديار بوود، چوينكه‌ ئيمه‌ هويچ پيشكه‌فتن و ئازادكردنيگ نه‌يمنه‌سه‌ چه‌و.

حكوومه‌ت له‌باوه‌ت مه‌سه‌له‌ی زه‌رده‌ گيانييش دروو وه‌لمانا ئه‌كا، گشت به‌ياننامه‌و لێدوانه‌يل قسه‌كه‌ره‌يلی شماره‌ی شه‌هيد و زه‌خمداره‌يل به‌ره‌ی جه‌نگ ناگريده‌ خوه‌ی، يه‌يش له‌وه‌ختيگ ديوار شاره‌يل پڕن له‌ لافيته‌ی پرسه‌و شه‌هيده‌يل، ئمجا ئايا ئه‌و شه‌هيده‌يله‌ شايسته‌ی ئه‌وه‌ نين ته‌نيا وه‌ ئاماژه‌يگ ياد بكريه‌ن؟

ئيمه‌ خوازياريم ئی راسيه‌ بزانيم ك چه‌ له‌موسڵ و تكريت و رومادی و فه‌لوجه‌و ناوچه‌يل ده‌ورگرد به‌غدا روی ئه‌ياد، هه‌ر له‌وه‌ر ئه‌وه‌يش ماف خوه‌مانه‌ بزانيم و ئه‌رك حكوومه‌تيشه‌ ئه‌و رويداگه‌يل ئه‌رامان ئاشكرا بكا، چوينكه‌ ئيمه‌ ريه‌نيگ نييم ره‌خنه‌ی بيده‌نگی له‌ليمان بگيريه‌يد وه‌ شوون سه‌رۆك حكوومه‌ت و داروده‌سه‌گه‌ی.

عه‌دنان حسێن

ج . أ