كورده‌يل فه‌يلی و ته‌به‌عيه‌ی سياسی

شفق نيوز

 

ئيمه‌ ئه‌گه‌ر ناو كورد فه‌يلی هه‌ڵوژنيم، بايه‌سه‌ له‌ بانمان ماف خوه‌ی بيه‌يمنه‌ ئی ناوه‌و شه‌هيده‌يل كورد فه‌يلی بخه‌يمنه‌ وه‌رچه‌ومان و دويره‌و بكه‌فيم له‌ هه‌ر خراوه‌يگ و هه‌ر چشتيگ دويرمانه‌و ئه‌خا له‌ كيشه‌ی سه‌ره‌كی.

ئيمه‌ له‌يوا دوينيم ك جی داخه‌ بڕيگ له‌ لاپه‌ڕه‌يله بويه‌سه‌ ده‌روازه‌يگ ره‌سانن ئه‌را كه‌سه‌يل تر وه‌بی له‌وه‌چه‌وگرتن مه‌ويسی كورده‌يل فه‌يلی و باوه‌ڕيان ئه‌وه‌سه‌ خزمه‌ت پيشكه‌ش ئه‌كه‌نه‌ ئی پيكهاته‌ی زوڵمليكرياگ عراقيه‌ ك نالان وه‌ده‌س رژيمه‌يل سته‌مكار يه‌ك له‌ شوون يه‌ك عراق.‌

كورده‌يل فه‌يلی هويچ چشتيگيان كه‌م نيه‌ ئه‌را ئه‌وه‌ك وه‌ هيزه‌و بچنه‌ ناو پرووسه‌ی سياسی له‌ عراق و مێژوويانيش شايه‌ت ئی چشته‌سه‌، وه‌لی من سه‌رم سوڕمينيد له‌وه‌ك ئايا ئه‌راچه‌ مه‌ردمانيگ هوير له‌وه‌ ئه‌كه‌ن ك كورد فه‌يلی بايه‌سه‌ له‌ڕی حزب و ره‌وته‌يل تره‌و كار بكه‌ن؟

له‌يرا ئه‌را نموونه‌ ئويشم: ئه‌راچه‌ په‌يكه‌ريگ ئه‌را شه‌هيده‌يل فه‌يلی له‌ يه‌كيگ له‌ مه‌يدانه‌يل به‌غدا دانانريه‌يد، يه‌يش له‌وه‌ختيگ ك وه‌رجه‌ په‌نج ساڵ هونه‌رمه‌نديگ عراقی ئه‌و په‌يكه‌ره‌ ته‌مام كردگه‌و كووان ئه‌و حزبه‌يل عه‌ره‌بی و كورديه‌ له‌ی مه‌سه‌له‌ی په‌يكه‌ره‌و ئه‌راچه‌ ئی كاره‌ جيوه‌جی ناكريه‌يد وه‌تايبه‌ت ئيسه‌ په‌يكه‌ره‌گه‌يش وجوود ديريد له‌ ناو ئه‌مباريگ و چه‌وه‌ڕی ئه‌وه‌ ئه‌كا كه‌سيگ هه‌ڵيبگريد و دامه‌زرنيده‌ی.

ئمجا ئه‌گه‌ر ئه‌و حزبه‌يله‌ ك وجوود ديرن له‌ناو حكوومه‌ت عراقی و ناخوازن سه‌ياره‌يگ كلبكه‌ن و ئه‌و په‌يكه‌ره‌ بار بكا، ئه‌ی چوين چه‌وه‌ڕی كيشه‌يل گرينگتر له‌ليان ئه‌كريه‌يد، ئايا ئه‌و حزبه‌يله‌ شه‌رمه‌زار نين له‌ خوه‌يان له‌ی فه‌رامووشكردنه‌و ئايا نه‌خش ئيچنه‌ لاپه‌ڕه‌يليگ چه‌س؟

ته‌نانه‌ت مه‌سه‌له‌گه‌ ره‌سيه‌سه‌ ئه‌وه‌ ك قسه‌ی نه‌سه‌ق و خراويش وه‌ يه‌كتری بدريه‌يد له‌وه‌ختيگ باس ئه‌كه‌ن و ره‌خنه‌ له‌ چين ولايه‌نه‌يل ئه‌گرن جوور ئه‌وه‌ك وه‌رگری له‌وانه‌ بكريه‌يد ك نوێنه‌رايه‌تيان ئه‌كه‌ن له‌ناوخود عراق و له‌ ده‌يشت عراق و نوێنه‌ر خوه‌يانيش ديرن له‌ ره‌سانن و ماڵپه‌ڕ و كه‌ناڵ و ده‌س ده‌ركييش ها پشتيان ئه‌را وه‌رگريكردن له‌ليان.

ئه‌ڵڵاجه‌ويش ها له‌ورا كورد و عه‌ره‌بيش تاوانباريان ئه‌كه‌ن، ئمجا له‌ليان هه‌ن هه‌ر دگانيش وه‌ كورد نانه‌ن و له‌ليانيش هه‌ن وه‌ رافزی تاريفيان ئه‌كه‌ن و له‌ليانيش وه‌ ئيرانی ناويان ئه‌وه‌ن و مه‌ردمانيگيش ئويشن زوورم كورده‌يل فه‌يلی بوينه‌سه‌ عه‌ره‌ب و ناسناو عه‌ره‌ب هه‌ڵگرتنه‌، ك ئايا ئی گه‌مه‌بازيه‌ تاكه‌ی، ئايا ئه‌وه‌ك هاته‌ تويش كورده‌يل فه‌يلی له‌ زوڵم و سته‌م به‌س نه‌وی؟

ئيسه‌ وه‌خت ئه‌وه‌ هاتگه‌ هوشياره‌و بويمن و گفت خاس بياشتويم و جورئه‌تدار بويم و ته‌ماشای مه‌سه‌له‌گه‌ وه‌ ئه‌قڵانيه‌ته‌و بكه‌يم وه‌بی سووزداری جاريگ وه‌ناو نه‌ته‌وه‌و جاريگ وه‌ناو مه‌زه‌و، ئايا تاكه‌ی چه‌وه‌ڕی، تاكه‌ی خزمه‌ت ئه‌وانه‌ بكه‌يم ك ناخوازن چشتيگ ئه‌رامان پيشكه‌ش بكه‌ن؟

من باس ناويشم له‌ نه‌ته‌وه‌ يا مه‌زه‌و دويره‌و بكه‌فيم يا هه‌ر هوير و باوه‌ڕيگ، وه‌لی نه‌بايه‌د بويمنه‌ پيه‌ڵيگ ئه‌را كه‌سه‌يل تر و بايه‌سه‌ له‌بانمان حورمه‌ت يه‌كتری بگريم له‌ڕوی مه‌زه‌و و ئايدۆلۆجيا و بايه‌سيشه‌ به‌رژه‌وه‌ندی گشتی كورده‌يل فه‌يلی له‌وه‌رچه‌و بگريم و بويمنه‌ قه‌واره‌يگ سه‌روه‌خوه‌ی فه‌يلی و سه‌ر وه‌ هويچ لايه‌نيگ نه‌ويم و دی به‌سه‌ ئی دروشم و ناونيشانه‌يل گه‌ورای بی كرده‌وه‌.

جه‌لال باقر

ج . أ