میرایه‌تى مه‌روانیه‌یل

شفق نيوز

فه‌رمانڕه‌واى باكوور سووریا و باشوور ئه‌نادۆل بوین. بیگومان تاریخ ده‌سڵاتداریه‌تى ئى بنه‌ماڵه‌ى كورده‌ وه‌ گووره‌ى تاریخ له‌و وه‌خته‌و  ده‌س وه‌پیكرد ك ده‌وڵه‌ت(بووه‌یهیه‌یل) وه‌ نه‌مه‌ندن(عه‌زدولده‌وله‌ى بووه‌یهى) له‌ساڵ (983م) وه‌ره‌و نه‌مه‌ندن و تاویانه‌وه‌ چى، ك هووزیگ كورد وه‌ناو (به‌نو مه‌روان)وه‌ سه‌رۆكایه‌تى (ئه‌بو عه‌لى كوڕ مه‌روان)میرایه‌تى سه‌روه‌خوه‌ییگ له‌ناوچه‌یل دیار به‌كر  و مه‌لازگه‌رد ئاشكرا كرد.

ئه‌بو عه‌لى كوڕ مه‌روان ئه‌را ماوه‌ى هه‌فت ساڵ فه‌رمانڕه‌وا بویه‌، له‌ساڵ (990م)ه‌و  میر بویه‌ تا ساڵ (997م). ئنجا له‌وه‌ر جه‌نگ  و مرافه‌ى ناونى ئه‌وان و هاوسایه‌یلیان، مه‌روانیه‌یل پاڵ دانه‌ ده‌وڵه‌ت فاتمیه‌یله‌و. مه‌روانیه‌یل گرنگى یا ئه‌همیه‌ت فره‌یگ دانه‌سه‌ دروسكردن ڕى وبان و پیه‌ڵه‌یل، وه‌ل ئه‌وه‌یشا هان زاناو ئه‌ده‌یبه‌یلیش دانه‌ ئه‌را ئه‌را نیشانداین نه‌خش یا ده‌ور خوه‌یان له‌ وه‌ره‌ونوابردن میرایه‌تیه‌گه‌و ریز و حورمه‌ت فره‌یگیان گرتنه‌.

مه‌روانیه‌یل دیار و ئاشكراس ك له‌ڕوى ئازایه‌تى و چه‌ونه‌ترسیه‌وه‌ كه‌س نه‌ویه‌ شان به‌یگ له‌شانیان و له‌ى ڕویه‌وه‌ ناودار بوینه‌، بیجگه‌ ئه‌وه‌یش وه‌ تونترین شیواز وه‌رانوه‌ر دوشمن و ناحه‌زه‌یلیان وسیانه‌و نه‌یشتنه‌ دوشمن زه‌فه‌ر له‌لیان باریگ له‌ماوه‌ى ده‌سڵات و حوكمڕانیان.

مه‌روانیه‌یل له‌ساڵ(1042م) وه‌گشت ئازاییگه‌وه‌ گه‌وراترین و دڕه‌نده‌ترین په‌لامار هووز (ئه‌غوه‌ز) توركمان ئه‌را بان ناوچه‌گه‌ شكاننه‌. وه‌لى جویر ئه‌وه‌ك له‌تاریخ دیاره‌و باس كریاگه‌، له‌ساڵ (1061م)وه‌ دویاوه‌ ناكوكى و نه‌گونجیان ڕوى له‌لیان كردگه‌و پشتگیر خاسیگ نه‌یاشتنه‌ پاڵ بیه‌نه‌ پیه‌وه‌و دى له‌وه‌ر ئه‌وه‌یش میرایه‌تیه‌گه‌یان ڕوى له‌ كزى و سسى كردگه‌. هه‌ر له‌وه‌ر ئه‌وه‌یش له‌وه‌ر ناچارى له‌ساڵ (1070م) چینه‌سه‌ بنباڵ سه‌لجوقیه‌یل، وه‌لى له‌یوا دیاره‌ ئه‌و چگنه‌ ئه‌را بنباڵ سه‌لجووقى هویچ ئه‌ڕایان نه‌كردو سه‌لجوقیه‌یل له‌ ساڵ (1084م) وه‌ ته‌واوى له‌ ناوچه‌ى دیار به‌كر ده‌ریانكردنه‌ و له‌ساڵ (1096م)یش دویا میریان له‌ناو بریا.