وه‌ی جووره‌ له‌بان شوونه‌وار راديۆ شه‌فه‌ق وسيايم

شفق نيوز

ئه‌خوازيم بويشيم ك ريژه‌و راده‌يگ هه‌س له‌ناونی زينگه‌وكردن و ئه‌و زووانه‌ ك وه‌پی قسه‌ ئه‌كه‌ن، ئمجا له‌ حاڵه‌تيگيش ك گرينگی نه‌دريه‌يده‌ ناسنامه‌ی نه‌ته‌وه‌يگ و زووانه‌گه‌يان ك جوور بنه‌مايگه‌ ئه‌را چه‌سپانن ئنتما، ئه‌وه‌ له‌ی حاڵه‌ته‌ هويچ پيرووزييگ له‌ وجووديان ئه‌را خه‌بات نامينيد، ئيمه‌يش پيشبينی ئه‌وه‌ كرديم له‌ی بوونه‌ ك بويه‌ يادگارييگ ده‌نگ رووڵه‌يل پيكهاته‌گه‌مان بژنه‌ويم بانگه‌واز ره‌حمه‌تی بكيشيد ك ئه‌ويش راديۆ شه‌فه‌قه‌و هه‌ميشه‌ هوير له‌وه‌ كرديايم زينگه‌يل له‌ خاوه‌ن كيشه‌گه‌ فيشترن له‌و‌ كووچكردگه‌يله‌ ك قوربانی دانه‌، وه‌لی وه‌ باوه‌ڕم ئه‌و ژنه‌يل شينكه‌ر پيكهاته‌مانه‌ ك ڕی ئه‌گرنه‌ وه‌ر وه‌ره‌و وادی سه‌لام ئه‌را بان قه‌ور كووچكردگه‌يليان ئه‌وانه‌ گرينگی ئه‌يه‌نه‌ زووانه‌گه‌ فيشتر له‌وانه‌گ وه‌ناو رووشنهويريه‌و قسه‌ ئه‌كه‌ن و ئه‌وانه‌گ خاوه‌ن كيشه‌گه‌ن وئه‌وانه‌گيش وه‌ گووره‌ی هه‌وه‌س ئه‌كه‌فێده‌ هويريان له‌ی وه‌خته‌يله‌.

ئيمه‌ باوه‌ڕمان ئه‌وه‌سه‌ ك راديۆگه‌مان فريه‌ گه‌وراتره‌ له‌ی تاريفه‌ ك ديريده‌ی له‌ تايبه‌تمه‌ندی ره‌سانن، چوينكه‌ بنه‌مايگ بوی ئه‌را بنيات شيوه‌زووانيگ غه‌درله‌ليكرياگ ك وه‌گووره‌ی رووژگار شوونه‌واری نه‌مه‌ند، ئيسه‌يش فيشتره‌ له‌ دو مانگ به‌سياگه‌و ئيجاره‌ كه‌س زوڵممان ناكا، وه‌لی ئيمه‌ خوه‌مان زوڵم له‌ خوه‌مان كرديم وه‌ی بيده‌نگی قورسه‌ و پشتگووشخستنه‌ له‌بان وازگه‌ردين له‌ی ده‌نگه‌ ك له‌وه‌رچه‌ومان له‌ناو ئه‌چێدو ئيمه‌يش ته‌ماشای ئه‌كه‌يم جوور ئه‌وه‌گ به‌شدار بويم له‌و چاڵه‌ ك وه‌ده‌س خوه‌مان ئه‌رای هه‌ڵيكه‌نيم، يه‌يش نيشانه‌ی ريژه‌ی پابه‌ندی و قوربانيه‌ له‌وانه‌گ قسه‌ له‌بان مه‌زڵوميه‌ت ئی پيكهاته‌ كرديان و توانای مقه‌يه‌تيكردن ده‌سكه‌فته‌يل جيوه‌جيكرياگ نه‌يرن چ وه‌ده‌س خوه‌يان بدێ يا وه‌ده‌س كه‌سان تر.

