كاریزماو خاك و ملله‌ت دیریمن وه‌لى...!؟

شفق نيوز

چوین په‌یابوین و مردن ئه‌زیزه‌یل و  رووژه‌یل نه‌ته‌وه‌یى و رووژ ژن خواستن و شوى كردن و رووژ خوه‌شى و ناخوه‌شى كه‌سوكار و هووز و ملله‌ت و بوونه‌یل تر ك ها یاد و هویریان وه‌لى ئه‌وه‌ى ك من خوازم بویشم باس  سه‌روه‌رى ملله‌ته‌یله‌ ك وه‌ رووژ سه‌روه‌خوه‌یى ناسیاگه‌! له‌ى نزیكه‌یله‌ و له‌ ناو دڵ چه‌رمگ  خاك سیه‌ى ئه‌فریقا، ناو ملله‌تێگ و خاكه‌گه‌ى  له‌ بان نه‌خشه‌ى سیاسى دنیاو نه‌ته‌وه‌یل یه‌كگرتگ چویه‌ شان 192وڵات تا ژماره‌ى وڵاته‌یل خاوه‌ن ده‌نگ و ماف  له‌ 200 نزیكتر بكا! نازانیمن له‌ ئاینده‌ كام ملله‌ت  زویتر له‌ى ژماره‌ زیاد ئه‌كا وه‌لى دیاره‌ ئه‌وانه‌ى خاوه‌ن وڵات و ملله‌ت چه‌و سیرن وه‌سه‌روه‌خوه‌یى،  كوته‌ى دڵیان چه‌نه‌ ئیمه‌ ئه‌راى  شیرینى ئى خه‌وه‌ره‌ ناكوتێ و خوه‌شیان  وه‌ ره‌نگ و تام خوه‌شى ئیمه‌ نیه‌.  وه‌ختێگ كه‌فیده‌ هویرمان وه‌رژه‌ فره‌ له‌ ملله‌ته‌یل ئه‌راى رزگاربوین  ته‌قالا كردیمنه‌ و هیمان ئى چه‌وه‌ڕێ تیه‌ڵه‌ ها ده‌م كه‌ل، ئمجا زانیمن ك ماف وه‌ ژماره‌ى رووژه‌یل و ساڵه‌یل حساو ناكریه‌ید! ئیمه‌ كاریزما و خاك و ملله‌ت دیریمن وه‌لى  له‌ ملله‌ته‌یل ماف گومه‌ سار و فره‌ چه‌وه‌ڕێ كیش گه‌وراى دنیایمن  ك  ژماره‌ێ رووژه‌یل و ساڵه‌یل جه‌وركیشانمان بیه‌سه‌ هاوار كویه‌نه‌ى  هه‌ق خوازى، كه‌ى ده‌نگ به‌رزه‌و كردیمنه‌!؟ كه‌ى داواى مافه‌یلمان كردیمنه‌!؟ چه‌ن جار خه‌و وه‌ سه‌روه‌خوه‌یى دیمنه‌!؟ چه‌ن جار ماڵوێران و لانه‌ویز بیمنه‌!؟ چه‌ن جار له‌ ژان بیكه‌سى و ده‌روه‌ده‌رى سه‌رئه‌ونایمنه‌!؟ چه‌ن جارتر له‌ شوون رمیان ئماره‌ته‌یل كوردنشین، خاك و ملله‌ت و ئاره‌زووه‌یلمان به‌ش به‌شه‌و كردنه‌؟! هیمان تام سه‌روه‌خوه‌یى نه‌كردیمنه‌  و زانیمن ك ته‌نیا تاوان خوه‌مان نیه‌ ك له‌ وه‌خت سه‌رهیزدان ئاڵاى باوه‌ڕه‌یلمان نه‌ هیچ وڵاتێگ و نه‌ نه‌ته‌وه‌یل یه‌كگرتگ  نه‌هاتنه‌سه‌ پیشواز!؟

هیچ وه‌خت ملله‌ت كورد و داخوازییه‌یل ره‌وا وه‌لى پیرو له‌ پا كه‌فتگى، چه‌نه‌ ئمڕوو جه‌وانه‌و نه‌بیه‌ و چه‌نه‌ ئمڕوو هه‌وه‌جه‌ وه‌ ئه‌وه‌ نێرێد ك گشت ده‌نگ و باوه‌ڕه‌یلى  بوونه‌ یه‌ك تا ئى ده‌رفه‌ته‌ له‌ بار  نه‌چێ!  سه‌روه‌خوه‌یى ئه‌راى ئیمه‌ ته‌نیا ژماره‌یه‌گ نیه‌ له‌ ناو ژماره‌ى وڵاته‌یل!  خه‌ڵات یا پیشكه‌شیێگ نیه‌ وه‌  خێر سه‌ر بده‌نێ پیمان، یه‌ داواى ره‌واى دویه‌كه‌و ئمڕوو ئاینده‌مانه‌، یه‌ ئاوات و ئاره‌زووى گشت ئه‌وانه‌سه‌ ك  زانن هیچ ملله‌تێگ له‌ ژیرده‌سى ئاینده‌ى ره‌نگ  نێرێ.

دویه‌كه‌ باشوور سوودان و ئمڕوو... ئه‌را كوردستان نه‌ود!؟ هیمانیش له‌ ناو هۆڵ نه‌ته‌وه‌یل یه‌كه‌وگرتگ  شوون فره‌س ئه‌راى  وڵاته‌یل تازه‌ و ملله‌ته‌یل ئازادیخواز ك چه‌و زوورداره‌یل شكنن،  وه‌ مه‌رجێگ ئیمه‌ش ژماره‌یه‌گ تازه‌ ئه‌ڵوژنیمن ك ناو خوه‌مان و وڵات خوه‌مان له‌ بانى نویسریابوود، ئمجا ئه‌و ژماره‌ و ئه‌و رووژه‌ ك ئى رویداگه‌ له‌ ناوى چه‌و واز ئه‌كا ئه‌رامان پیرووزترین رووژ و ژماره‌س..!

 

عه‌لى حوسێن فه‌یلى