پێشمه‌رگه‌ی كوردستان زامن ئاسايش و ره‌وت جمشت نيشتمانی

شفق نيوز

ئه‌گه‌ر كه‌سيگ شه‌ره‌فنامه‌ی به‌دليسی و باقی شه‌ره‌فنامه‌يل بخوه‌نيده‌و نه‌ڕه‌ی شيرانه‌و شريقه‌ی شمشير رووڵه‌يل ئازای كورد ئه‌ژنه‌فيد ك تويه‌نستنه‌ زرانی وه‌ دوشمنه‌يل و داگيركه‌ره‌يل بچه‌منن و ناچاری بكه‌ن له‌ ئاست گه‌ورايی كورد و كوردستان سه‌ر بچه‌منن.

له‌ سه‌رده‌م تازه‌يش رووڵه‌يل كورد وه‌ خواست و ئيراده‌ی پووڵايينه‌و روی وه‌ڕوی پيلان و نه‌خشه‌ی داگيركه‌ره‌يل بوينه‌سه‌وه‌و چه‌ونه‌ترسانه‌ چينه‌ وه‌ره‌و پيری مه‌رگ و بوينه‌سه‌(پێشمه‌رگه‌)و خه‌بات دانه‌وڕياگ كردنه‌سه‌ ريڕه‌و، ك وه‌و خاتريشه‌ له‌ هويچ مه‌ترسی و گرفتيگ سڵ نه‌كردنه‌.

تومار پڕ له‌شانازی و سه‌روه‌ری پێشمه‌رگه‌ی كوردستان ئه‌وه‌نه‌ دوير و دريژ و پان و وه‌رينه‌ ك زه‌حمه‌ته‌ وه‌ وتار و كتاو يا وه‌ فيلم و درامای فريه‌يش باس بكريه‌يد، چوينكه‌ وژه‌ خاكيگ له‌ی كوردستانه‌ نيه‌ ك وه‌خوين گه‌ش شه‌هيديگ سه‌ربه‌رز قرمز نه‌ويد. داستانه‌يل پڕ حه‌ماسه‌ت پێشمه‌رگه‌ی كوردستان بوی ك تويه‌نست شكه‌ست وه‌ رژيم به‌عس فاشيست باريدو راپه‌ڕين مه‌ردم ساڵ ١٩٩٢ بكاده‌ تاج سه‌ر ملله‌ت كوردستان و دوياخريش حكوومه‌ت هه‌رێم و په‌رله‌مان و دام و ده‌زگايه‌يلی له‌لی بايده‌ به‌رهه‌م.

ناحه‌زه‌يل كورد فريه‌ وه‌ خاسی له‌ سه‌نگ و گه‌ورايی پێشمه‌رگه‌ ره‌سينه‌و، هه‌ر له‌وه‌ر ئه‌وه‌يش ئاماده‌ نين ماف پێشمه‌رگه‌ بيه‌ن و ئه‌را ماوه‌ی ١٠ ساڵ بودجه‌ی پێشمه‌رگه‌ نه‌ڕه‌سننه‌ هه‌رێم كودستان، چوينكه‌ باوه‌ڕيان ئه‌وه‌سه‌ ك وه‌ی شيوه‌ ئه‌تويه‌نن وره‌ی پێشمه‌رگه‌ كزه‌و بكه‌ن و له‌يوا له‌لی بكه‌ن له‌بان مه‌سه‌له‌ی نه‌ته‌وه‌يی و نيشتمانی كه‌مته‌رخه‌م بوود، وه‌لی بيئاگا له‌وه‌ك پێشمه‌رگه‌ی كوردستان وه‌ باوه‌ڕ قويليگ و وه‌ چاره‌نويسيگ حه‌تمی كوردستان ئه‌و چه‌كه‌ كردنه‌سه‌ شان و ئی ريڕه‌وه‌ گرتنه‌سه‌ وه‌ر و مه‌حاڵه‌ له‌بان هساو شه‌ره‌ف و گه‌ورايی نه‌ته‌وه‌ ده‌سوه‌ردار ئه‌رك و فه‌رمان پيرووز وه‌رگری له‌خاك و مه‌ردم بوون، هه‌ر وه‌و خاتريشه‌ جی خوه‌يه‌ له‌يره‌و وه‌گشت ريز و حورمه‌ت و نه‌وازشيگه‌و ته‌ماشای يه‌ك وه‌ يه‌كه‌ی پێشمه‌رگه‌يل كوردستان بكه‌يم و پشتگيری له‌ليان بكه‌يم و داكووكی له‌ مافه‌يليان و ماف كه‌س وكار خوه‌يان و شه‌هيده‌يل سه‌ربه‌رز و ئه‌نفالكرياگ ئه‌زيز بكه‌يم.

چوينكه‌ پێشه‌مه‌رگه‌ی كوردستان ته‌نيا زامن مقه‌يه‌تيكردن مه‌ردم و خاك كوردستانه‌، پێشمه‌رگه‌ وه‌ربه‌س گشت گرفت و به‌دبه‌ختييگه‌ ك روی بكاده‌ ئی وڵات شيرينمانه‌، پێشمه‌رگه‌ ته‌لبه‌ن پووڵايين باخ و كويه‌و دووڵ و ده‌يم و نساره‌يل نيشتمانه‌.

سۆزان ئه‌نوه‌ر

ج . أ