راديۆ شه‌فه‌ق فيشتر له‌ ده‌يه‌يگ وه‌ چركه‌و ده‌قه‌ت و رووژ و هه‌فته‌و مانگه‌يل ك وه‌پيه‌و گوزه‌ر كردياد وه‌ شيوه‌يگ ژنه‌فياگ له‌ به‌غدای پايته‌خت ئسپات ئه‌وه‌ كرد ك كورده‌يل فه‌يلی وجوود و سه‌نگ كلتووری و ئه‌ده‌بی و سياسی و كومه‌ڵايه‌تی ديرن، فيشتريش له‌ ده‌يه‌يگ راديۆ شه‌فه‌ق له‌ خوه‌شی و ناخوه‌شی وه‌ هاوده‌نگی شنه‌وياره‌يلی ئوميد دياده‌ ئی پيكهاته‌و دروويش ناكه‌يم ئه‌گه‌ر بويشيم راديۆگه‌ بويه‌ نموونه‌ی دروسكردن برايه‌تی و خوه‌شه‌ويسی و په‌يامبه‌ر ئاشتی ئه‌را وه‌يه‌كه‌وژيان ناونی گشت به‌غداديه‌يل وه‌ ئايين و تايفه‌و نه‌ته‌وه‌و ئنتمايه‌يل جياوازيان.

جوانيه‌گه‌يشی ئه‌وه‌ بوی ك مه‌ردم له‌ڕی ئی راديۆ ئاشنای پيكهاته‌ی كورد فه‌يلی بوی، ئمجا له‌يرا پرسياريگ خوه‌ی ده‌رئه‌خا، ك ئه‌ويش ئايا ملله‌تيگ يا پيكهاته‌يگ هه‌س له‌ جه‌هان شانازی وه‌ وازهاوردن زووان خوه‌ی بكا جوور ئه‌وه‌ك له‌ پيكهاته‌گه‌ی ئيمه‌ی دوينيمنه‌ی وه‌ی بيده‌نگيه‌؟ وه‌گشت ئاشكراو راسييگ و دوير له‌ هه‌ر مجامله‌يگ ئويشمه‌ گشت ريكخرياگ و كومه‌ڵگه‌يل كورد فه‌يلی وه‌ل ريز و حورمه‌تمان ئه‌را هه‌وڵ دڵسووزه‌يل له‌ليان بيلا روی بكه‌يمنه‌ جه‌هان ئه‌نته‌رنێت و بگه‌رديمنه‌ شوون ماڵپه‌ڕ ئه‌و كومه‌ڵه‌و ريكخرياگه‌يله‌و بوينيم حاڵ حازر قه‌واره‌ی به‌رهه‌مه‌يليان ئه‌را پيكهاتگه‌يان چه‌نيگه‌؟ سه‌تايش وه‌ زووان داڵگی و دوياخريش وه‌ هه‌ر ناونيشانيگ تر ك ئاماده‌گی داشتوود له‌بان زه‌وی واقع له‌سای ئی دونيای وه‌رفراوانه‌ ك گشت جه‌هان گرته‌سه‌ خوه‌ی وه‌بی گرفت وناچاری، ك دوينيم ئيمه‌ بيبه‌ش خوه‌مان له‌يه‌يش كرديمه‌ و وجوود خوه‌مان له‌تی بته‌و نه‌كرديمه‌.

دوياخريش ئه‌وه‌ بوی ك شه‌فه‌ق تويه‌نست مێژوويگ ئه‌را خوه‌ی دامه‌زرنيد وه‌ پابه‌ندبوين له‌ وه‌رانوه‌ر ئه‌وانه‌گ ئحساس وه‌ وه‌رپرسيارێتی ئه‌كه‌ن له‌وه‌رانوه‌ر زووان و مافه‌يليان و‌ شانازی وه‌ ناسنامه‌گه‌يان بيجگه‌ ئه‌وانه‌ك ئه‌خنه‌ی هوير يا ئه‌وانه‌گ راهاتنه‌ له‌بان بيده‌نگی و له‌هويره‌وبردن ئه‌و هه‌وڵ ته‌قلايه‌يله‌، يا له‌مه‌ردمان تر ك تاريف له‌لی ئه‌ژنه‌ويم له‌بان ئه‌و كرده‌وه‌يل و داناين مێژووه‌ ك وه‌پيان ئويشيم ئه‌يه‌ به‌س نيه‌، به‌ڵكوو هويچ وجووديديگيش له‌ گوزاره‌كردنيش نه‌يريد، چوينكه‌ ئه‌گه‌ر چشتيگ ديريد و ئه‌خوازيد بويشيده‌ی وه‌ كرده‌وه‌ ئه‌نجامی بيه‌ له‌جيای ده‌رخستن قسه‌و باس و ئی باره‌ وه‌لمانا هه‌ڵگر وه‌خاتر قورتاركردن ئه‌و چشته‌گ ئه‌دێ قورتار بكريه‌يدو ژيان ئه‌را شه‌فه‌ق باريده‌و.

عه‌لی حسێن فه‌يلی

ج . أ