قه‌یران عراق و په‌یامه‌یلى ئه‌را كورد

شفق نيوز

ئى قسه‌ى فه‌یسه‌ڵه‌ له‌ قه‌یران ئمڕوو عراق ده‌قاوده‌ق راسه‌و چشتیگ له‌و قسه‌ كه‌مه‌و نیه‌ود و زیاى ناكریه‌ید ئه‌را ئى بار ئمڕوو عراقه‌، وه‌لى ئه‌یه‌ گرینگ نیه‌ بزانیم ك عراق به‌شبه‌شه‌ یا هویچ وه‌ختى نیه‌گونجیه‌ید، ئه‌وه‌ گرینگى ك بایه‌سه‌ ئه‌وه‌ بزانیم ك ئایا ئیمه‌ له‌ى عراق به‌شبه‌ش و نه‌گونجیاگه‌ چه‌ چنیمنه‌و؟ چه‌ كه‌فیده‌ ده‌سمان؟ ئیمه‌ى ملله‌ت كورد ك رووژ وه‌ رووژ بى ده‌وڵه‌تى بووده‌ ژانیگ فه‌رامووش نه‌كریاگ ئه‌ڕامان ئایا چه‌ تویه‌نیم بكه‌یم؟ چه‌ بكه‌یم ئه‌را ئمڕوو و سوو؟

 

ئه‌یانه‌ بڕیگ پرسیارن ك هه‌میشه‌ هانه‌ هویر تاك كورد، ك ئه‌گه‌ر وه‌ دقه‌ته‌و هه‌ڵكه‌فت چه‌ن ساڵه‌ى دویاى رمانن سه‌دام بخوه‌نیمه‌و، دوینیم ك هه‌ر له‌سه‌ره‌تاوه‌ ئه‌وانه‌ك رووژیگ له‌ رووژان له‌ناو ماڵ كورد ئۆپۆزسیۆن بوینه‌و ئه‌وانیچش جوور ئیمه‌ داخ ئه‌را هه‌ق كورد كیشانه‌ هه‌ر ئه‌وانه‌ن ك ئمڕوو ره‌سینه‌ ده‌سڵات و دیم و ژنه‌فتیم ك چه‌ وه‌پیمان وتن و ره‌فتار ئیسه‌یان چه‌واشه‌ى سه‌رده‌م ئۆپۆزسیۆن بوى.

 

هه‌ر له‌شوون رمیان رژیم وه‌رین كورد بویه‌ پایه‌ى بته‌ویگ ئه‌را راسه‌وكردن كیشه‌ى عراق و له‌بان پاى خوه‌ى وسانه‌ى، وه‌لى ئه‌و هه‌قه‌یله‌ ك وه‌ رووژ رووشنا له‌ كورد زه‌فت كریانه‌ كورد فره‌ وه‌ نه‌رمى و ئه‌ده‌به‌و داواى كرد، ئه‌ویش له‌ڕى ده‌ستوورى و گشت سه‌رۆك وه‌زیره‌یلیش ك چینه‌سه‌ كوشك ئه‌نجوومه‌ن وه‌زیره‌یل وه‌ ده‌سپیشخه‌رى و پشتگیرى كورده‌و بویه‌، وه‌لى وه‌ ماوه‌ى كه‌میگ په‌شمانه‌و بوینه‌ له‌ قه‌وڵه‌یلیان.

 

ئه‌را نموونه‌: هه‌ر زوى مادده‌ى(58)له‌باوه‌ت ناوچه‌یل داوڕیاگ له‌بار بردن و دویاخریش وه‌ جه‌خت كورد كریا مادده‌ى(158)و ناویگ تر له‌لى نریاو زینگه‌و كریا، وه‌لى هیمان جیوه‌جى نه‌كریاگه‌.

 

دویاى ئه‌وه‌یش ده‌سكردنه‌ دروسكردن كیشه‌ ئه‌را كورد چ له‌ڕوى هاوردن هیز یا دروسكردن گرفته‌یل تر بودجه‌و كیشه‌ى پێشمه‌رگه‌و كیشه‌ى قه‌بولكردن فیدراڵى و نا فیدراڵى تا كاره‌گه‌ ره‌سیه‌ ئه‌وه‌ك هه‌ر جاریگ  وه‌ مه‌هانه‌یگ جموجویل دیانه‌ هیز له‌ وه‌رانوه‌ر كورد، ئنجا جاریگ له‌ خانه‌قین و جاریگ له‌ زه‌ممار و جاریگ له‌ كه‌ركووك و دروسكردن ئۆپه‌راسیۆن و میلیشیاى جوراوجوور، یه‌یش بیجگه‌ ئه‌وه‌ك له‌ناوخود سوپا دژایه‌تى كورد و هیزه‌یلى كریاگه‌.

 

ئه‌یانه‌ نموونه‌یلیگن ك ئه‌و عراقى كورد دڵى وه‌پى خوه‌شه‌ له‌یوا ره‌فتار كردگه‌ وه‌رانوه‌رى، وه‌لى هه‌میشه‌ له‌ بوونه‌ى ملله‌ته‌یل سته‌مدیده‌و هه‌قخوریاگه‌و قسه‌یگ هه‌س ك ئویشید: گرینگ نیه‌ دوشمنه‌یلمان چوین هویره‌و كه‌ن چوینكه‌ ئه‌وان دوشمنن، گرینگ ئه‌وه‌سه‌ خوه‌مان بایه‌سه‌ چه‌ بكه‌یم ئه‌را ئه‌وه‌ك نه‌وینه‌ دوشمن خوه‌مان. له‌یرا ئه‌وه‌ك جوور په‌یام له‌ قه‌یران عراق ئه‌ڕامان ده‌ركه‌فید چه‌ن كورته‌ په‌یامیگه‌ خوه‌یان له‌ ریكخستن ناوماڵ كورد و دروسكردن هیزیگ نیشتمانى خاس خوه‌یان دویننه‌و ك ئنتما ئه‌را نیشتمان داشتوود وه‌ل دروسكردن سیاسه‌تیگ ئابوورى خاس و سه‌رچه‌وه‌یگ داهات له‌ڕى ناوخوه‌یى و ده‌ره‌كیه‌یل و بته‌وكردن پایه‌ى زیاتر، چوینكه‌ ئه‌یانه‌ بوونه‌ وه‌رگرى قه‌یران و هاتنه‌وه‌ى هه‌قه‌یل كورد.

 

زانا حه‌سه‌ن

ج. ا