شووڕش تونس نه‌خشه‌ڕى ورسگه‌یله‌

شفق نيوز

به‌یاسه‌ ئه‌و بوركانه‌یل كپه‌ بته‌قیه‌یگه‌وه‌و ڕووژى بایگ ئاڵشت بوود. ئمجا هه‌رچه‌نى مه‌ردمیش سه‌بردارن له‌بان زوڵم و سته‌م و غه‌زه‌و خوه‌یان، وه‌لى وه‌ختى سه‌بریان بایگه‌ كوڵ، ده‌سڵاتدار سته‌مكار و سه‌ران ئه‌و ده‌سڵاته‌ خه‌نه‌ ناو زبڵدان تاریخه‌وه‌.

مه‌ترسى له‌یرا ئه‌وه‌سه‌ ك فه‌رمانڕه‌وایه‌یل په‌ند وه‌رنیه‌گرن، به‌ڵكوو هه‌ر خوه‌ن و به‌ن و زوڵم كه‌ن و كوشن و ملیاره‌ها پویل گرده‌و كه‌ن و گشت راسییگ شارنه‌وه‌و ئه‌وه‌ك هووكاره‌یل ره‌سانن یا ئعلام له‌باوه‌ت وجوود ورسگى و زوڵم و كوشتن و بڕین بیتاوانه‌یل باسى ئه‌كا وه‌سه‌به‌ب نیشانداین ڕاى و ئه‌ڕاى چوین و حاشاكردن له‌ سه‌ركرده‌یل گه‌نه‌كار و ناهه‌ق، ئه‌وان هه‌میشه‌ وه‌ جووریگ شیه‌و كه‌ن ك گوایا گشت ئه‌و راسیه‌یله‌ درووه‌و ده‌س ده‌ره‌كى ها له‌پشتى.

تائیسه‌یش فه‌رمانڕه‌وایه‌یل عه‌ره‌ب ناویان ها سه‌ره‌تاى لیست فه‌رمانڕه‌وایه‌یل زاڵم و سته‌مكار جه‌هان له‌خوسه‌و كینه‌ت ده‌رهه‌ق وه‌ ملله‌ته‌یلیان و له‌ناوبردن گشت سه‌روه‌ت و داراییان و داگیركردن ده‌سڵات، ك نه‌فامترین سه‌رۆكه‌یل جه‌هان له‌ مامڵه‌كردن وه‌ل ملله‌ته‌یلیانا، چوینكه‌ ترس خوه‌یان هانیان ده‌یگ گوله‌ بووه‌شنن له‌ڕوى خودنیشانده‌ره‌یل و كپه‌وكردن ده‌نگه‌یلیان و شیوانن نه‌خشه‌و قه‌واره‌یلیان و بیجگه‌ ئه‌وه‌یش دژ ئه‌و جایه‌ڵ جوانه‌یلنه‌ ك بیكارن و داواى كار كه‌ن و خودنیشانداین ئه‌نجام ده‌ن له‌ شوونه‌یل جووراو جوور له‌وه‌ر خاتر گوزه‌ران و ژیان ڕووژانه‌ى خوه‌یان و خیزانه‌یلیان، ك حكوومه‌ت ئه‌وانه‌ وه‌ ملهوڕ و سیخوڕ و دز و كینه‌ت له‌دڵ زانیگ.

ئه‌و به‌دڕه‌فتاریه‌ ك پاشاى تونس و سه‌رۆك و پاشایه‌یل تر عه‌ره‌ب ئه‌نجامى دانه‌، ته‌نیا وه‌ هاواركردن خودنیشانده‌ره‌یل له‌نزیك ماڵه‌یل سه‌رۆكایه‌تیان زوى له‌ناو چن و هویچ ڕیگه‌ نیه‌كه‌نه‌ دى بیجگه‌ هه‌یواین نه‌وگ ئه‌را ده‌یشت مه‌رز وڵاته‌یلیان دویاى ئه‌وه‌ك ملیاره‌ها پویل هه‌واڵه‌ى بانكه‌یل جه‌هان كردن و ماڵ و موڵك و باغ و بوسانه‌یل فره‌یگ  وه‌پى سه‌ندنه‌ ئه‌را ڕووژیگ له‌یوا ك زانن هه‌یوان و نیشتمان خوه‌یان هیلنه‌جى وه‌ سه‌رشووڕى.

