سوڵتان ئه‌رسه‌لان و ده‌وڵه‌ت شوانكاره‌

شفق نيوز

وه‌ساف الحه‌زره‌ نویساگه‌: له‌مانگ سه‌فه‌ر ساڵ "430 ك – 1030 ز"تاش فه‌راش نه‌وكه‌ر عه‌زودولده‌وله‌ ك والى ئه‌سفه‌هان بوى وه‌ له‌شكریگه‌و روى كرده‌ خاك و له‌وه‌ڕگایه‌یل شوانكاره‌ وه‌و خاتره‌ ك داگیرى بكا، ئه‌وه‌ بوی له‌ ده‌یشت را‌وه‌ن جه‌نگیگ كه‌فته‌ ناونیان، وه‌لى شوانكاره‌یل خوه‌یان كیشانه‌وه‌ ئه‌را لاى داراب گرد. دویاى ئه‌وه‌یش تویه‌نستن له‌شوون خوه‌یان بمیننه‌و، یه‌یش له‌ "تحریر تاریخ وصاف" هاتگه‌و له‌ (فارسنامه‌)ى ئبن به‌لخييش باس كرياگه‌، وه‌لى له‌یوا دیاره‌ غه‌ڵه‌ته‌ ، چوینكه‌ تاش فه‌راش له‌ نه‌وكه‌ره‌یل "مه‌سعود كوڕ مه‌حموود سه‌بوكته‌گین غه‌زنه‌وى" بویه‌ نه‌ك له‌ نه‌وكه‌ره‌یل عه‌زودولده‌وله‌ى بوه‌یهى .

له‌ ساڵ"440 ك – 1047 ز"ئه‌بو كالیجار" مرد و ئه‌بو مه‌نسوور فولادستون كوڕى شوونى گرت، وه‌لى فره‌ وه‌پى نه‌چى دایگى نه‌سيحه‌تی كرد "ساحب عادل" بكوشیدو ئه‌ویش كوشته‌ى ، ئمجا فه‌زڵه‌وه‌یهيش تووڵه‌ی كرده‌و.

ساڵ "424 ك – 1049 ز" ئه‌لپ ئه‌رسه‌لان كوڕ داود چوغرى سه‌لجووقى بى ئه‌وه‌ك توغروول مامه‌ى ئاگادار بوود هیز گه‌ورایگ جه‌مه‌و كرد و روى كردنه‌ وڵات فارس ك هه‌ر وه‌ناو له‌ژیر ده‌س فولادستون بوى، دی تاڵانى كرد و نزیكه‌ى هه‌زار كه‌سيش له‌ ده‌یله‌میه‌یل كوشت .

ساڵ"445 ك – 1062 ز"قاوه‌رت كوڕ داود چوغرى سه‌لجووقى ك وه‌"عیماده‌دین قه‌ره‌ ئه‌رسه‌لان" ناودار بوى و سه‌ڵته‌نه‌ت سه‌لجووقى له‌ كرمان دامه‌زرانوید، وه‌ له‌شكر فريه‌یگه‌و په‌لامار وڵات فارس داو تواس شوانكاره‌یل ته‌فر وتوين بكا. فه‌زڵه‌وه‌ى ك زانست وه‌هیز نا‌تویه‌نید نواى بگرید، هه‌ڵسیا دیارى وسه‌وقات فريه‌یگ وه‌ل خوه‌یا برد وچیه‌ڕا دیدار سوڵتان ئه‌رسه‌لان براى قاوه‌رت وقسه‌ وه‌لیا كردو قه‌وڵ وه‌پیدا ك وه‌ناو ئه‌وه‌و وڵات فارس به‌یده‌ ریه‌وه‌و ساڵانه‌ 27ملیۆن درهه‌م باجانه‌ ئه‌ياده‌پی. وه‌و خاتريشه‌ "گوشناباد" كرده‌ پايته‌خت پاشایه‌تى خوه‌ى و جارجاریگیش پایته‌خته‌گه‌ى جیواز كردیاد ئه‌را داراب گرد و شیراز . دى وه‌ى جووره‌ ئه‌راى هه‌ڵكه‌فت و میره‌یل شوانكاره‌ كلكرده‌ قه‌ڵاو شاره‌یل و تا ساڵ "447 ك – 1063 ز" گشت وڵات فارس خسته‌ ژیرده‌س خوه‌ى و له‌ ناوچه‌یل تریش هویچ قه‌دریگ ئه‌را فولادستون نه‌یشت.

مه‌حموود دێبگه‌يی

ج . أ