ته‌خت سه‌رۆكایه‌تى ئه‌ركیگ قورسه‌

شفق نيوز

 

بیگومان ئیمه‌ى كورد ئه‌گه‌ر بنوڕیمنه‌ لاپه‌ڕه‌یل تاریخ، ئه‌وه‌ ئه‌رامان ده‌ركه‌فید ك گشت سه‌ركرده‌یلمان له‌وه‌خته‌یلیگ شووڕش و راپه‌ڕین به‌رپا كردنه‌و جه‌نگ كردنه‌ دژ دوشمنه‌یل داگیركه‌ر، نه‌خش خاسیگ داشتنه‌ له‌ وه‌رگرى و به‌رژه‌وه‌ندیه‌یل دویارووژ كورد، هه‌ر له‌وه‌ر ئه‌وه‌یش نه‌بایه‌د وه‌ چه‌و كه‌میگه‌ بنوڕیمنه‌ یه‌كه‌ یه‌كه‌ى ئه‌و سه‌ركرده‌و قاره‌مانه‌یله‌ ك رووژگایگ وه‌ مه‌ویسى و مه‌ینه‌تى هه‌وڵ بیوچان دانه‌ ئه‌را سه‌رخستن كیشه‌ى ره‌واى كورد سته‌مدیده‌.

وه‌لى دیاره‌ رووژگار ئمڕوومان جیاوازه‌ له‌ دویه‌كه‌و سه‌رده‌م ئیسه‌ هه‌وه‌جه‌ وه‌ دانیشتن و گفتگوو دیرید له‌ساى سیاسه‌ت و ئه‌قڵ حه‌كیمانه‌. ئمڕوو رووژ جه‌نگ و تفه‌نگ نیه‌، رووژ ئه‌قڵ و داناییه‌، رووژ دبلۆماسیه‌ته‌، هه‌ر له‌وه‌ر ئه‌وه‌یش ته‌خت ده‌سڵات و سه‌رۆكایه‌تى ئه‌رك قورسیگه‌و هه‌وه‌جه‌ وه‌ كه‌س گونجیاگ و هه‌ڵكه‌فتگ دیرید، چوینكه‌ ئه‌گه‌ر ئه‌وسا كورد باشوور ته‌نیا جه‌نگ و كیشمه‌كیش وه‌ل رژیم به‌عس و هاوشیوه‌ى كردیاد له‌ جه‌وه‌ڵه‌یل كوردستان وه‌خاتر وه‌دیهاوردن هه‌قه‌یلى، وه‌لى ئیسه‌ ئه‌و جه‌نگه‌ فراوانتره‌و بویه‌ وه‌ل وڵاته‌یل ولایه‌نه‌یل نه‌یار و هاوسایه‌یل كوردستان و گشت جه‌هان، هه‌ڵبه‌ته‌ نه‌ك جه‌نگ راسكانى و كوشت و كوشتار، به‌ڵكوو جه‌نگ ئاشناكردن كاره‌ساته‌یل كورد و شوونه‌وكردن كورد له‌ كوومه‌ڵگاى ناوده‌وڵه‌تى و جه‌هانى و چوینیه‌تى مه‌یلكیشان مه‌ردم بیگانه‌ وه‌ره‌و لاى كیشه‌ ره‌واگه‌ى و پشتگیریكردن له‌ى ملله‌ته‌، یه‌یش بیجگه‌ په‌ره‌داین وه‌ مه‌سه‌له‌ى ژیرخان ئابوورى و بته‌وكردن په‌یوه‌ندى و كیشانن سه‌رمایه‌داره‌یل و كومپانیایه‌یل جه‌هانى وه‌ره‌و كوردستان، ئنجا هه‌ر له‌وه‌ر ئه‌وه‌یش ئیمه‌ى كورد هه‌وه‌جه‌ وه‌ كه‌سیگ كاریزما دیریم ك بتویه‌نید گشت ئه‌و سفه‌ته‌یله‌ ك سه‌ره‌تا ئشاره‌ت وه‌پى كردم گردویده‌ خوه‌ى ئه‌را ئه‌وه‌ك جاریگتر دوشمنه‌یلمان نه‌تویه‌نن زه‌فه‌ر له‌خاك و نیشتمانمان بارن و جاریگتر روڵه‌یلمان ئه‌نفال و بى سه‌ر وشوون بكه‌ن و عه‌تر كوشنده‌ى ژه‌هراوى بڕشننه‌ بان مه‌ردم ئاوایه‌یلمان و كووچ زووره‌ملى وه‌ خیزانه‌یل كورد بكه‌ن وه‌ره‌و وڵاته‌یل تر و ژیان له‌لیمان بكه‌نه‌ ژان.

