كۆباشی‮ ‬تا كۆبانى‮...‬ كورد لە سەنگەريگ

شفق نيوز

ئمجا كوردستانيش ك به‌شيگ دانه‌وڕياگه‌ له‌ سحر جوانيه‌يل ئی خوه‌رهه‌ڵاته، تير وتانه‌ی هويچ كه‌سيگ ئه‌را هويچ مه‌راميگ هه‌ڵناگريد، وه‌ل ئه‌وه‌يشا سه‌عدی يوسفيش وه‌بی هويچ هووكاريگ روی وه‌ڕوی كورد و كوردستان هه‌ڵشاخيه‌يد و شه‌كه‌ر تيه‌ڵ ئه‌شكنيد، وه‌لی ناوبرياگ يه‌كه‌م و دويا كه‌سيش نيه‌ وه‌و ديد خوه‌يه‌ ته‌ماشای ئی خاك و نه‌ته‌وه‌ بكا.

هه‌ر له‌ی ماوه‌ كه‌سيگ تر له‌ وڵات شام كتاويگ ئه‌را شيوانن جوگرافياو مێژوو كوردستان بڵاو كردگه‌، چوينكه‌ ئه‌وانه‌ ده‌روينيان ژينگه‌يگ گه‌ورای شۆفێنيزمه‌و وه‌پيان ناكريه‌يد كه‌ميگ دويرتر بنووڕن و له‌ ئازار و كار و مه‌رام مه‌ردمان تر بڕه‌سنه‌وه‌و وژار جوانيه‌يل بكه‌ن، جوور ئه‌وه‌ك ئويشن: ئه‌وانه‌ك له‌ چه‌رمسازی كار ئه‌كه‌ن وه‌ بوو خوه‌ش ئه‌پژمن.

هه‌ر وه‌و خاتريشه‌ له‌ كوردستانيگ سه‌دان ساڵ داگيركرياگ و سته‌مليكرياگ دوينيم ئمڕوو هه‌رێميگ بويچگ له‌ دژ داگيركه‌ر و ترۆريسته‌يل له‌وه‌ر ئارامی و ئازادی و ده‌سه‌وه‌ركردن ئاينده‌ی خاسيگ جه‌نگ ئه‌كا، وه‌لی ئه‌و جووره‌ كه‌سه‌يله‌ هويچ تر نه‌يرن بخه‌نه‌ی بان مێژوو ئنساندووسی له‌وه‌ختيگ ك كورد ها له‌ سه‌نگه‌ريگ و له‌ كۆباشی تا كۆبانی دژ ترۆريسته‌يل و پلانه‌يليان سه‌ركه‌فتن تومار ئه‌كه‌ن و له‌ شوونه‌يل فريه‌يگ جه‌هانيش بويه‌سه‌ مايه‌ی ئاماژه‌ وه‌پيكردن، وه‌لی كه‌سه‌يل شوفێنی له‌ شوونه‌يل جياجيا ئی خه‌بات و شووڕشه‌يل ئازاديه‌ بويه‌سه‌ تارمايی وه‌رچه‌ويان و نادويننه‌ی.

كورد ك ئمڕوو ها له‌ سه‌نگه‌ريگ، بايه‌سه‌ له‌ ناخ هه‌ر كه‌سيگ له‌ ئيمه‌يش سه‌نگه‌ريگ تر ئه‌را كوشاننه‌وه‌ی خه‌ته‌يل قرمز ئه‌وان ساز بكه‌يم، چوينكه‌ مه‌سه‌له‌ی نه‌ته‌وه‌ييمان روی وه‌ڕوی جووره‌ ترۆر تر ئه‌دێد و ناكريه‌يد قورسايی گشت وه‌رگريكردنمان ته‌نيا لويله‌ی تفه‌نگ پێشمه‌رگه‌يل قارمان بدێ.

سه‌ڵاح شاكه‌لی

ج . أ