راپه‌ڕین تونسى زه‌نگیگ بوى ئه‌را نزیكه‌وبوین ڕووژ قیامه‌ت له‌بان سه‌رۆكه‌یل سته‌مكار، ئه‌وه‌سه‌ مه‌ردم خه‌یك جموجویلن له‌ جاده‌یل ئوردن و مسر و سودان و جه‌زایر و سووریاو مه‌غرب و فلستین و یه‌مه‌ن و لوبنان و دویریش نیه‌ له‌ ده‌وڵه‌ته‌یل كه‌نداو یا خه‌لیجیش ڕوى به‌یگ و له‌وه‌رجه‌ ئه‌وه‌یش لیبیاى قه‌زافى ك راپه‌ڕین وه‌ شیتانه‌یى خوه‌ى له‌یه‌كه‌وداو له‌یوا تاریفى كرد ك تونس هه‌وه‌جه‌ وه‌و راپه‌ڕینه‌ نه‌یاشت و بایه‌س بوى سێ ساڵ تر چه‌وه‌ڕى بكردان، ك هه‌ر له‌خوه‌یه‌وه‌ ئه‌و قسه‌ كرد نه‌ك وه‌ زووان زه‌ینولعابدین ئبن عه‌لى ده‌ركریاگ.

له‌ عراقیش چینیگ له‌ دیموكراسیه‌یل ده‌وڵه‌مه‌ن ده‌ركه‌فت و نوێنه‌رایه‌تى كه‌ن له‌ په‌رله‌مان و سه‌ركردایه‌تیه‌یل وه‌ تایبه‌ت هه‌رسى سه‌رۆكایه‌تى باڵاو له‌وه‌رانوه‌ر ئه‌وه‌یش ملیۆنه‌ها كه‌س بیكار و كووچ وه‌پیكریاگ و بیوه‌ژن و یه‌تیم هه‌س، ك زوورمیان له‌ژیر خه‌ت فه‌قیرى ژیه‌ن و هویچ خزمه‌تگوزارییگ  وه‌پیان نیه‌ڕه‌سیگ، وه‌لى دوینید وه‌زیره‌یل جى وه‌جیكار و ته‌زویرچیه‌یل و په‌رله‌منتار و ده‌سڵاتداره‌یل ژیان پاشایانه‌ به‌نه‌ سه‌ر و هویریان نیه‌ لاى فه‌قیر و كه‌مدرامه‌ته‌یل.

بیگومان ئه‌وه‌ك له‌ تونس ڕویدا جویر نه‌خشه‌ڕى گشت ورسگه‌یله‌ له‌ جه‌هان و ده‌رس و په‌یام خاسیگه‌ ئه‌را گشت فه‌رمانڕه‌واو ده‌سڵاتداره‌یل وه‌گشت جووره‌ پۆسته‌یل و پله‌و پایه‌یان ك ئه‌و ڕویداگه‌ له‌وه‌رچه‌و بگرن و بایه‌سه‌ له‌بانیان خاسسازى راسه‌قینه‌ بكه‌ن له‌گشت جووره‌ كاره‌یلیان له‌ڕوى خزمه‌تگوزارى و به‌رزه‌وكردن ئاست گوزه‌ران و شوون نیشته‌جى هاووڵاتیه‌یل و ده‌رفه‌ت كاركردن و گرینگى یا ئه‌همیه‌تداین وه‌ فه‌قیره‌یل و خستنه‌كار جایه‌ڵ جوانه‌یل و ڕى نه‌گرتن له ‌ئازادى ڕاده‌رخستن و حورمه‌تناین له‌ هه‌قه‌یل ئاده‌میزادو ئازادیه‌یل تایبه‌تیان، یه‌یش وه‌رجه‌ ئه‌وه‌ك ده‌ریایه‌یل نه‌فت بوونه‌ ئاگر و هویچ ئاگریگ وه‌و شیوه‌ نه‌وگ ته‌نیا ئاگر دووزه‌خ نه‌وگ، ئمجا ئه‌و وه‌ختیشه‌ وشك و ته‌ڕ وه‌یه‌كه‌وه‌ سزیه‌ن و گشت ناوچه‌گه‌یش وه‌ ته‌واوى سزیه‌یگ و دویاخر ده‌سڵاتداره‌یل ته‌یاره‌یگ نیه‌ ئه‌ڕایان وه‌پى بهه‌یوان ئه‌را ده‌یشت وڵات و سه‌رۆكیگ  نیه‌ له‌ خوه‌رهه‌ڵات و خوه‌رئاوا كه‌سیگ جویر ئه‌وانه‌ ك له‌ ملله‌ته‌یلیان و غه‌زه‌و هاووڵاتیه‌یلیان هه‌یواینه‌ میوانداریان بكا، ته‌نیا ئه‌و سه‌رۆكه‌یل شایه‌ت میوانداریان بكه‌ن ك هاوشیوه‌ى خوه‌یانن له‌ زوڵم و سته‌مكارى. له‌ كووتاییش ئى پارچه‌ شعر ته‌رجومه‌كریاگ(ئه‌بولقاسم شابى)یشه‌ خه‌یمنه‌ڕوى ك ئیسه‌ وه‌ختیه‌.

ئه‌ر ملله‌ت بتواى هه‌ر ڕووژى بژیه‌یگ ..... هه‌ر بایه‌د قه‌ده‌ر جواویه‌وه‌ به‌یگ