تام جه‌نگ

شفق نيوز

ئه‌و ريكخرياگه‌ وه‌ باوه‌ڕيگه‌و ده‌ركه‌فت ك چه‌واشه‌ی گشت نه‌ريت و په‌يڕه‌وه‌يل ئنسانی و ئاسمانيه‌، ئه‌ويش وه‌بوونه‌ی نه‌وين ناسنامه‌گه‌ی، ك سزايگيش نيه‌ ئه‌را دامه‌زرنه‌يل راسكانيه‌گه‌ی.

له‌لايگ تريشه‌و حكوومه‌تيگ ديريم له‌بان بنه‌مای ريككه‌فتن بنيات نرياگه‌و به‌شه‌و كرياگه‌ له‌ناونی پيكهاته‌يل سه‌ره‌كی، ك هه‌رچه‌نی جياوازی له‌ روخساره‌و ديريد جوور حكوومه‌ته‌يل وه‌رجه‌ خوه‌ی و پيكهاته‌يليش وه‌ شيوه‌ی ئاشكرايگ له‌تی به‌شدارن، وه‌لی ده‌سڵات جيوه‌جيكردن له‌تی كه‌فته‌سه‌ به‌ش فراكسيۆن گه‌ورا ك ئه‌ويش شيعه‌سه‌و هه‌مان ئه‌زموون غه‌ڵه‌ت دوباره‌وه‌ كرد ك بويه‌ مايه‌ی فه‌وتانن ئی وڵاته‌و به‌شبه‌شيه‌و كرد له‌بان ئه‌و ريڕه‌وه‌ ك ماڵويرانی و كاولكاری و كاڵين ئاشووگه‌ری و ره‌گه‌زی له‌لی كه‌فته‌و.

له‌يرا ده‌سڵات شيعه‌ په‌ند له‌ ده‌سڵات سنی وه‌رنه‌گرت و ئه‌وه‌ك رويدا ئاكام وه‌رنه‌گرتن ئه‌و په‌نده‌يله‌ بوی و ئيسه‌يش شوونيگ نيه‌ له‌ی عراقه‌ نه‌ناڵنيد وه‌ده‌س كوشتار ناوخوه‌يی و ترۆر وه‌گشت شيوه‌يل دڕنده‌ی و هويچ ناوچه‌يگيش ئارام نيه‌ ك كاريگه‌ر نه‌ود وه‌ی كرده‌وه‌يل قيزداره‌و ئه‌ڵڵاجه‌ويش ها له‌ورا ك ئاگردوی ئی كوشت وكوشتار دڕنده‌ی نائنسانييشه‌ جايه‌ڵ جوانه‌يل و پيكهاته‌يل ئی ملله‌ته‌نه‌.

چشتيگيش ك مايه‌ی سه‌رسوڕمه‌نين بوود ئه‌وه‌سه‌ ك گشت مه‌ردم قسه‌ له‌بان پاڵه‌وانه‌يل و جه‌نگاوه‌ره‌يل خوه‌يبه‌خش ئه‌كه‌ن ئه‌را له‌ناوبردن داگيركه‌ر، وه‌لی ئه‌وه‌ك راسی بوود جوور ئه‌وه‌ك دياره‌و دوينيم تون وتيژی فراوانيگ و زاڵبوين ريكخرياگ ترۆريستی داعشيش له‌بان توانای مه‌رم وجوود ديريد له‌ناوچه‌يليگ وه‌رفراوان له‌ی عراقه‌ ك ناڵنيد وه‌ده‌س سياسه‌ته‌يل غه‌ڵه‌تيگه‌و له‌ی ده‌ ساڵ دوياخره‌ له‌لايه‌ن حكوومه‌ت مه‌ركه‌زيه‌و.‌

زانياريه‌يليش ئاماژه‌ وه‌ ئه‌وه‌ ئه‌كه‌ن ك ترۆريسته‌يل داعش له‌ چه‌ن هه‌زار كه‌سيگ فيشتر نين و راسيه‌يليگيش ئه‌وه‌ ده‌رخه‌ن ك سه‌دان هه‌زار له‌ رووڵه‌يل ئی وڵاته‌ رويكردنه‌سه‌ مه‌يدانه‌يل جه‌نگ له‌ژير ناونيشان جوراوجوور و له‌وانه‌يش جه‌نگكردن دژ ترۆر، ئمجا هه‌ر بايه‌سه‌ بپرسيم ك عراق چوين ره‌سيه‌ ئی قوناغه‌ له‌دويای ئازادكردنی له‌ رژيم به‌عس سته‌مكار شوفێنی و چوين وه‌ تام تيه‌ڵ و بوو گه‌نيگه‌و كه‌فته‌ ناو كه‌ناو جه‌نگ؟

وه‌ل ئه‌وه‌يشا تام كه‌رامه‌ت و زرنگی و قوربانييش وجوود ديريدو پابه‌ندی وه‌ په‌يڕه‌و ئنسانی و نيشتمانی و ئاسمانييش دياره‌ و راسييگيش هه‌س گشت ئی چشته‌يله‌ په‌زنيد ك ئاماژه‌ وه‌پی كرديم و هه‌ر وه‌و خاتريشه‌ وه‌رجه‌ ئه‌وه‌ك منای كه‌سه‌يل تر بكه‌يم و ترۆريسته‌يل وه‌پی تومه‌تبار بكه‌يم بايه‌سه‌ بپرسيم ك ئايا ئيمه‌ توانای ئه‌وه‌ ديريم دگان وه‌ دريغی ئاشكرایگ بنه‌يم له‌لايه‌ن ئه‌وانه‌ك ملله‌ت عراقی پشت وه‌پيان به‌سا وه‌خاتر ره‌ساننيان وه‌ره‌و ئاسووده‌يی؟

خواست ئه‌وه‌سه‌ ئه‌و چشته‌يله‌ ده‌ربخه‌يم و ئاشكرای بكه‌يم ك ئايا هووكار شه‌ڕ و زاڵبوين هيزه‌يل تارمايی له‌بان باقی ئه‌و دڵسووزی و به‌زه‌يی و ئه‌قڵانيه‌ت و خوه‌شه‌ويستی مه‌ردمه‌ چه‌ بوی و ئه‌و هووكاره‌يله‌ چه‌ بوين ك له‌يوا كرد ده‌سه‌ ده‌سه‌ی جايه‌ڵه‌يل بوونه‌ ئاگردوی ئی ئاشووگه‌ری سه‌خته‌ ك جوور يه‌ك هه‌ڕه‌شه‌ له‌ خاك و ملله‌ت ئه‌كا له‌گشت شوونيگ و دوياخريش پرسيم ك ئايا تاكه‌ی مكوڕ بويمن له‌بان ئه‌وه‌ك حوكم عراق ئه‌كا نه‌ك چوين حوكم ئه‌كا؟

عه‌لی حسێن فه‌يلی

ج . أ