ئه‌گه‌ر ته‌ماشاى بار ئیسه‌ى هه‌رێم كوردستان بكه‌یم له‌چه‌و ده‌ پانزه‌ ساڵ وه‌رجه‌ ئیسه‌، بیگومان ئاڵشتكارى فره‌یگ له‌بوار پرووژه‌یل خزمه‌تگوزارى ئه‌نجام دریاگه‌و تا راده‌یگ گشت شاره‌یل كوردستان بوینه‌سه‌ مایه‌ى مه‌یلكیشان مه‌ردم بیگانه‌، یه‌یش بیجگه‌ ده‌سكه‌فته‌ گه‌وراگه‌ ك ئه‌ویش ئارامى و ئاسایشه‌و مه‌ردم كوردستان له‌ساى ئه‌و سه‌قامگیرى و ئارامى ئاسایشه‌ هه‌ناسه‌ى خوه‌شى هه‌ڵكیشن و له‌خوه‌شى و خوه‌شگوزرانى ژیه‌ن و لایه‌ن دارایى و ئابوورى هه‌ر خیزانیگیش له‌چه‌و ئه‌وسا فره‌ خاستره‌و نه‌بایه‌د حاشا له‌ى خه‌یره‌ بكه‌ن ك له‌تى ژیه‌ن، چوینكه‌ ئیمه‌ى كورد ژیان ده‌روه‌ده‌رى و مه‌ویسى و مه‌ینه‌تیه‌یلمان وه‌ دریژایى ده‌یه‌ها ساڵ وه‌رجه‌ ئازادى خوازیار ترویسكه‌یگ رووشنایى بوى و له‌سایه‌ى خوداو هه‌وڵ وه‌رده‌وام كورد ئه‌و رووشناییه‌ ده‌ركه‌فت و ئه‌وه‌سه‌ كورد بویه‌سه‌ خاوه‌ن حكوومه‌ت و په‌رله‌مان و دامه‌زرانن پرووژه‌یل گه‌وراو ته‌نانه‌ت گه‌وراترین كومپانیایه‌یل جه‌هانیش هاتنه‌سه‌ كوردستان ئه‌را وه‌به‌رهاوردن و كاركردن له‌ كه‌رت نه‌فت و خزمه‌تگوزارى.

له‌یرا خوازیارم ئه‌و خاڵه‌ بخه‌مه‌ وه‌رچه‌و، ك ئه‌رك سه‌رۆكایه‌تى ته‌نیا ئه‌رك ناوخوه‌یى نیه‌، به‌ڵكوو ئه‌رك سه‌رۆكایه‌تیكردن ره‌سانن په‌یامیگه‌ ئه‌را گشت وڵاته‌یل دونیاو ده‌وروه‌ر ، ك ئه‌و په‌یامیشه‌ هه‌ڵگر به‌رژه‌وه‌ندى و كووتاییهاوردنه‌ وه‌و زوڵم و سته‌مه‌یله‌ ك هاته‌ تویش ئى ملله‌ت كورده‌و هه‌ڵگر ناسنامه‌ى ئى ملله‌ته‌سه‌ له‌ڕى ئاشناكردن و په‌یوه‌ندیه‌یل دبلۆماسى و دروسكردن پیه‌ڵ نزیكه‌وكردن كورد له‌گشت ملله‌ت و ده‌وڵه‌ته‌یل جه‌هان، ئنجا ئایا ئى ئه‌رك و ئى وه‌رپرسیارێتى گه‌ورا وه‌گشت كه‌سیگ كریه‌ید؟ ئایا هه‌ركه‌سیگ ده‌م له‌گه‌ورایى كوتیدو خوازیار ئه‌وه‌سه‌ بنیشیده‌ بان ته‌خت سه‌رۆكایه‌تى گشت ئه‌و خاڵ و سفه‌ته‌یله‌ دیرید تا ئیمه‌یش ده‌سخوه‌شى له‌لى بكه‌یم و پشت وه‌پى بووه‌سیم؟

جه‌ماڵ ئه‌ركه‌وازى